विदेशमा रोकिएका छन् ६० हजार नेपाली कामदार, साताको २ हजार फर्काउँदा समस्या समाधान होला ?

विदेशमा रोकिएका छन् ६० हजार नेपाली कामदार, साताको २ हजार फर्काउँदा समस्या समाधान होला ?

A+ A A-

सरकारले धेरै सङ्ख्यामा नेपाली श्रमिक रहेका मुलुकमा हवाइ उडान पुनः सञ्चालन गर्ने भएको छ । कोभिड- १९ संकट व्यवस्थापन केन्द्र (सीसीएमसी) ले बुधबार टर्की, कतार, साउदी अरेबिया, यूएई, जापान र मलेसियामा हवाइ उडान पुनः सञ्चालन गर्ने निर्णय गरेको छ ।

अन्तर्राष्ट्रिय उडान बन्द हुँदा ती देशमा रोकिएका कामदारलाई सातामा २ हजारका दरले उद्धार गर्ने निर्णय सीसीएमसीले गरेको छ । तर, परराष्ट्र मन्त्रालयका अनुसार खाडीका देश, मलेसिया, अफ्रिकी र युरोपका देशमा गरी करिब ६० हजार कामदारलाई तत्काल स्वदेश फर्काउनुपर्ने अवस्था छ । सीसीएमसी र प्रधानमन्त्री कार्यालयलाई यस विषयमा जानकारी गराइसकिएको परराष्ट्र मन्त्रालयका एक कर्मचारीले बताए ।

कोरोना भाइरसको संक्रमण बढेपछि सरकारले डेढ महिनाअघि अन्तर्राष्ट्रिय उडान बन्द गरेको थियो । उडान बन्द हुँदा स्वदेश फर्कने तयारीमा रहेका करिब ६० हजार कामदार रोजगारदाता कम्पनीमै बसिरहेको कूटनीतिक नियोगहरूले सरकारलाई जानकारी गराएका छन् ।

विदेशमा कामदार समस्यामा नपरून् भनेर सरकारले अन्तर्राष्ट्रिय उडान खुलाएर स्वदेश फर्काउने निर्णय गरेको सीसीएमसीका खगराज बरालले जानकारी दिए । रोजगारदाता देशमा रोकिएका कामदार बेखर्ची भए सरकारले क्वारेन्टाइन खर्च व्यहोर्ने र अन्तर्राष्ट्रिय उडान बन्द हुँदा रोकिएका कामदार छिट्टै स्वदेश फर्काउने वातावरण बनाउने उनको भनाइ छ ।

रोजगारादाता देशमा रोकिएका कामदारलाई स्वदेश फर्काउन कुनै अप्ठयारो नहुने र समस्या समाधान गरिने बरालले बताए ।

बेखर्ची कामदारको खर्च कहाँबाट व्यहोर्ने र र उनीहरूलाई कस्तो होटलमा क्वारेइन्टाइनमा राख्ने भन्ने बारेमा सीसीएमसीले खुलाएको छैन । खाडीका देश र मलेसियामा रहेका राजदूतहरूले सरकारलाई अन्तर्राष्ट्रिय उडान बन्द हुँदा रोकिएका कामदार फर्काउन वैकल्पिक उडान सुरु गर्न आग्रह गर्दै आएका छन् ।

कोरोनाका कारण मात्र नभई रोजगारीका क्रममा ज्यान गुमाएका, करार अवधि सकिएका, आममाफी पाएका र अन्य समस्यामा परी रोकिएका कामदार फर्काउन सरकारले सहज वातावरण बनाउनुपर्ने मलेसियाका लागि नेपाली राजदूत डा. उदयराज पाण्डेले बताए । अन्तर्राष्ट्रिय उडान बन्द हुँदा रोकिएका कामदार तत्काल स्वदेश फर्काउन सुरु नगरे अर्को समस्या सिर्जना हुन सक्ने पाण्डे बताउँछन् ।

सरकारले गत वर्ष पनि कोरोनाका कारण विदेशमा रोकिएका कामदारको चार्टर उडानमार्फत उद्धार गरेको थियो । युरोपका देश र अफ्रिकी देशमा रोकिएका कामदार टर्की हुँदै नेपाल फर्काउने सीसीएमसीले जानकारी दिएको छ ।

अफ्रिकी र युरोपका देशबाट दैनिक सय जनाभन्दा धेरै कामदार स्वदेश फर्किने गरेका थिए । भने, खाडीका देश र मलेसियाबाट सातामा ४ हजारभन्दा धेरै कामदार स्वदेश फर्किने गरेको वैदेशिक रोजगार विभागको तथ्यांक छ ।

प्रकाशित मिति: शुक्रबार, असार ४, २०७८ ०९:३५