रूपन्देहीमा 'आफ्ना'लाई कोरोना खोप लगाउन जनप्रतिनिधिको दबाब, ४ पालिकामा कार्यक्रम स्थगित

रूपन्देहीमा 'आफ्ना'लाई कोरोना खोप लगाउन जनप्रतिनिधिको दबाब, ४ पालिकामा कार्यक्रम स्थगित

A+ A A-

चीन सरकारले अनुदानमा उपलब्ध गराएको कोरोनाविरुद्धको भेरोसेल खोप काठमाडौं उपत्यकाबाहेकका जिल्लामा ६२–६४ वर्ष उमेर समूहकालाई लगाउने सरकारले निर्णय गरेको छ । त्यसअनुसार रूपन्देहीमा पनि १४ हजार ५ सय ५५ जना नागरिकलाई मंगलबारदेखि लगाउन सुरु भरियो ।

जिल्लामा ६९ खोप केन्द्रबाट ८ हजार ९ सय ९८ जनालाई खोप लगाइएको थियो । यो उमेर समूहका नागरिकको संख्या जिल्लामा १८ हजार छ । सबैलाई पुग्ने खोप नआएपछि ३ हजार ४ सय ४५ जना यो उमेर समूहका नागरिक यो खोपबाट बञ्चित हुनेछन् ।

तर, लक्षित उमेर समूहलाई नै नपुग्ने खोप आएका बेला जनप्रतिनिधिले भने आफ्नो मान्छेलाई खोप लगाउन दबाब दिएका छन् । जसका कारण जिल्लाका केही स्थानीय तहमा खोप कार्यक्रम नै प्रभावित बनेको छ । जनप्रतिनिधिको स्वार्थ बाझिँदा जिल्लाका चार पालिकामा खोप कार्यक्रम स्थगित भएको स्वास्थ्य कार्यालय रूपन्देहीले जनाएको छ ।

जनप्रतिनिधिले आफन्त, पार्टी निकटकालाई खोपमा प्राथमिकता दिएपछि विवाद हुँदा खोप कार्यक्रम स्थगित भएको हो । जिल्ला स्वास्थ्य कार्यालयका कोरोना फोकल पर्सन केदारनाथ साहले ओमसतिया, सिद्धार्थनगर, तिलोत्तमा नगरपालिका र मर्चवारी गाउँपालिकामा विवादपछि खोप कार्यक्रम नै स्थगित भएको जानाकारी दिए ।

ओमसतिया गाउँपालिका- २ का अध्यक्ष ज्ञानेश श्रेष्ठले आफन्त र पार्टी कार्यकर्तालाई सरकारी मापदण्डविपरीत गएर खोप लगाउन दबाब दिएको स्वास्थ्यकर्मीले बताएका छन् । रूपन्देहीका प्रमुख जिल्ला अधिकारी अस्मान तामाङले वडा अध्यक्ष श्रेष्ठले लक्षित समूहभन्दा बाहेककालाई खोप लगाउन दबाब दिएको गुनासो आएपछि जिल्ला प्रशासनले उनलाई स्पष्टीकरण सोधेको बताए ।

ओमसतिया गाउँपालिका अध्यक्ष हीरा केवटले वडा नं. २ का अध्यक्षले लक्षित समूहभन्दा बाहिरकालाई खोप लगाउन दबाब दिएको कुरा आफूले पनि सुनेको बताउँदै वडा अध्यक्षलाई स्पष्टीकरण सोधिने उनले बताए । ‘म आफैँ कोरोना पोजिटिभ भए । मैले पनि खोप लगाएको छैन । अध्यक्षले त्यस्तो काम गर्नुभएछ । म पनि उहाँलाई यसबारे राखेर छलफल गर्छु’ उनले भने ।

यता सिद्धार्थनगरमा आवश्यकताभन्दा कम खोप आएको र जनप्रतिनिधिले आफन्त र कार्यकर्तालाई बढी प्राथमिकता दिएपछि विवाद हुँदा खोप लगाउनै स्थगित गरिएको छ । मर्चवारी र तिलोत्तमा नगरापलिकामा पनि खोप लगाउने विषयमा विवाद आएको छ । प्रजिअ तामाङका अनुसार विवादका विषयमा केन्द्र र प्रदेश सरकारलाई जानकारी गराइएको र सहजीकरण प्रयास भइरहेको छ ।

सरकारले खोप व्यवस्थापनको जिम्मा स्थानीय तहलाई दिएको छ । तर जनप्रतिनिधिबीच स्वार्थ बाझिँदा र लक्षित समूहभन्दा बाहिर गएर खोप लगाउन दबाब दिन थालिएको भन्दै चर्को विरोध पनि भएको छ ।

बुटवल उपमहानगरपालिका- ११ मा पनि लक्षित समूहभन्दा बाहिरका धेरैलाई खोप लगाएको स्थानीयको गुनासो छ । मजुवाका टीकाराम लम्सालले लक्षित समूहभन्दा पनि नेताका आफन्त, ईष्टमित्रले खोपमा प्राथमिकता पाएको बताए । ‘आमालाई लिएर वडा नं. ११ को खोप केन्द्रमा बिहान ८ बजे पुगेँ । दिउँसो १२ बजे मात्र पालो आयो । तर, त्यहाँ उमेर पुगेका भन्दा पनि भर्खरकाले खोप लगाएका छन्’ उनले भने ।

बुटवल उपमहानगरपालिका- ११ का वडा अध्यक्ष रामचन्द्र क्षेत्रीले दोस्रो खोप छुटेका र केही स्वास्थ्यकर्मी छुटेकालाई र लक्षित समूहलाई मात्र खोप लगाएको बताए । ‘खोप कम छ, मानिसहरूको लाइन ठूलो हुँदा प्रहरीसमेत परिचालन गर्नुपर्ने अवस्था छ । हामीले लक्षित समूहभन्दा बाहिर गएर खोप लगाउन दिएका छैनौँ,’ उनले भने ।

उनले खोपबारे गुनासो भने आइरहेको बताए । हिजो वडास्तरका स्वास्थ्य केन्द्रमा खोप लगाएकोमा आज बुटवल उपमहानगरपालिकाभित्रका लक्षित उमेरका छुटेकाहरूका लागि कान्ति स्कुलमा खोप लगाउने कार्यक्रम चलिरहेको छ ।

वडा अध्यक्ष क्षेत्रीका अनुसार कर्मचारीकै मनोमानिलेका कारण खोपमा विवाद आएको बताए । उनले आफ्ना नातागोता, ईष्टमित्रलाई कर्मचारीले खोप लगाइदिएको गुनासोसमेत आएकाले नगरपालिकाले छानवबिनका लागि ३ सदस्यीय छानबिन समितिसमेत गठन गरिएको बताए । बुटवल उपमहानगरपालिका-१५ का वडा अध्यक्ष दधिराम न्यौपानेको संयोजकत्वमा ३ सदस्यीय छानबिन समिति गठन भएको उनले बताए ।

प्रकाशित मिति: बुधबार, जेठ २६, २०७८ १७:१७