निशेधाज्ञामा रातारात काठमाडौं हिँडेका यात्रु जब चितवनमा रोकिए‍...

A+ A A-

शुक्रबार (हिजो) रातको ११ बजे । चितवनको भरतपुरस्थित केन्द्रीय टर्मिनल बसपार्कमा चर्को हल्लाखल्ला थियो । यात्रु बसहरू पनि बाक्लै थिए । सिरहा, रौतहट तथा सर्लाहीबाट काठमाडौंका लागि छुटेका करीब १० वटा यात्रु बसहरू निशेधाज्ञमा बिना पास रातारात चितवन आइपुगे । ती बसलाई चितवन प्रशासनले रोक्यो ।

बस रोकिएपछि करिब ३ सय यात्रु अलपत्र परे । यात्रुहरूमध्ये कतिपय वैदेशिक रोजगारीका लागि हिँडेका थिए । कोही काठमाडौंको घरभाडा तिर्नुपर्ने बाध्यताले हिँडेको बताउँथे ।

रौतहट, सप्तरी, सिरहा, महोत्तरी तथा सर्लाहीलगायतका जिल्लाबाट आएका यात्रुहरूले वैदेशिक रोजगारको लागि मेडिकल गराउन, पासपोर्ट बनाउन र अन्य कामको लागि काठमाडौं हिँडेको बताए । बस रोकिएको लामो समय भइसक्दा पनि गतिलो जवाफ नआएको भन्दै उनिहरू आक्रोशित बन्दै गएका थिए ।

‘पर्सि फ्लाइट छ कतारको । ड्राइभरले कुरा हुँदैछ मात्र भन्छ । रातको १२ बज्न थाल्यो अहिलेसम्म कुनै ठोस निर्णय आएको छैन,' चितवनमा रोकिएकामध्ये एक यात्रु यसन मिक्रामीले बाध्यता सुनाए, 'पर्सिको लागि काठमाडौं पुग्नैपर्ने छ । गएर पीसीआर गर्नुपर्ने छ किनमेल गर्नु त छँदैछ । बिहान ६ बजेदेखि यसरी बसेको छु ।'

पास नभएका गाडीलाई अरु जिल्लाबाट कसरी कटे भन्ने प्रश्न गर्छन् मिक्रामी । अब कसरी काठमाडौं पुग्ने भन्ने चिन्ताले सताएको छ उनलाई ।

त्यस्तै रौतहट घर भएका ४७ वर्षीय राम साह पनि वैदेशिक रोजगारीमा जानका लागि मेडिकल गराउन काठमाडौं हिँडेको बताउँछन् । निषेधाज्ञाको समयमा चार गुणा भाडा तिरेर काठमाडौं हिँडेको बताउँछन् साह ।

'मेडिकलको लागि बोलाएका छन् । ड्राइभरले काठमाडौं पुर्‍याइदिन्छु भनेको थियो तर, यहाँ रोकिनु पर्‍यो,' साहले भने, 'भएको पैसा पनि सकिन थाल्यो ।'

साहसँगै रहेका अर्का यात्रु मुकेस जैसवालको समस्या पनि उस्तै छ । 'विदेश जान पासपोर्ट बनाउन हिँडेको हुँ । बसको मान्छेले काठमाडौं पुर्‍याइदिन्छु भनेर ल्याए,' जैसवाल भन्छन्, 'अब पुर्‍याउने हो कि नपुर्‍याउने हो ? बोकेको पैसा यतै सकिन लाग्यो । खानलाई चाउचाउ बिस्कुटबाहेक केही पाइन्न ।'

काठमाडौं हिँडेका रौतहटका पिन्टु जैसवालको पनि आफ्नै बाध्यता छ । उनी काठमाडौंमा भाडामा बस्थे । सँगै पसल पनि छ उनको । निषेधाज्ञा लगाइएपछि उनी घर फर्किएका थिए । तर, घरबेटीले भाडा माग्न थालेपछि उनी काठमाडौं हिँडेको बताउँछन् ।

'उता घरबेटीले टर्चर दिइराछ । पैसा लेउ कि सामान फाल्दिन्छु भन्छन् । आफूसँग पैसा छैन । उतै गएर अलिअलि मार्केटबाट उठाउन बाँकी पैसा उठाएर तिर्न काठमाडौं हिँडेको,' उनी भन्छन्, 'तर, हिजो रातिदेखि यहीँ छु । अब फर्काउने हुन् कि जान दिने हुन् केही थाहा छैन ।’

रातको करिब १२ बजे जिल्ला प्रशासन कार्यालय चितवनले बसहरू जहाँबाट आएका हुन् त्यहीँ फर्काउने निर्देशन दियो । त्यससँगै बसहरू फर्कन थाले । यात्रुहरू पनि फर्कन बाध्य भए ।

निशेधाज्ञाको समयमा तीन/चार गुणा महङ्गो भाडा तिरेर आएको तर, आधा बाटोबाटै घर फर्कनुपर्दा यात्रुहरू आक्रोशित भएका थिए । केही यात्रु भने जे भेटिन्छ त्यसैमा काठमाडौं जाने भन्दै बसपार्कमै बसिरहेका थिए । भाडा फिर्ता नपाएको तथा काठमाडौं नपुर्‍याएकोमा उनिहरू बस व्यवसायीसँग आक्रोशित देखिन्थे ।

जिल्ला प्रहरी कार्यालय चितवनका प्रवक्ता एवम् प्रहरी नायव उपरीक्षक सूर्य बहादुर थापाले निशेधज्ञाका कारण सार्वजनिक यातायात चल्ने व्यवस्था नभएकाले पास बिनाका सवारीलाई जहाँबाट आएको हो त्यहीँ फर्काइएको बताए ।