बाख्रा चराउन गएका पाँच बालिका, जो नुहाउन पोखरीमा पसे तर निस्कन पाएनन्

A+ A A-

धनुषाको मुखियापट्टी मुसहरनियाँ गाउँपालिका- ६ की १२ वर्षीया लक्ष्मीनिया यादव शुक्रबार बिहान करिब ८ बजेतिर घरबाट बाख्रा चराउन निस्केकी थिइन् । गाउँकै एक बोर्डिङ स्कुलमा कक्षा ५ मा पढ्ने उनी बाख्रा चराउन जानुभन्दा केही बेरअघि मात्र ट्युसन पढेर आएकी थिइन् ।

ट्युसनबाट फर्केपछि लक्ष्मिनियाले रोटी र तरकारी खाइन् । अनि बाख्रा चराउन हिँडिन् ।

बाटोमा बाख्रा चराउँदै गरेका गाउँका अरु साथीहरू भेटिए । लक्ष्मीनियासँगै उनका साथीहरू १० वर्षीया चन्द्रकुमारी भगत, १३ वर्षीया मञ्जु पूर्वे, १२ वर्षीया चान्दनी ठाकुर र १२ वर्षीया ललिता साह तथा अरु तीन जना बालक मिलेर बाख्रा चराउन थाले ।

लक्ष्मीनियाका हजुरबुबा रामलक्ष्मण यादवका अनुसार उनीहरू प्राय त्यतैतिरको चौरमा बाख्रा चराउन जान्थे । र, दिउँसो पोखरीमा नुहाउने गर्थे ।

उनीहरूसँगै रहेका बालकहरूका अनुसार शुक्रबार दिउँसो करिब १२ बजे लक्ष्मीनियासँगै उनका अरु चार जना साथी नुहाउनका लागि पोखरीमा हाम फाले । तर, केहीबेरसम्म उनीहरूको अत्तोपत्तो देखिएन ।

पोखरीको डिलमा रहेका बालकले पटक-पटक उनीहरूलाई बोलाए । तर, पनि पोखरीमा हाम फालेका युवतीको अत्तोपत्तो लगाउन सकेनन् ।

स्थानीका अनुसार उनीहरूको अत्तोपत्तो नदेखेपछि बालकहरू आत्तिए । चिच्याउँदै मानिसहरू बोलाउन गाउँतर्फ दौडिए ।

लम्क्ष्मीनियाका हजुरबुवा रामलक्ष्मणका अनुसार बालिकाहरू हाम फालेलगत्तै अरु तीन जना बालकमध्ये दुई जना पनि पोखरीमा हाम फालेका थिए । तर, उनीहरू डुब्न लागेको देखेर अर्का एक जनाले हात तानेर तुरन्तै उनीहरुको उद्धार गरेका थिए ।

बालिकाहरू डुबेको करिब २५ मिनेटपछि बालकहरू आत्तिँदै बोलाएपछि गाउँलेहरू पोखरीमा आए । त्यतीन्जेल पाँचैजना बालिकाको शव पोखरीमा तैरिरहेको थियो ।

स्थानीय हुलास यादवले माछा पालनका लागि पोखरी खन्न थालेका थिए । तर, दाजुभाइबीचको विवादले पोखरी खन्न रोकिएको उनका बाबु परीक्षण यादवले बताए । ‘अंशवण्डा गरेपछि मात्र पोखरी खन्न दिने दिनेशले अडान लिएपछि ३/४ दिन खनेर छोडियो,’ उनले भने । उक्त पोखरीमा वर्षाको पानी जमेको थियो ।

धनुषाका प्रहरी प्रवक्ता डीएसपी मकेन्द्र मिश्र डुबेर मृत्यु भएका बालिकाहरू बाख्रा चराउन जाँदा प्राय त्यहाँ नुहाउन जाने गरेको बताउँछन् । ‘पोखरीको पूर्वपट्टी कम्मरसम्म डुब्ने खाल्डो थियो । तर, पश्चिमतिर भने १० फिटसम्म खाल्डो खनिएको छ,’ डीएसपी मिश्रले भने, ‘पहिले पूर्वपट्टी नुहाउँथे होला तर आज सायद गहिरो खाल्डोमा पुगेछन् । नयाँ खनिएकाले हिलाम्मे माटोमा खुट्टा फसेको हुनसक्छ ।’

मृतक पाँचै जना बालिकाको शव पोष्टमार्टमका लागि प्रादेशिक अस्पताल जनकपुरमा राखिएको छ । घटनाबारे थप अनुसन्धान जारी रहेको डीएसपी मिश्रले बताए ।

शोकमा गाउँ

एकै पटक पाँच जना बालिकाहरूको मृत्युले गाउँ शोकमा छ । आफन्त पीडामा छन् । छिमेकीहरू सम्झाइबुझाइ गरिरहेका छन् ।

‘तीनजना छोरामा एउटै नातीनी थिइन् । पढाएर ठूलो बनाउँछु सोचेको थिएँ । तर यस्तो भयो,’ रामलक्ष्मणले भने ।

मृतक सबै बालिकाको परिवारको आर्थिक स्थिती कमजोर छ । ती बालिकाका आमाबुबा दैनिक मजदुरी गरेर गुजारा गर्दै आएका छन् । स्थानीय राजेन्द्र यादवका अनुसार कोरोनाका कारण विद्यालय बन्द भएपछि परिवारले बालिकाहरूलाई परिवारले बाख्रा चराउन पठाउने गरेका थिए । ‘सबै गरिब छन् । उनीहरूका आमाबुबा आफू मजदुरी गर्न जाने र छोराछोरीलाई बाख्रा चराउन पठाउथे,’ उनले भने ।

मृतक परिवारलाई प्रदेश २ सरकारले एक/एक लाख रुपैयाँ राहत दिने घोषणा गरेको छ । भौतिक पूर्वाधार तथा विकासमन्त्री रामसरोज यादवले मृतक परिवार भेट्न अस्पताल जाँदा एक/एक लाख दिने घोषणा गरेका हुन् ।