कोरोनामुक्त भएर अस्पतालबाट डिस्चार्ज हुने बढे, खाली हुँदै आईसीयू र भेन्टिलेटर

कोरोनामुक्त भएर अस्पतालबाट डिस्चार्ज हुने बढे, खाली हुँदै आईसीयू र भेन्टिलेटर

A+ A A-

डा. सा'ब हजुरहरूलाई धेरै-धेरै धन्यवाद !

झण्डै २० दिनअघि एकैपटक कोरोना संक्रमित दाइ र आमालाई धादिङ खानीखोलाबाट लिएर आएकी छोरी सुनिता कार्कीले टेकु अस्पतालबाट घर फर्किँदै गर्दा डा. अनुप बाँस्तोलालगायत चिकित्सकको टिमलाई धन्यवाद दिइन् ।

धादिङकी सानुमाया भण्डारी डिस्चार्ज हुँदै ।

‘घरमा अक्सिजन चाहिँ दिनुहोला । अक्सिजन तह ८८ भन्दा तल झर्न नदिनुहोला है ! आमालाई ट्वाइलेट जाँदा गाह्रो हुन सक्छ !’ अक्सिजन तह घरमा के-कसरी मिलाउने भन्ने विषयमा परामर्श दिँदै डा. अनुपले बिरामीलाई बिदाइ हात हल्लाए ।

कोभिड निमोनियाले आक्रान्त भएकी ७१ वर्षीया सानुमाया भण्डारीले निको भएर घर फर्किन पाउँदा खुसी व्यक्त गरिन् ।

‘सुरुमा आउँदा त सास फेर्न पनि गाह्रो हुन्थ्यो । आमाको अवस्था हेर्दा त यसरी सञ्चो भएर जान पाइएला जस्तो लागेको थिएन’, कार्की भन्छिन्, ‘अहिले एकदमै खुसी लागेको छ ।’

kumari bank — धादिङकी सानुमाया भण्डारी डिस्चार्ज हुँदै ।

यतिखेर टेकु अस्पतालमा मात्रै नभई अधिकांश कोभिड केन्द्रित अस्पतालमा डिस्चार्ज हुनुको यो ‘खुसी’ चुलिएको छ । आजभोलि अस्पतालमा भर्ना हुनेभन्दा डिस्चार्ज हुनेको संख्या बढिरहेको छ ।

कुनै समय अस्पतालमा बेड नपुगेर आँगन, कोरिडोर, पार्किङमा समेत बिरामी राखेर उपचार गराएको टेकु अस्पतालको इमर्जेन्सी वार्ड मात्रै नभएर आईसीयू र भेन्टिलेटर पनि खाली हुन थालेको डा. अनुप बताउँछन् । अस्पतालकी आईसीयू इञ्चार्ज डा. उषा देवकोटा भन्छिन्, ‘आईसीयू यो हप्तादेखि खाली हुन थालेका छन् । तर, सिकिस्त संक्रमित भने आईसीयूमा छन् ।’

यसरी बिरामीको संख्या घटेसँगै आँगन, पेटीमा राखिएका आकस्मिक बेडलाई अस्पतालहरूले स्टोर गर्न थालिसकेका छन् ।

आकस्मिक रूपमा पेटीमा बनाइएका बेडहरू खात लगाएर राखिँदै ।

यसरी घट्दो कोभिड संक्रमितको संख्यालाई मध्यनजर गर्दै टेकु अस्पतालले नन-कोभिडका बिरामीको भर्नासमेत सुरु गर्ने तयारी गरेको अस्पतालका निर्देशक डा. सागर राजभण्डारी बताउँछन् ।

बिरामी फर्काउनभन्दा आँगनमै राखेर भएपनि उपचार दिएको पल सम्झँदै डा. सागर भन्छन्, ‘हामीले क्षमताभन्दा बढी बेड पनि राख्यौँ । ६० बेड क्षमता भएकोमा हामीले १३२ बेडसम्म पनि चलायौँ । त्यस्तो स्थितिबाट अहिले यो स्थितिमा आइपुग्नु राम्रो कुरा हो ।’

त्यसो त गत हप्तादेखि नै संक्रमणदर ओरालो लागेसँगै वीर अस्पतालको इमर्जेन्सी वार्ड नन-कोभिड संक्रमितले भरिन थालेका थिए ।

