अस्पतालमा खाली हुन थाले काेभिड संक्रमित राखिएका बेड, आईसीयू र भेन्टिलेटर अझै भरिभराउ

अस्पतालमा खाली हुन थाले काेभिड संक्रमित राखिएका बेड, आईसीयू र भेन्टिलेटर अझै भरिभराउ

A+ A A-

कोभिड-१९ काे संक्रमण दर ओरालो लागेसँगै यतिखेर वीर अस्पतालको इमर्जेन्सी वार्ड ननकोभिड संक्रमितले भरिन थालेको छ ।

‘बिरामीको चाप ५० प्रतिशतले नै घटेको छ’, वीर अस्पतालका प्रवक्ता डा. अच्युत कार्की भन्छन्, ‘इमर्जेन्सी अहिले कोभिडभन्दा बढी ननकोभिडले भरिन थालेको छ ।’

हुन पनि कुनै समय अत्यधिक २०० सम्म काेराेना संक्रमितकाे उपचार गराएको वीर अस्पतालमा हाल १०० जनाको उपचार भइरहेको छ । त्यति मात्रै नभएर वीर अस्पतालमा हाल भर्ना हुनेभन्दा डिस्चार्ज हुने दर बढेको छ । अस्पतालमा हाल दैनिक ४/५ जनासम्म भर्ना भइरहेका छन् भने दैनिक ८/९ जनासम्म डिस्चार्ज भइरहेको डा. कार्की बताउँछन् ।

दुई हप्ताअघिसम्म संक्रमितको भिडले भरिभराउ हुने अस्पतालहरू यतिखेर शान्त देखिन थालेका छन् ।

खाली हुँदै टेकु अस्पतालको इमर्जेन्सी वार्ड ।

अक्सिजन र बेडको अभावमा इमर्जेन्सी वार्डले नपुगेर कोरिडोर, आँगन र पार्किङमा समेत बिरामी राख्न बाध्य भएको शुक्रराज ट्रपिकल तथा सरुवा रोग टेकु अस्पताल प्राङ्गणसमेत शान्त देखिन्छ । त्यस्तै, टिचिङको प्यासेजमा लामवद्ध संक्रमित र कुरुवाको चहलपहल पनि हराएको छ । एफीएफ, पाटनलगायत अधिकांश कोभिडकेन्द्रित अस्पतालमा यतिखेर संक्रमण घटेको पाइन्छ ।

घट्दो संक्रमण दरले कोरोना महामारीको दोस्रो लहर सँघारमा आइपुगेको संकेत दिएको अधिकांश अस्पतालहरू ठान्छन् । यही दरले अस्पतालमा संक्रमण दर घट्न थालेमा दुई/तीन हप्तासम्ममा अस्पतालहरू खाली हुने चिकित्सकहरूको भनाइ छ ।

त्यसो त दुई साताअघिसम्म ३० प्रतिशत रहेको संक्रमण दर हाल घटेर १९.०४ मा झरेकाे छ । उपत्यका मात्रै नभएर बाह्य जिल्लाका अस्पतालहरूमा पनि संक्रमण घटेको छ । कोभिड–१९ को दोस्रो लहरको केन्द्रविन्दु बन्न पुगेको भेरी कोभिड अस्पतालले संक्रमितको चाप घटेसँगै गत हप्तादेखि ओपीडी सेवासमेत पुनः सुरु गरेको छ ।

हुन पनि कुनै समय अधिकतम १३२ संक्रमितको उपचार गराउँदै आएको टेकु अस्पतालले हाल ८५ जनाको उपचार गराइरहेको छ । ६० बेड क्षमता रहेको यो अस्पतालले रातारात बेड शय्या थपेर संकट व्यवस्थापन गरेको थियो ।

उपत्यकाका अस्पतालहरूमा संक्रमितको चाप वास्तवमै घटेको हो भन्ने बलियो प्रमाण हो, टिचिङ अस्पताल ।

खाली हुँदै टिचिङ अस्पतालको इमर्जेन्सी वार्ड ।

दैनिक ४० देखि ५० जना नयाँ संक्रमित आउने यस अस्पतालमा हिजोआज १०/१२ जना मात्रै नयाँ बिरामी आइरहेका छन् । ननकोभिड वार्डलाई समेत कोभिड बनाई सञ्चालन गरिएको यस अस्पतालमा कोभिडका लागि छुट्याइएकोमा ३७६ बेडमा हाल २०० भन्दा बढी बेड खाली हुन पुगेको छ । अत्यधिक संक्रमणको समयमा ३७० जनासम्मको उपचार गरेको यस अस्पतालमा हाल संख्या घटेर १३५ मा झरेको छ ।

त्यस्तै, एपीएफ अस्पतालमा पनि कोभिडका अधिकतम २०० जनासम्मको उपचार गराइरहेको अवस्थामा हाल संख्या घटेर १०० जना रहेकाे अस्पतालका प्रवक्ता डा. प्रविन नेपाल बताउँछन् । दैनिक ३० जना नयाँ बिरामी लिँदै आएकोमा हाल मुस्किलले ५/६ जनासम्म नयाँ संक्रमित आउने गरेको उनले बताए । भन्छन्, ‘डिस्चार्ज हुने दर पनि बढेको छ ।’

