...अनि फलामे डण्डीको सहायताले कोरोनाविरुद्धको खोपलाई खोला तारियो (भिडियोसहित)

...अनि फलामे डण्डीको सहायताले कोरोनाविरुद्धको खोपलाई खोला तारियो (भिडियोसहित)

A+ A A-

पछिल्लो समय सामाजिक सञ्जालमा कोरोनाविरुद्धको खोपलाई फलामे डण्डीको सहायतामा खोला तारिरहेको एउटा भिडियो भाइरल भएको छ । भिडियो एक दिनअघि ‘सन्देश‘ नामक ट्वीटर ह्याण्डलबाट सार्वजनिक भएको थियो । जहाँ एकातिर ‘पीपीई‘ लगाएका मान्छेले कोरोनाविरुद्धको खोप लिइरहेका छन् भने अर्कोतिरबाट दुई जनाले फलामे डण्डीमा झुण्ड्याएर उनलाई पुर्‍याइरहेका छन् ।

Hitten hard by the second wave of the #COVID-19 pandemic,#Nepal is now experiencing one of the most difficult start to the monsoon.

In this video,we can see a health worker from Lete,Mustang trying to get hold of the vaccine which,is already scarce in supply. #WeNeedVaccines pic.twitter.com/VM6AVPSpop
— .sandesh. (@srp_dr31) June 16, 2021

यो भिडियो मुस्ताङस्थित थासाङ गाउँपालिकामा पर्ने छाताङ खोलाको हो । टुकुचे स्वास्थ्य चौकीका डा. सविन केसीले कैदको दृश्यलाई सोही अस्पतालकी स्वास्थ्यकर्मी एञ्जिला थकालीले टिकटकमा राखिन् । डण्डीको सहायतामा पारिबाट पुर्‍याएको कोरोनाविरुद्धको खोपलाई वारि ल्याउने काम गरिरहेका छन् पीपीई लगाएका एक व्यक्तिले । ती पीपीई लगाएका व्यक्ति पोवाङका स्वास्थ्य चौकीका लालबहादुर रोका हुन् । र, पारिबाट डण्डीमा राखेर भ्याक्सिन पुर्‍याइरहेका व्यक्ति हुन् एम्बुलेन्स चालक गवन विक ।

अविरल वर्षाका कारण खोलामा पानीको सतह बढेको छ । आवतजावत गर्नलाई पुल छैन । त्यसैले सवारीसाधन वारपार गर्न सकिरहेका छैनन् । बर्खाको समय भएकाले पनि त्यति सहज स्थिति त्यहाँ छैन । त्यसैले सवारीसाधन पारिबाट वारि आउन नसकेपछि टुकुचे र पोवाङ स्वास्थ्य चौकीका लागि पठाइएको कोरोनाविरुद्धको खोपलाई डण्डीको सहायतामै खोला पार गराइयो ।

पहिलो डोज खोप लगाइसकेकालाई ५५ वर्षमाथि उमेर समूहका नागरिकलाई असार १ र २ गतेभित्र दोस्रो डोज लगाइसक्नुपर्ने बाध्यता थियो । त्यसैले जसरी हुन्छ गाउँमा कोरोनाविरुद्धको खोप पुर्‍याउन उनीहरू लागि परे । स्वास्थ्यकर्मी एञ्जिलाका अनुसार गाउँमा ‘कोल्ड स्टोर‘ नभएकाले खोपलाई जिल्ला सदरमुकाममा रहेको लेटे प्राथमिक स्वास्थ्य चौकीमा राखिएको थियो । १ असारमा गाउँपालिकाका एम्बुलेन्स चालक गवन विकमार्फत खोप मगाइयो । तर, लेटे र कोवाङको सीमानामा पर्ने छाताङ खोलामा पानीको सतह बढेपछि एम्बुलेन्स खोला तर्न सकेन ।

त्यसपछि टुकुचे र पोवाङ स्वास्थ्य चौकीबाट लालबहादुर रोका र सविन केसी खोप लिन खोलासम्म पुगे । तर, खोप तार्न सोचेजति सहज भएन । पहिला त उनीहरूले अलि दह्रो बाँस खोजे । भरपर्दो कुनै चिज नभेटेपछि नजिकै पुल बनाइरहेको स्थानबाट फलामे डण्डी मागे र त्यसैको सहायताले खोपलाई पारिबाट वारिसम्म ल्याए ।

त्यसरी टुकुचे र पोवाङ स्वास्थ्य चौकीमा पुर्‍याइएको ६-६ भाइल खोप स्थानीयलाई लगाइएको स्वास्थ्यकर्मी थकालीले जानकारी दिइन् ।

प्रकाशित मिति: बिहीबार, असार ३, २०७८ १८:०६