खाडीका देशमा विदेशी श्रमिकलाई चर्को घाममा काम लगाउन नपाइने, नेपालीलाई पनि सजिलो हुने

खाडीका देशमा विदेशी श्रमिकलाई चर्को घाममा काम लगाउन नपाइने, नेपालीलाई पनि सजिलो हुने

A+ A A-

खाडीका देशका रोजगादाता कम्पनीले विदेशी कामदारलाई चर्को घाममा काम लगाउन नपाउने भएका छन् । साउदी अरब, कतार, कुवेत, ओमान र बहारइनले ३२ डिग्रीभन्दा बढी तापक्रममा विदेशी कामदारलाई काम लगाउने रोजगारदाता कम्पनीलाई कारबाही गर्ने कानुन बनाइ लागू गरेका छन् ।

साउदी, कतार र कुवेतले चर्को घाममा काम लगाउने कम्पनीमाथि कारबाही सुरु गरेको गल्फ न्युजले जनाएको छ ।

यो नियमले नेपाली कामदारहरूलाई पनि फाइदा पुग्ने र उनीहरू बढी सुरक्षित हुने ती देशका नेपाली दूतावासहरूले बताएका छन् ।

कतार

कतारले विदेशी कामदारलाई ३२ डिग्रीभन्दा बढी तापक्रमको घाम भएको ठाउँमा खुला रूपमा काम गर्न प्रतिबन्ध लगाएको छ । कामदारको स्वास्थ्य सुरक्षाका लागि आवश्यक सामाग्री कार्यस्थलमा अनिवार्य हुनुपर्ने नियम लागू गरेको कतारको प्रशासनिक विकास, श्रम तथा सामाजिक सुरक्षा मामिला मन्त्रालयले विज्ञाप्तिमार्फत जानकारी गराएको छ ।

कतारले गत साता सूचना जारी गरी गर्मी महिनामा खुला ठाउँमा बिहान १० बजेदेखि दिउँसो साढे ३ बजेसम्म काम गर्न प्रतिबन्ध लगाएको जनाएको छ । सन् २००७ मा भएको निर्णय कार्यान्वयन गरिएको र अनिवार्य लागू गर्न रोजगारदाता कम्पनीलाई निर्देशन गरेको मन्त्रालयले जनाएको छ ।

२००७ मा श्रमिकलाई गर्मीयाममा घाम नभएको ठाउँमा मात्र काममा लगाउन पाउने नियम बनाइए पनि कार्यान्वयन भएको थिएन । गर्मीमा काममा लगाउँदा श्रमिकको लुगा हावा छिर्ने पारदर्शी र खुकुलो हुनुपर्ने तथा काम लगाउनुअघि मेडिकल रिपोर्ट अनिवार्य हुनुपर्ने नियम छ । गर्मी महिनालाई ध्यानमा राख्दै श्रमिकले लगाउने लुगादेखि वार्षिक रुपमा निःशुल्क स्वास्थ्य सुविधा उपलब्ध गराउन पनि भनिएको छ ।

कतारले सन् २०२२ मा विश्वकप फुटबलको आयोजना गर्दै छ । विश्वकपअघि नै कतारले विदेशी कामदारको सेवा–सुविधा र सुरक्षामा ध्यान दिएको हो ।

हाल कतारमा ४ लाखभन्दा धेरै नेपाली कामदार कार्यरत छन् । जसमध्ये ७० प्रतिशत निर्माण क्षेत्रमा कार्यरत रहेको कतारस्थित नेपाली दूतावासले जानकारी दिएको छ । कतारले विदेशी कामदारलक्षित नियम बनाउँदा नेपाली श्रमिक पनि प्रभावित हुने गरेका कतारका लागि नेपाली राजदूत डा. नारद भारद्वाजले बताए । कतारले विदेशी कामदारको सुविधा फराकिलो बनाइरहेको र पारिश्रमिक पनि समय सापेक्ष भइरहेको उनको भनाइ छ ।

साउदी अरब

साउदी अरबको मानव संसाधन तथा सामाजिक विकास मन्त्रालयले तीन महिनासम्मको लागि दिउँसोको घाममा श्रमिकलाई काममा नलगाउन रोजगारदाता कम्पनीलाई निर्देशन दिएको छ ।

अत्यधिक गर्मी बढेसँगै विदशी कामदारलाई मध्यदिउँसोको घाममा काममा नलगाउन निर्देशन दिँदै लगाइएको पाइए श्रम ऐनअनुसार कारबाही गर्ने जनाएको छ ।

१५ जूनदेखि १५ सेप्टेम्बरसम्म दिउँसो १२ देखि ३ बजेसम्म श्रमिकलाई काम लगाउन प्रतिबन्ध लगाएको मन्त्रालयले जनाएको छ । साउदीमा भण्डै ४ लाख नेपाली कार्यरत छन् । तीमध्ये ८० प्रतिशत श्रमिक निर्माण क्षेत्रमा काम गर्छन् ।

कुवेत

कुवेतका रोजगारदाता कम्पनीले विदेशी श्रमिकलाई चर्को घाममा काममा लगाउन नपाउने भएका छन् । कुवेतस्थित पब्लिक अथोरिटी फर म्यानपावर (पीएएम) ले दुई हप्ताअघि यो निर्णय गरेको थियो । पीएएमको यो निर्णय १ जुनदेखि ३१ अगस्टसम्म लागू हुनेछ । निर्णयअनुसार बिहान ११ बजेदेखि बेलुका ४ बजेसम्म प्रत्यक्ष रूपमा सूर्यको किरण पर्ने खुल्ला क्षेत्रमा कामदारलाई काम गर्न बाध्य बनाउन पाइने छैन ।

कुवेतले मध्य घाममा काम लगाउने रोजगादाता कम्पनीलाई कारबाही गर्न सुरु गरेको छ । त्यस्ता ७० वटा रोजगारदाता कम्पनीलाई कारबाही गरेको ह्युमन राइट्सलाई उद्धृत गर्दै गल्फ न्युजले जनाएको छ ।

हाल कुवेतमा ७० हजारभन्दा धेरै नेपाली श्रमिक कार्यरत रहेको कुवेतस्थित नेपाली दूतावासले जनाएको छ । कुवेतमा पनि धेरै नेपाली निर्माण क्षेत्रमा कार्यरत रहेको दूतावासले जनाएको छ ।

यूएई, ओमान र बहराइनले भने दुई वर्षअघि नै चर्को घाममा विदेशी कामदारलाई काम लगाउन नपाउने नियम लागू गरेका छन् । यी देशमा चर्को घाममा काम लगाउने रोजगारदाता कम्पनीलाई जरिवाना हुने गरेको छ ।

हाल खाडीका देशमा करिब १५–१७ लाख नेपाली श्रमिक कार्यरत रहेको श्रम, रोजगार तथा सामाजिक सुरक्षा मन्त्रालयको अनुमान छ ।

प्रकाशित मिति: मंगलबार, असार १, २०७८ ०९:१३