प्रदेश २ : अनि पार्टी सरकारमा गएको समाचार पढेर कांग्रेस सांसदहरू छक्क परे

A+ A A-

२३ जेठ राति प्रदेश २ मा सत्ता पक्ष र नेपाली कांग्रेसबीच एउटा सहमति बन्याे, मन्त्रालय टुक्र्याएर बाँडफाँट गर्न दुवैतर्फका तीन/तीन जना सदस्य राखेर कार्यदल बनाउने । जसपा महन्थ ठाकुर पक्षका भौतिक पूर्वाधार तथा विकासमन्त्री जितेन्द्र सोनलसहित तीन जना राज्यमन्त्रीलाई मुख्यमन्त्री लालबाबु राउतले बर्खास्त गरेपछि नयाँ सत्ता समीकरणको टुंगो लगाउन कार्यदल गठन गर्ने सहमति भएकाे थियाे ।

सत्ता पक्षबाट सामाजिक विकासमन्त्री नवलकिशोर साह, उद्योग पर्यटन, वन तथा वातावरणमन्त्री राम नरेश राय र भूमि व्यवस्था कृषि तथा सहकारी राज्यमन्त्री शैलेन्द्र साह र कांग्रेसबाट प्रमुख सचेतक उपेन्द्र कुशवाहा, सांसदहरू वीरेन्द्र सिंह र शिवचन्द्र चौधरी कार्यदलमा थिए । भोलिपल्ट बिहान समाजिक विकासमन्त्री साहको निवासमा कार्यदलको बैठक बस्यो । सत्ता पक्षले मन्त्रालय टुक्र्याएर १० वटा बनाउने र भौतिक पूर्वाधारसहित दुई मन्त्रालय लिएर सरकारमा सहभागी हुन कांग्रेससमक्ष प्रस्ताव गरेको थियो ।

जवाफमा कांग्रेसले चार मन्त्रालय पाउनुपर्ने अडान राखेपछि वार्ता निष्कर्षहीन बन्यो । त्यसयता कार्यदलबीच पटक–पटक छलफल भयो । तर, कुरा मिल्न नसकेपछि कांग्रेस संसदीय दलका नेता रामसरोज यादव र मुख्यमन्त्री राउतबीच ‘वान-अन-वान’ वार्ता हुन थाल्यो । सत्ता साझेदारीका लागि बुधबार बिहान करिब साढे ७ बजेदेखि कांग्रेस संसदीय दलका नेता यादव र मुख्यमन्त्रीबीच फेरि छलफल सुरु भयो ।

बिहान करिब ११ बजे त्यसै विषयमा कांग्रेस सभापति शेरबहादुर देउवा र उपसभापति विमलेन्द्र निधिबीच समेत बूढानीलकण्ठमा छलफल भयो । तर, सत्ता सहकार्यका लागि कुनै निर्णय लिँदा सल्लाह लिने बचन दिएका कांग्रेस संसदीय दलका नेता बिहानैदेखि आफ्ना सांसदहरूबाट सम्पर्कविहीन भए ।

उनले पार्टीका प्रमुख सचेतक, कार्यदलका सदस्यसँगै अन्य सांसद तथा नेताहरूको समेत फोन उठाएनन् । बुधबार बसेको प्रदेशसभा बैठकमा मुख्यमन्त्री राउतसहित कांग्रेसले चुनेका कार्यदलका सदस्यहरूलगायतका प्रदेशसभा सदस्यहरू सहभागी भए पनि दलका नेता यादव भने सहभागी थिएनन् ।

२४ गते राति नै मन्त्रालय टुक्राएर १० वटा बनाउने र ३ मन्त्रालयसहित सरकारमा जाने निष्कर्षमा पुगेका कांग्रेस संसदीय दलका नेता यादव बुधबार बिहानैदेखि कांग्रेसका केन्द्रीय नेता, जसपा अध्यक्ष उपेन्द्र यादव र सरकारका तर्फबाट कार्यदल सदस्य बनेका मन्त्रीहरूसँग विभिन्न माध्यमबाट छलफलमा थिए । तर, दलका नेता यादव र अर्का सांसद वीरेन्द्र सिंहबाहेकका सांसदहरू यी सबै कुराप्रति अनभिज्ञ थिए ।

