एसईईका ५१ लाख ७४ हजार 'सेट' प्रश्नपत्र के गर्ने ? शिक्षाविद् भन्छन्– स्कुलस्कुलमा पुर्‍याइदिँदा राम्रो हुन्छ

एसईईका ५१ लाख ७४ हजार 'सेट' प्रश्नपत्र के गर्ने ? शिक्षाविद् भन्छन्– स्कुलस्कुलमा पुर्‍याइदिँदा राम्रो हुन्छ

A+ A A-

यस वर्ष एसईईका लागि भनेर ५१ लाख ७४ हजार सेट प्रश्नपत्र छापिएका थिए । परीक्षा नियन्त्रण कार्यालयका लेखा अधिकृत किसन बस्यालका अनुसार ती प्रश्नपत्र छपाइमा भ्याटसहित २ करोड २८ लाख रुपैयाँ खर्च भएको छ ।

उत्तरपुस्तिका भने प्रदेश सरकारले नै छाप्ने भएकाले त्यसको खर्च विवरण आफूसँग नभएको उनले बताए । ‘प्रश्नपत्रबाहेकका उत्तरपुस्तिकालगायतका अन्य खर्च प्रदेश सरकारको हो,' उनले भने, ‘यसबारे हामीलाई जानकारी आएको छैन ।'

तर, अहिले ५ लाख ५० हजार विद्यार्थीका लागि छापिएका ५१ लाख ७४ हजार सेट प्रश्नपत्र अलपत्र छन् । कारण, कोरोना महामारीले गर्दा सरकारले आन्तरिक मूल्यांकनबाटै नतिजा सार्वजनिक गर्ने निर्णय गरिसकेको छ । र, ती प्रश्नपत्रको व्यवस्थापनबारे बोर्डले कुनै निर्णय गरेको छैन ।

गतसाल भने एसईई स्थगित भएसँगै छापिएका प्रश्नपत्र जलाएर नष्ट गरियो । त्यसैले यसपालि पनि प्रश्नपत्र जलाइने हो कि भन्ने शंका गर्छन्, सरोकारवालाहरू । यद्यपि, गतसाल परीक्षा केन्द्रहरूमा प्रश्नपत्र पुगिसकेको अवस्था थियो भने यसवर्ष भने पुग्न पाएन ।

परीक्षा नियन्त्रक रुद्र अधिकारी भने राष्ट्रिय परीक्षा बोर्डको निर्देशन नआएकाले प्रश्नपत्रलाई केही नगरेको बताउँछन् । ‘हामीले बोर्डको आदेश कार्यान्वयन गर्ने मात्र हो,' उनले भने, ‘अहिलेसम्म बोर्डले केही नभनेकाले प्रश्नपत्र जस्ताको तस्तै छन् ।'

राष्ट्रिय परीक्षा बोर्डका अध्यक्ष चन्द्रमणि पौडेल भने यसबारे छलफल गरेर छिट्टै टुङ्गो लगाउने बताउँछन् । हालसम्म केही निर्णय नगरिएको र आफूहरू छलफलमै रहेको उनले शिलापत्रलाई बताए । ‘हामीहरू यस विषयमा छलफलमै छौँ । छलफलपश्चात् के गर्ने भनेर टुङ्गो लगाउँछौँ', उनले भने ।

ती प्रश्नपत्रलाई के गर्ने त ?

गतसालको जस्तो प्रश्नपत्र जलाइनु नहुने तर्क गर्छन्, शिक्षाविद् सुरेशराज शर्मा ।

'गतसाल त बुद्धि नपुर्‍याएर धेरै ठाउँमा जलाएको भन्ने सुनियो,' उनले भने, ‘तर, त्यसरी जलाउँदा विद्यार्थीलाई न्याय गर्दैन । त्यसका लागि पनि उनीहरूले शुल्क तिरेका हुन्छन् ।'

जसरी अहिले पुस्तकहरू पुर्‍याइरहेका छन्, त्यहीसँगै स्कुलस्कुलमा प्रश्नपत्र पुर्‍याइदिँदा राम्रो हुने उनको सुझाव छ ।

स्कुलहरूले पनि सम्भव हुनेजति ८/१० वटा विद्यालयबीच ‘क्लस्टर‘ बनाएर एकअर्काको विद्यार्थी जाँच्न सक्ने उनी बताउँछन् । ‘त्यत्रो लगानी गरिसकेको छ, जलाएर किन नष्ट गर्ने ?,' उनी भन्छन्, ‘बरु पहिले नै यस्तो गर्दिएको भए अझ मूल्यांकन गर्न पनि सहज हुन्थ्यो ।'

प्रकाशित मिति: बिहीबार, जेठ २७, २०७८ १४:२६