'कोभिड वार्डको सफाइ गर्नु चिया बेचेजस्तो सजिलो त कहाँ थियो र ?'

A+ A A-

सेती प्रादेशिक अस्पतालको कोभिड आईसीयू वार्डकी सरसफाइकर्मी हुन् धनाकुमारी बडैला । उनले कोरोना महामारी सुरु भएदेखि अस्पतालमा सफाइकाे काम गर्दै आएकी छन् ।

अस्पतालमा काम गर्न सुरु गर्नुअघि उनी सेती प्रादेशिक अस्पतालअगाडि चिया नास्ता बनाउँथिन् । कोरोनाको महामारी सुरु भएसँगै अस्पतालमा सरसफाइकाे काम गर्न थालिन् ।

अस्पतालमा काम गर्न थालेकी धनाकुमारी वार्डमा सरसफाइका साथसाथै बिरामीका लागि औषधि बोक्छिन् । बिरामीको हेरचाह गर्छिन् ।

‘काम सानो ठूलो हुँदैन तर कोभिड आईसीयूको वार्डमा काम गर्न चिया बनाए जति सजिलो भने छैन,’ धनाकुमारी भन्छिन् ।

सुरुसुरुमा उनलाई पनि कोभिड वार्डमा काम गर्न निकै डर लागेको थियो । कोरोनाको महामारीको समयमा कोभिड वार्डमा कोभिडका बिरामीको हेरचाहसँगै सरसफाई गर्नुपर्ने । धनाकुमारीलाई निकै अप्ठ्यारो भएको थियो ।

'छोयो कि मरिहाल्छ भन्थे मानिसहरू । त्यसैले पनि अस्पतालमा काम गर्न सुरुमा निकै अप्ठेरो लागेको थियो,' उनले भनिन्, 'अस्पतालमा काम गर्नुपर्ने त्यही पनि कोरोना संक्रमितको हेरचाह, त्यस्तो सुनेपछि मलाई पनि डर लाग्थ्यो ।'

तर, सधैँ डराएर मात्र पनि त हुँदैनथ्यो । उनले हिम्मत हारिनन् । विस्तारै बुझ्दै गइन् । काम पनि सहज लाग्न थाल्यो । 'सधैँ डराएर मात्र पुग्दैन थियो । आँट गरेर यसमा लागेँ । अहिले काम गर्न सहज लाग्छ,’ उनले भनिन्, 'अहिले त धेरै बुझ्ने भएकी छु । पहिले भने नबुझेर गाह्रो हुन्थ्यो ।' सुरुमा अस्पतालमा काम गर्छे भनेर छिमेकी पनि डराउने गरेको उनले सुनाइन् ।

कोभिडको जोखिमका बीच काम गरिरहेकी उनको काम गर्ने समय भने निश्चित छैन । आवश्यकताअनुसार जतिखेर पनि काममा खटिनुपर्ने हुन्छ । ‘कहिले दिनभर हुन्छ । कहिले राति हुन्छ । केही ठेगान छैन,’ धनाकुमारी भन्छिन् ।

काम गरिरहँदा कहिलेकाहीँ खाना खाने समय नपाएको अनुभव पनि छ उनको । यसपटक आफूलाई अघिल्लो पटकको भन्दा बढी समस्या भएको बताउँछिन् धनाकुमारी ।

उनले आफ्नो आँखैअगाडि कतिपय कोरोना संक्रमितको ज्यान गएको पनि देखेकी छिन् । त्यस्तो बेला आफू पनि रुने गरेको बताउँछिन् उनी ।

‘आईसीयूमा रहेका कतिपय संक्रमित कम उमेरका हुन्छन् । उनीहरूको मृत्यु हुँदा कति पटक आफैँ पनि रोएको छु,' उनी भन्छिन् ।

कोभिड वार्डमा काम गर्दा संक्रमण भइने हो कि भन्ने पिरले भने उनलाई सताइरहन्छ । त्यसमाथि अस्पतालका कर्मचारी पनि संक्रमित भएपछि उनको यो पिर अझ बढेको थियो । तर, उनी संक्रमित भएकी छैनन् ।

'सँगै काम गर्ने स्टाफहरू संक्रमित भए । तर, मलाई भएन । अरु संक्रमित भएको देख्दा आफूलाई पनि संक्रमण हुने हो कि भन्ने डर लाग्दो रहेछ,' धनाकुमारी भन्छिन्, 'संक्रमित भइन्छ कि भन्ने डर अझै छ । जोखिममा होसियार भएर काम गर्नुपर्ने हुन्छ ।'

तर, अरुको सेवा गर्न पाउँदा खुसी लाग्ने बताउँने उनी संक्रमितहरू निको भएर घर फर्कँदा सबै दु:ख बिर्सने गरेको बताउँछिन् । यही कारण काम गर्न हौसला मिल्ने गरेको बताउँछिन् धना कुमारी ।

प्रकाशित मिति: शनिबार, असार ५, २०७८ ११:४२