वडा अध्यक्षले नै किर्ते उपभोक्ता समिति बनाएपछि...

A+ A A-

नुवाकोटको लिखु गाउँपालिका–३ का वडा अध्यक्षले किर्ते उपभोक्ता समिति बनाएर राज्यकोष दुरुपयोग गरेको भन्दै स्थानीयले विरोध गरेका छन् । वडाअध्यक्ष भोलाप्रसाद सेढाईंले पारिवारिक सदस्यलाई मात्र राखेर समिति बनाएको आरोप स्थानीयले लगाएका छन् ।

जलस्रोत तथा सिँचाइ विकास डिभिजन कार्यालय नुवाकोटले उक्त वडाको सिन्दुरे खोला–चाम्खोल्सा खहरे फाँट सिँचाइ आयोजनाका लागि उपभोक्ता समितिलाई २० लाख रुपैयाँ रकम विनियोजन गरिदिएको थियो । तर, उक्त समिति नै किर्ते रहेको स्थानीयको आरोप छ ।

योजनाबाट लाभान्वित हुने माथिल्लो भेगका बासिन्दालाई पत्तै नदिई एकाघरका व्यक्तिलाई मात्र समेटेर उपभोक्ता समिति बनाएको र माथिल्लो भेगमा सिँचाइको काम नगरेको भन्दै स्थानीयले विरोध गरिरहेका छन् ।

स्थानीय श्रीकृष्ण पाण्डेले सिँचाइको मुहानक्षेत्रमा योजनाका लागि समितिले रकम नै नछुट्याएकाले विरोध गर्नुपरेको बताए । ‘सबै रकम दुई घर सेढाईं परिवारकाे गाउँमा मात्र खर्च गर्ने भएपछि हामीले संघर्ष गर्नुपरेको हो,’ उनले भने, ‘वडा अध्यक्षले गल्ती भयो भनेर गाउँ भेलामा भने पनि व्यवहारमा चाहिँ एकलौटी गर्न खोजिरहेका छन् । अन्य गाउँलेले त पर्खाल बनाउन थालेपछि मात्र योजनाबारे चाल पाए ।’

गत २२ वैशाखमा सिन्दुरेखोला–चाम्खोल्सा–खहरे फाँट सिँचाइ जल उपभोक्ता नामक समिति डिभिजन कार्यालयमा दर्ता भएको थियो । उक्त समितिमा वडा अध्यक्षका नातेदार मात्र रहेको भन्दै स्थानीय विरोधमा उत्रिएका हुन् ।

१ जेठमा स्थानीय भेला भई वडा अध्यक्षले राज्य कोषको रकम दुरुपयोग गरेको भन्दै विरोधसहित हस्ताक्षर गरे । भोलिपल्ट जलस्रोत तथा सिँचाइ विकास डिभिजन कार्यालय नुवाकोटमा अघिल्लो दिनको बैठकको निर्णयसहित निवेदन दिए ।

डिभिजन कार्यालयले सोही दिन सरोकारवालासँग छलफल गरी विवाद समाधान गरेर मात्र काम थाल्न भन्यो । साथै, यसको जानकारी डिभिजन कार्यालयलाई गराउन पनि गाउँपालिकामार्फत वडा कार्यालयलाई पत्राचार गर्‍यो ।

तर वडा अध्यक्षले छलफल नै नगरेको पाण्डेको आरोप छ । त्यसपछि विरोधी समूह १० जेठमा जिल्ला प्रशासन कार्यालयमा माग सुनुवाइ नभएकाे भन्दै निवेदन लिएर पुग्यो । २४ जेठमा डिभिजन कार्यालयका प्रमुख हरिप्रसाद गुरागाईं आफैँ आयोजनास्थल पुगेर विवाद मिलाउने प्रयास गरे पनि सफल भएको छैन । उल्टै उपभाेक्ता समिति अध्यक्ष वीरेन्द्र सेढाईं लगायतका पदाधिकारीले ज्यान मार्ने धम्की दिएको अर्को पक्षको आरोप छ । धम्की आएपछि स्थानीय सुरक्षा माग गर्दै नजिकैकाे धिकुरे प्रहरी चाैकीमा निवेदन दिए । भाेलिपल्ट उल्टै उपभोक्ता समितिका मानिस शान्ति सुरक्षाको निवेदन बोकेर जिल्ला प्रशासन कार्यालय पुगेका छन् ।