डिस्चार्ज हुँदै बिरामी ।

‘बिरामीको चाप ५० प्रतिशतले नै घटेको छ’, वीर अस्पतालका प्रवक्ता डा. अच्युत कार्की भन्छन्, ‘इमर्जेन्सीमा अहिले कोभिडभन्दा बढी नन-कोभिडका बिरामीले भरिन थालेका छन् ।’

वीर अस्पतालमा पनि भर्ना हुने कोरोना संक्रमितको तुलनामा डिस्चार्ज हुने दर बढ्दै गएको छ । अस्पतालमा अहिले दैनिक ४-५ जनासम्म भर्ना भइरहेका छन् भने दैनिक १० जना डिस्चार्ज भइरहेको डा. कार्की बताउँछन् ।

वीर अस्पतालको इमर्जेन्सी वार्ड ।

कोरोना संक्रमितको संख्या घटेपछि शिक्षण अस्पतालमा पनि आईसीयू बेड खाली हुन थालेको प्रवक्ता डा. सन्तकुमार दास बताउँछन् ।

दैनिक ४० देखि ५० जना नयाँ संक्रमित आउने शिक्षण अस्पतालमा हिजोआज ८/१० जना मात्रै नयाँ बिरामी भर्ना भइरहेका छन् । कोरोना संक्रमण उच्च बिन्दुमा पुगेका बेला ३७० बढीको उपचार गर्दै आएको शिक्षण अस्पतालमा अहिले त्यो संख्या घटेर १०१ मा पुगेको छ ।

खाली हुँदै टिचिङ अस्पतालको इमर्जेन्सी वार्ड ।

अबको आवश्यकता : पोस्ट कोभिड उपचार

कोरोना संक्रमितका नयाँ बिरामी भन्दापनि पोस्ट कोभिडको समस्या लिएर आउने संख्या उल्लेखनीय रहेको डा. अनुप बताउँछन् ।

फलोअपमा आउने अधिकांश बिरामीमा थकान, खोकी, श्वासप्रश्वासमा समस्या, छाती दुख्ने, अनिद्रालगायतका समस्या देखिएको उनको भनाइ छ ।

‘सिकिस्त कोभिड निमोनिया हुनेहरू फलोअपमा आइरहेका छन्’, डा. अनुप भन्छन्, ‘थकान, जिउ दुखिरहने, मुटुले काम नगर्ने, हृदयाघातदेखि प्यारालाइसिसलगायत मनोवैज्ञानिक समस्या भएर फलोअपमा बिरामीहरू परामर्शका लागि आउने गरेका छन् । तीमध्ये काेही त भर्ना पनि भएका छन् ।’

‘कोरोनाले सिकिस्त भएका बिरामीको निमोनियाले बिगारेको फोक्सो फिर्ता आउन धेरै समय लाग्छ । उनीहरूलाई चिसो, धुलो, धुवाँ अथवा कुनै ब्याक्टेरियल संक्रमण भएर निमोनिया भएको खण्डमा श्वासप्रश्वासमा गाह्रो हुने, ज्वरो आउनेलगायतका समस्या हुने गर्छन्,' डा. बाँस्तोलाले भने ।

ओरालो लागेको कोभिड संक्रमणलाई मध्यनजर गर्दै सरकार पोस्ट कोभिड रिह्याभिलिटेसन हब निर्माणमा लाग्नुपर्ने डा. अुनपको सुझाव छ ।

टेकु अस्पतालको इमर्जेन्सी वार्ड ।

कोरोनाको जोखिम कायमै

कोरोना संक्रमणदर केही ओरालो लागे पनि जोखिम कायमै रहेको चिकित्सकहरू बताउँछन् । गाउँबाट बिरामी उपचारका लागि आउन थालेकाले कोरोना संक्रमण घटिहाल्यो भनेर भन्न सक्ने अवस्था नरहेको डा. सागर बताउँछन् ।

डा. सागरका अनुसार हाल संक्रमण विस्तारै ओरालो लाग्दै गएको छ । निषेधाज्ञाले कोरोना संक्रमणको ‘चेन ब्रेक’ भएको हुन सक्ने अनुमान गर्न सकिए पनि मापदण्डबिना निषेधाज्ञा खुकुलो हुँदा जोखिम बढ्न सक्ने चिकित्सकहरूको चेतावनी छ ।

हालसम्म पनि कोरोना संक्रमणदर २१ प्रतिशत रहेकाले जुनसुकै बेला पनि संक्रमण उकालो लाग्न सक्ने जोखिम कायमै रहेको विज्ञहरूको भनाइ छ ।

प्रकाशित मिति: मंगलबार, असार ८, २०७८ १३:०३