सञ्चारमाध्यममा समाचार आएको १० मिनेटपछिसम्म समेत शिलापत्रसितको कुराकानीमा कांग्रेसका प्रमुख सचेतक उपेन्द्र कुशवाहाले सत्ता सहकार्यका लागि सहमति भएकोबारे आफूलाई कुनै जानकारी नरहेको बताएका थिए । ‘बिहानैदेखि राम सरोजजीसँग सम्पर्क हुन सकेको छैन । मैले पनि सरकारमा जाने सहमति भएको समाचार देखेँ । तपाईंलाई कसले यस्तो भन्यो ?’, उनले उल्टै प्रश्न गरेका थिए ।

कांग्रेसका अन्य सांसद तथा नेताहरूले समेत सञ्चारमाध्यमबाटै पार्टी सरकारमा जान लागेको थाहा पाएका थिए । दलका नेता यादवसहित कांग्रेसबाट मन्त्री हुनेहरू वीरेन्द्र सिंह र ओमप्रकाश शर्माको लिस्टसमेत दिउँसै मुख्यमन्त्री तथा मन्त्री परिषदको कार्यालय पुगिसकेको थियो । यद्यपि, त्यसबीचमा मन्त्रीका लागि रौतहटका सांसदहरू शेख अलि र प्रमुख सचेतक कुश्वाको नामसमेत चर्चामा थियो । अन्ततः बुधवार राति १० बजे कांग्रेसबाट मन्त्री बनेका तिनै जनाले प्रदेश प्रमुखबाट सपथ लिई राति नै पदभार ग्रहणसमेत गरे ।

सांसदहरू असन्तुष्ट

दलका नेताले सांसदहरूलाई थाहै नदिई सरकारमा सामेल भएपछि कांग्रेसका अधिकांस सांसदहरू असन्तुष्ट छन् । कांग्रेसका धेरैजसो सांसदहरू सरकारमा सहभागी नभई केन्द्रमा जसपाको उपेन्द्र यादव पक्षसित गठबन्धन बनाइराख्न प्रदेश २ मा बाहिरबाटै समर्थन दिएर लालबाबु राउत नेतृत्वको सरकार जोगाउने पक्षमा थिए । सत्ता सहकार्य गर्दासमेत सम्मानजनक हिसाबले मन्त्रालय बाँडफाँट नभएको असन्तुष्ट सांसदहरूको बुझाइ छ ।

‘यतिका दिनसम्म यो सरकारले खासै केही काम गर्न सकेको छैन् । भ्रष्टाचार पनि बढेकाले सरकारप्रति जनता आक्रोशित छन् । एक–डेढ वर्षका लागि सरकारमा जाँदा अगामी चुनावमा पार्टीलाई घाटा व्यहोर्नु पर्ला’, ती सांसदले भने, ‘भौतिक पूर्वाधार मन्त्रालयबाहेक अर्को दुवै मन्त्रालय नामकै लागि मात्र हो । त्यसले जनतामा देखाउन सकिने खासै केही कामै हुँदैन । व्यक्तिगत फाइदाका लागि उहाँहरू सरकारमा जानुभयो ।’

कांग्रेस संसदीय दलका नेता यादवलाई सरकारमा सहभागी हुनेबारे अन्तिम निर्णय लिने जिम्मा संसदीय दलले नै दिए पनि बीचमा सल्लाह सुझावसमेत नलिएकाे असन्तुष्ट सांदहरूको गुनासाे छ ।

‘बन्द कोठाभित्र कसैलाई थाहै नदिई आफैँ सहमति गर्नु थियो भने कार्यदल किन बनाइयो ? हामीलाई एकपटक पनि सोध्नुपर्दैनथ्यो ? उहाँलाई निर्णय गर्ने जिम्मा दिँदा सल्लाह लिने पनि कुरा भएको थियो’, कांग्रेसका अर्का सांसदले भने ।

तर, मन्त्रीका आकांक्षी धेरै भएकाले विवाद हुन नदिन गुपचुप तरिकाले सरकारमा जाने सहमति गरेको हुनसक्ने कांग्रेस संदीय दलका नेता तथा भौतिक पूर्वाधार विकासमन्त्री यादवनिकट एक सांसद बताउँछन् । ‘मन्त्रीको आकांक्षी धेरै थिए । अरुलाई थाहा दिएको भए दिनभर विवाद चल्थ्यो । अप्ठेराे नहाेस् भनेर केन्द्रको निर्देशनअनुसार नै सरकारमा जानेदेखि मन्त्रीको टुंगो लगाउनेसम्मकाे सहमति भएको हो’, उनले भने ।

प्रकाशित मिति: बिहीबार, जेठ २७, २०७८ १२:१०