पाटन अस्पतालमा पनि अन्य अस्पतालमा जस्तै संक्रमितको संख्या घटिरहेको अस्पतालका प्रवक्ता डा. रवि शाक्यले जानकारी दिए । उनले भने, ‘अहिले हामीसँग करिब १५० जना बिरामीको उपचार भइरहेको छ ।’ दैनिक ओपीडीमा आउने कोभिड बिरामीको फ्लो पनि घटेको उनले बताए ।

सुनसान टिचिङ प्राङ्गण ।

आईसीयू र भेन्टिलेटरचाहिँ भरिभराउ

बिरामीको टर्न ओभर हुन समय लाग्नु कोरोना महामारीको दोस्रो लहरमा देखिएको उल्लेखनीय परिवर्तन हो । तुलनात्मक हिसाबमा रोग प्रतिरोधात्मक क्षमता बढी रहने उमेर समूहका युवाहरू नै बढी संक्रमित भए पनि आईसीयू र भेन्टिलेटरका सिकिस्त बिरामी निको हुन समय लागिरहेको छ ।

टेकु अस्पतालका निर्देशक डा. सागरराज भण्डारी भन्छन्, ‘उपचार गराइरहेका बिरामीको संक्रमण परीक्षण नेगेटिभ नै आए पनि कोभिड निमाेनियाले आक्रान्त पारेको फोक्सोले काम गर्न नसकेकाले अक्सिजन सप्लाई छोड्न मिल्दैन ।’ यसैले गर्दा संक्रमणमुक्त हुँदाहुँदै पनि बिरामीहरूले अस्पताल छोड्न सकिरहेका छैनन् ।

डा. सागरको भनाइमा एक जना बिरामी सरदर ३ देखि ५ हप्ता अस्पतालमा बसी उपचार गराइरहेकाले हालसम्म पनि उपत्यकाका अधिकांश आईसीयूहरूमा बिरामीको चाप घट्न सकेको छैन ।

इमर्जेन्सी र वार्डमा कोभिड संक्रमितको चाप घटे पनि सिकिस्त बिरामीको संख्या भने नघटेको अधिकांश अस्पतालहरूको भनाइ छ । इमर्जेन्सी, पीसीआर गर्न आउने बिरामी र पोजेटिभ हुने दर घटेको नै भए पनि हाल उपत्यकाका अस्पतालहरूमा आईसीयू र भेन्टिलेटरमा भने बिरामी यथावत् नै छन् ।

इमर्जेन्सीमा नयाँ बिरामीको संख्या निकै नै घटे पनि अन्य सिकिस्त र पुराना बिरामी यथावतै रहेकाे टिचिङ अस्पतालका प्रवक्ता सन्तकुमार दासले बताए । टिचिङमा मात्रै नभएर टेकु, वीर, एपीएफ, पाटन अस्पतालमा पनि सिकिस्त बिरामीको चाप भने घटेको छैन । आईसीयू र भेन्टिलेटरमा बिरामी भरिभराउ नै छन् ।

अरु त अरु, उपत्यकाका निजी अस्पतालमा पनि सोही दृश्य छ । मेडिसिटी अस्पतालले पनि संक्रमण ओरालो लागे पनि आईसीयू भने भरिएको जनाएको छ ।

यद्यपि, पछिल्लो एक महिनामा आईसीयू चाहिने कोरोनाका सिकिस्त बिरामीको संख्यामा ३२ प्रतिशतले कमी आएको स्वास्थ्य तथा जनसंख्या मन्त्रालयले जनाएको छ ।

यसरी अस्पतालमा नयाँ बिरामीको संख्या घटेकै भरमा समुदाय स्तरमा पनि संक्रमण घटेको ठोकुवा भने गर्न नसकिने चिकित्सकहरूको भनाइ छ ।

सुनसान वीर प्राङ्गण ।

जोखिम भने कायमै

गाउँगाउँबाट बिरामीहरू फाट्टफुट्ट आउने क्रम जारी रहेकाले तत्कालै संक्रमण घटेको यकिन गर्न नसकिने उनीहरूको भनाइ छ । यद्यपि, निषेधाज्ञाको स्वतस्फुर्त असर अस्पतालमा देखिएको हुन सक्ने अधिकांश चिकित्सकको आकलन छ ।

टेकुका डा. सागरका अनुसार संक्रमणको उत्कर्षबाट हामी विस्तारै स्थिर हुँदै ओरालो लाग्दै गरेको अनुमान गर्न सक्छौँ । त्यसो त हाल स्थानीय तहमा भइरहेको पीसीआर, एन्टिजेन परीक्षण एवम् स्थानीय ओइसोलेसन वार्डका कारण पनि प्रमुख अस्पतालमा संक्रमितको चाप घटेको हुन सक्ने अनुमान लगाउन सकिन्छ ।

निषेधाज्ञाले गर्दा हाललाई ‘चेन ब्रेक’ भएको हुन सक्ने अनुमान गर्न सकिए पनि मापदण्डबिना निषेधाज्ञा खुकुलो हुनासाथै फेरि जोखिम बढ्न सक्ने चिकित्सकहरूको चेतावनी छ ।

प्रकाशित मिति: बिहीबार, असार ३, २०७८ १३:४९