एकाघरको समिति

समितिको अध्यक्षमा वीरेन्द्र सेढाईं छन् । उनी वडाअध्यक्ष भोलाप्रसादको सहोदर माइलो बुबाको साइँलो छोरा हुन् । उपाध्यक्ष रामप्रसाद पाठक पनि वडाअध्यक्ष भोलाप्रसादका जेठो दाजु तेजप्रसादका साढुदाइ हुन् ।

जल उपभाेक्ता समिति अध्यक्ष वीरेन्द्र सेढाईं ।

कोषाध्यक्ष र सचिवमा क्रमशः तेजप्रसादका छोरा शैलेन्द र श्रीमती राधा देवी छन् । सदस्यमा विष्णुप्रसाद सेढाईं, महेन्द्रराज सेढाईं, गीता उपाध्याय, भगवती अधिकारी सेढाईं र सुदर्शन सेढाईं छन् । सबै सदस्य वडा अध्यक्षका नातेदार हुन् ।

विष्णुप्रसाद वडा अध्यक्ष भोलाप्रसादका माइलो बुबा तथा उपभोक्ता समितिका अध्यक्ष वीरेन्द्रका बुबा हुन् । त्यस्तै, महेन्द्रराज वीरेन्द्रका माइला दाजु हुन् । गीता महेन्द्रराजकी श्रीमती हुन् । भगवती वीरेन्द्रकी श्रीमती हुन् भने सुदर्शन कान्छो भाइ । उपभोक्ता नै सेढाईंहरू भएकाले समितिको संरचना यस्तो भएको वडाअध्यक्ष भोलाप्रसादले शिलापत्रलाई बताए ।

‘उहाँहरू एकाघरको हुनु हुँदैन भनेर भन्नुहुन्छ,’ उनले भने, ‘तर सेढाईं गाउँको आयोजनामा सेढाईं भइहाल्छन् नि ।’

यद्यपि आयोजनाबाट लाभान्वित माथिल्लो भेगका एक दर्जन घरपरिवारसमेत रहेको वडाअध्यक्ष सेढाईंले नै बताए । उनीहरूलाई कोभिड महामारीका कारण उपभोक्ता समितिमा राख्न नसकेको उनको दाबी छ । तर, पाण्डे भने गुपचुप रूपमा बन्द कोठाभित्र वडाअध्यक्षले उपभोक्ता समिति बनाएको तर्क गरे । ‘उहाँको नियत नै ठीक छैन,’ उनले भने, ‘वडा अध्यक्षजस्तो व्यक्तिले आफ्ना मानिसलाई मात्र लाभ मिल्ने गरी आयोजनाको रकम खर्च गर्न खोजिरहेका छन् ।’

उपभोक्ता समितिका अध्यक्ष वीरेन्द्र सेढाईंले पनि उक्त योजनाबाट लाभ लिनेहरू सबै आफ्नै परिवारको परेकाले त्यसरी समिति बनाइएको दलिल गरे । ‘बर्खाको समयमा आफ्नो घरखेत सबै जाने डर भएकाले चिनेजानेका मान्छे भएको बेला काम गरौँ न त भनेर योजना पार्न लगाएको हुँ,’ उनले भने, ‘उजुरीकर्ताको जग्गा त्यस योजनाभित्र नपर्ने भएकाले हामीहामी मिलेर समिति बनाएका हौँ । यसबाट लाभ लिनेजति अधिकांशलाई समितिमा समेटिएको छ ।’

जलस्रोत तथा सिँचाइ विकास डिभिजन प्रमुख हरिप्रसाद गुरागाईं आफूहरू विवाद मिलाउने कोसिसमा रहेको बताउँछन् ।

गाउँपालिका कार्यालयले फेरि विवाद नसल्टिउञ्जेल याेजना राेक्न २५ जेठमा डिभिजन कार्यालयमा सिफारिस गरेकाे छ । विवाद लम्बिए असारभित्र विनियाेजित रकम खर्च हुने छैन र बजेट फ्रिज हुनेछ ।

प्रकाशित मिति: बुधबार, जेठ २६, २०७८ १९:३३