चीनबाट ४० लाख खोप खरिद गर्ने निर्णय : दुई हप्ताभित्र १० लाख डोज, बाँकी ५-५ लाखका दरले ल्याउने

चीनबाट ४० लाख खोप खरिद गर्ने निर्णय : दुई हप्ताभित्र १० लाख डोज, बाँकी ५-५ लाखका दरले ल्याउने

A+ A A-

सरकारले चीनबाट ४० लाख खोप खरिद गर्ने निर्णय गरेको छ । बुधबार कोभिड-१९ संकट व्यवस्थापन केन्द्रको बैठकमा प्रधानमन्त्री केपी ओलीले चीनको सिनोफार्म कम्पनीसँग ४० लाख खोप खरिद गर्ने निर्णय भएको बताएका हुन् ।

‘सिनोफार्मले दिन सक्ने भनेको छ । दुई हप्ताभित्र १० लाख त्यसपछि हरेक हप्ता ५–५ लाखका दरले ३० लाख दिन सक्ने भनेको छ,’ संकट व्यवस्थापन केन्द्रका प्रमुख बालानन्द शर्माले शिलापत्रसँग भने, ‘खरिदको सहमति स्वास्थ्य मन्त्रालयले गर्नेछ ।’

सिनोफार्मसँग नगदमै खरिद गर्न लागिएको उनले बताए । यद्यपि, कति मूल्यमा खोप ल्याउन लागिएको हो भन्नेबारे भने खुलाइएको छैन । चीनले मूल्य गोप्य राख्न भनेकाले सोहीअनुसार सरकारले खोप खरिद गर्न लागेको हो । यसअघि चीनले १८ लाख डोज भेरोसिल खोप नेपाललाई अनुदानमा दिएको थियो ।

स्वास्थ्य तथा जनसंख्यामन्त्री शेरबहादुर तामाङले पनि खोपका विषयमा एक हप्ताभित्र ठोस निर्णय आउने बताए । ‘सबै देशमा प्रक्रिया अगाडि बढाएका छौँ । एक हप्ताभित्र ठोस निर्णय आउँछ,’ उनले भने, ‘जनतालाई खोप लगाउने कुरामा सरकार लागिपरेको छ ।’

हालसम्म कति आयो खोप ?

नेपालमा हालसम्म ४२ लाख ३८ हजार खोप आएको छ । जसमध्ये भारतबाट कोभिसिल्ड खोप १० लाख, चीनबाट भेरोसेल १८ लाख, खरिद गरेको कोभिसिल्ड १० लाख, नेपाली सेनालाई आएको कोभिसिल्ड १ लाख र कोभ्याक्सबाट ३ लाख ८४ हजार खोप नेपालमा आएको छ ।

स्वास्थ्य मन्त्रालयका अनुसार हालसम्म २४ लाख ३८ हजार १ सय २७ जनाले पहिलो मात्रा र ६ लाख ९१ हजार ४ सय ९४ जनाले दोस्रो मात्रा खोप लगाएका छन् ।

पहिलो मात्रा कोभिसिल्ड खोप लगाएका १४ लाख नागरिकले दोस्रो मात्रा लगाउन पाएका छैनन् । सिरमले खरिद गरेको १० लाख डोज खोप नपठाउँदा १४ लाख नागरिक दोस्रो मात्रा लगाउनबाट वञ्चित भएका हुन् ।

भारतमा संक्रमण बढेको र कम्पनीमा आगलागी भएको कारण देखाउँदै खोप नपठाएको हो । खरिद गरेको खोपमा नेपालले कम्पनीलाई ८० प्रतिशत रकम भुक्तानी गरिसकेको छ । सिरमले तत्काल पठाउन नसक्ने बताएपछि कोभ्याक्सबाट एस्ट्राजेनिकाको खोप ल्याएर कोभिसिल्ड पहिलो मात्रा लगाएकालाई दोस्रो मात्रा लगाउने सरकारको योजना छ ।

कोभ्याक्सले पनि कोभिसिल्डको विकल्पमा जान नेपाललाई पत्र पठाएको थियो । नेपालले कोभिसिल्डको विकल्प एस्ट्राजेनिकाको खोप उपलब्ध गराउन जवाफ पठाइसकेको छ ।

‘१४ लाखको लागि एस्ट्राजेनिकाको र बाँकी जुन खोप भए पनि हुन्छ भनेर पत्र पठाएको छ,’ मन्त्रालयको खोप विज्ञ सल्लाहकार समितिका संयोजक डा. श्यामराज उप्रेतीले भने, ‘२ देखि ८ डिग्रीसम्म भण्डारण गर्न मिल्ने र डब्लूएचओले सिफारिस गरेको खोप जुन भए पनि हुन्छ ।’ कोभ्याक्सले एस्ट्राजेनिका, नोभोभ्याक्स, फाइजर, मोर्डर्ना, स्पुतनिक भी, जोन्सन एन्ड जोन्सनमध्ये एउटा खोप रोज्ने भनेको थियो । कोभ्याक्सले २० प्रतिशत नागरिकका लागि खोप दिनेछ ।

प्रकाशित मिति: बिहीबार, असार ३, २०७८ १३:२१