कोरोना कहरमा कार्यकर्ता बटुलेर सम्मान थाप्न मन्त्रीलाई भ्याइनभ्याइ, प्रहरीलाई सकस

कोरोना कहरमा कार्यकर्ता बटुलेर सम्मान थाप्न मन्त्रीलाई भ्याइनभ्याइ, प्रहरीलाई सकस

A+ A A-

प्रधानमन्त्री केपी शर्मा ओलीले मन्त्रिपरिषद् पुनर्गठन गर्दा मन्त्री बनेका केही नेताहरूलाई कोरोना महामारीबीच गृहजिल्लामा सम्मान थाप्न भ्याइनभ्याइ छ ।

मन्त्रीको शपथ खाएसँगै उनीहरू कोरोना संक्रमणलाई भुलेर निस्फिक्री कार्यकर्ता जम्मा गरेर भिडभाडका बीच सम्मान ग्रहण गरिरहेका छन् । यसरी कोरोना संक्रमणलाई बेवस्ता गर्दै गृहजिल्लामा सम्मान तथा बधाई लिइरहेका मन्त्रीका तस्वीर अहिले सामाजिक सञ्जालमा भाइरल भइरहेका छन् ।

प्रदेश २ बाट ओली नेतृत्वको सरकारमा रहेका उपप्रधान तथा परराष्ट्रमन्त्री रघुवीर महासेठ, संस्कृति, पर्यटन तथा नागरिक उड्डयनमन्त्री उमाशंकर अरगरिया र महिला, बालबालिका तथा ज्येष्ठ नागरिकमन्त्री चन्दा चौधरीलाई आफ्ना गृहजिल्लामा कार्यकर्ताको ठूलो भिड जम्मा गरेर सम्मान तथा बधाई साट्न भ्याइनभ्याइ छ ।

यसरी भिडभाड जम्मा गरेर सम्मान थापिरहेका उनीहरूका तस्वीरले कोरोना संक्रमणलाई गिज्याइरहेको भान हुन्छ । ओली नेतृत्वको सरकारमा मन्त्री बनेलगत्तै उनीहरूले सरकारले लागू गरेको स्वास्थ्य मापदण्डलाई लत्याउँदै भिडभाड जम्मा गरेको र सम्मान ग्रहण गरेको भन्दै समाजिक सञ्जालमा चर्को आलोचना भइरहेको छ ।

उपप्रधानमन्त्री रघुवीर महासेठ सम्मान थाप्न गृहजिल्ला धनुषाको जनकपुर र निर्वाचन क्षेत्रका विभिन्न गाउँ घुमिरहे । जहाँ उनलाई सयौँको भिडले माला र खादा लगाउँदै सम्मान गरे । कोरोना संक्रमणलाई बेवास्ता गर्दै स्वास्थ्य मापदण्डविपरीत उपप्रधानमन्त्री महासेठ भिड लिएर बेप्रवाह हिँडिरहेको तस्वीरमा पनि देख्न सकिन्छ ।

त्यस्तै, संस्कृति, पर्यटन तथा नागरिक उड्डयमन्त्री बनेलगत्तै उमाशंकर अरगरिया पनि गृहजिल्ला धनुषा पुगे बधाई तथा सम्मान लिन व्यस्त रहे । उनले पनि मन्त्री महासेठजस्तै कार्यकर्ताको ठूलो भिड जम्मा गरेर बधाई तथा सम्मान थापिरहँदा कोरोना संक्रमणको ख्याल गरेनन्, बस् मस्त फूलमालामै रमाइरहे ।

अर्का महिला, बालबालिका तथा ज्येष्ठ नागरिकमन्त्री चन्दा चौधरीले पनि सम्मान लिँदै धनुषा र महोत्तरीका विभिन्न स्थानमा चक्कर मारिन् । उनको कार्यक्रममा पनि सयौँको भिड जम्मा भयो । र, त्यो भिडले उनलाई ५१ किलोको माला लगाइदियो । यसरी भिड जम्मा गरेर सम्मान थापिरहँदा कतिपय ठाउँमा मन्त्री चौधरीले मास्कसमेत लगाउन भुलिन् ।

नेता-कार्यकर्ताको भिडभाडमा सुरक्षाका खातिर भन्दै प्रहरी पनि मन्त्रीका पछिपछि दौडिरहे । कोरोना संक्रमण तीव्र रूपमा फैलिरहेको भन्दै जिल्ला प्रशासन कार्यालयले सर्वसाधारणलाई घरबाहिर ननिस्कन आदेश जारी गरिरहेका बेला मन्त्री भने स्वास्थ्य मापदण्डको खिल्ली उडाउँदै कार्यकर्ताको भिड जम्मा गरेर हिँडिरहे ।

मन्त्रीहरूले गृहजिल्लामा भिड जम्मा गरेको विषयमा कुरा गर्न खोज्दा धनुषाका जिल्ला प्रमुख अधिकारी बन्धुप्रसाद बाँस्तोला हामीसँग तर्किए । मन्त्रीहरू आएको समयमा सधैँ जस्तो सुरक्षामात्र आफूहरूले दिएको प्रतिक्रिया दिँदै उनले रिसाउँदै फोन राखिदिए ।

तर, धुनुषाकै एसपी प्रकाश रानाभाट भने मन्त्रीहरू स्वयंले परिस्थिति नबुझिदिँदा समस्या भएको बताउँछन् । ‘हामीलाई हेडक्वाटरबाटै सुरक्षा दिनु भनेर आदेश आउँछ । त्यसलाई हामीले पालना गरेका हौं,‘ उनले भने, ‘यस्तो बेलामा नेताहरू आफैँले बुझेर काम गर्नुपर्ने हो ।'

मन्त्रीद्वय अरगरिया र चौधरी आबद्ध पार्टी (जसपा) दुई समूह बाँडिएकाले जिल्ला आउँदा थप सुरक्षा चुनौती भएको भन्दै आफूहरूले स्कटिङ गराउनुपरेको उनले बताए । ‘हामीलाई माथिबाटै आदेश आएपछि गर्नै पर्‍यो,' उनले भने, ‘तर, मन्त्रीहरूले नै आफ्ना कार्यकर्तालाई मापदण्डविपरीत कार्यक्रम नगर भन्नुपर्नेमा उनीहरूलाई कार्यक्रम गर्न प्रेरित गरिरहेको देखियो।'

प्रकाशित मिति: सोमबार, असार ७, २०७८ १७:१०