हिरासतमा राखेको ४ महिनापछि म्यानमारकी नेतृ सू चीमाथिका अभियोगमा सुनुवाइ सुरु

हिरासतमा राखेको ४ महिनापछि म्यानमारकी नेतृ सू चीमाथिका अभियोगमा सुनुवाइ सुरु

A+ A A-

म्यानमारकी प्रजातन्त्रवादी नेतृ आङ सान सू चीलाई नियन्त्रणमा राखिएको चार महिनाभन्दा बढी समयपछि अदालतमा सुनुवाइका लागि लगिएको छ ।

उनका विरुद्धमा लगाइएका आरोपमाथि सोमवारदेखि सुनुवाइ सुरु भएको सरकारी अधिकारीहरूले जानकारी दिएका छन् । सत्ता नियन्त्रणमा लिएको म्यानमारको सेनाले ७५ वर्षीया नेतृ सू चीलाई अनियमितता गरेको लगायतका विभिन्न आरोप लगाएको छ ।

उनीसँगै अन्य नेता तथा उच्च अधिकारीहरूलाई पनि सैन्य सरकारले विभिन्न मुद्दा लगाएको छ । मंगलबार हुने सुनुवाइमा नेशनल लिग फर डेमोक्रेसी (एनएलडी)का नेताहरू पनि उपस्थित हुने जनाइएको छ ।

'हामीले अनावश्यक रूपमा यो झमेला झेलिरहनु परेको छ, त्यसविरुद्धमा हामीले राम्रो तयारी गरेका छौँ,' नेतृ सू चीका एक वकिल खिन मौङ जावले भने । नेतृ सू चीले देश, जनता र प्रजातन्त्रका लागि गरेको योगदान र संघर्षका विरुद्धमा दाग लगाउन सैनिक सरकारले अनेक आरोपहरू लगाएको उनले टिप्पणी गरे ।

म्यानमारको जुन्ता सरकारले गत हप्ता पनि नेतृ सू चीका विरुद्धमा नयाँ आरोपहरूसहितको मुद्दा दर्ता गरेको थियो । म्यानमारमा गत १ फेब्रअरीमा सेनाले विभिन्न दलका नेता तथा सरकारका उच्च अधिकारीहरूलाई नियन्त्रणमा लिएको थियो । नेताहरूलाई हिरासतमा राखेर सेनाले सत्ता नियन्त्रणमा लिएको घोषणा गरेको थियो ।

सेनाले सत्ता हातमा लिएसँगै म्यानमारमा अहिलेसम्म पनि नागरिक आन्दोलन भइरहेको छ । आन्दोलनका क्रममा अहिलेसम्म ८४० भन्दा बढीको मृत्यु भइसकेको छ भने अरु सयौँ घाइते भएका छन् । सुरक्षाकर्मीहरूले दर्जनौँ आन्दोलनकारीहरूलाई नियन्त्रणमा लिएको छ भने कैयौँको खोजी भइरहेको जनाएको छ ।

गत नोभेम्बरमा भएको निर्वाचनमा अपेक्षित नतिजा आफ्नो पक्षमा नआएपछि सेनाले निर्वाचनमा धाँधली भएको भन्दै असन्तुष्टि जनाउँदै आएको थियो । त्यही असन्तुष्टिको पृष्ठभूमिका नयाँ संसदको बैठक बस्ने अघिल्लो रात सेनाले सत्ता नियन्त्रणमा लिएको हो ।

सेनाले गत निर्वाचन धाँधलीपूर्ण भएकाले चाँडै नै निष्पक्ष निर्वाचन आफ्नो सरकारले गराउने र सत्ता छोड्ने दावी गरेको छ । निर्वाचनका लागि भन्दै जुन्ता सरकारले एकवर्षे संकटकाल पनि घोषणा गरेको छ । सेनाको दावीप्रति आमनागरिक र विश्व समुदायले आपत्ति जनाउँदै आएका छन् । उनीहरूले तत्काल लोकतान्त्रिक प्रक्रियाबाट आएका नेताहरूलाई नै सत्ता हस्तान्तरण गर्न माग गर्दै आएका छन् ।

प्रकाशित मिति: सोमबार, जेठ ३१, २०७८ १९:२१