प्रदेश २ : कांग्रेसलाई आज या भोलिमै सरकारमा सहभागी गराउने तयारी, राउत र यादवबीच निरन्तर छलफल

प्रदेश २ : कांग्रेसलाई आज या भोलिमै सरकारमा सहभागी गराउने तयारी, राउत र यादवबीच निरन्तर छलफल

A+ A A-

प्रदेश २ मा नेपाली कांग्रेस र माओवादी केन्द्रलाई सरकारमा सहभागी गराउन थालिएको छलफल निष्कर्षमा पुग्न थालेको छ ।

मन्त्रालय टुक्र्याउने र बाँडफाँट गर्ने कुरा मिले आज या भोलिसम्ममा मुख्यमन्त्री लालबाबु राउतले मन्त्रीमण्डल पुनर्गठन गर्ने तयारी थालेका छन् । कांग्रेसलाई ३ र माओवादीलाई एक मन्त्रालाय दिई मन्त्रीमण्डल पुनर्गठनको तयारी थालिएको हो ।

सत्ता साझेदारीका लागि मुख्यमन्त्री राउत र नेपाली कांग्रेसका संसदीय दलका नेता रामसरोज यादवबीच निरन्तर छलफल चलिरहेको छ । कांग्रेस सरकारमा सहभागी हुने करिब पक्कापक्की भइसके पनि मन्त्रालय टुक्र्याउने र बाँडफाँट गर्ने विषयमा छलफल भइरहेको मुख्यमन्त्री निकट एक नेताले जानकारी दिए ।

‘मन्त्रालय टुक्र्याउँदा चार मन्त्रालय मागेको कांग्रेस हिजो राति भएको छलफलमा लचिलो भएको छ । उसले तीन मन्त्रालय मागेको छ । मन्त्रालय टुक्र्याउने विषयमा छलफल जारी छ । टुंगो लागे आज/भोलि उहाँहरूलाई शपथ गराइनेछ,’ ती नेताले भने ।

अगामी बजेट र नीति तथा कार्यक्रमसँगै महन्थ ठाकुर पक्षका मन्त्री तथा राज्यमन्त्री बर्खास्त गरी नयाँ सत्ता समीकरण बनाउन जनकपुर आएका जसपा अध्यक्ष उपेन्द्र यादवसमेत कांग्रेस र माओवादीलाई सरकारमा सहभागी गराउन सक्रिय छन् ।

कांग्रेस र माओवादीलाई मन्त्रीमण्डलमा ल्याएर उनीहरूको शपथपछि मात्र फर्किने अध्यक्ष यादवको तयारी छ । मुख्यतः मन्त्रालय टुक्र्याउने विषयमा कुरा नमिल्दा मन्त्रीमण्डल पुनर्गठनमा ढिलाइ भएको छ ।

मन्त्रालय टुक्र्याएर कांग्रेसलाई सरकारमा ल्याउन सरकार र कांग्रेसबाट छ सदस्यीय कार्यदल गठन भएको छ । सोमबार बिहान बसेको कार्यदलको बैठकले सहमति जुटाउन नसकेपछि मुख्यमन्त्री राउत र कांग्रेस संसदीय दलका नेता रामसरोज यादवबीच अबेर रातिसम्म छलफल चलेको थियो ।

छलफलमा राउतले यादवलाई तत्काल सहमती गरेर एउटा मन्त्रालय लिएर शपथग्रहण गर्न प्रस्ताव गरेका थिए । ‘तत्काल एउटा मन्त्रालय लिएर शपथ लिनुस् अनि हामी छलफल गरेर मन्त्रालय टुक्र्याएर बाँडफाँट गरौँला भनेर मुख्यमन्त्रीजीले प्रस्ताव गर्नुभयो । तर, रामसरोजजीले यो मोडालिटीमा जान नसकिने जवाफ दिनुभयो,’ स्रोतले भन्यो ।

यादवले सरकारमा सहभागी हुनका लागि राउतलाई दुई प्रस्ताव गरेका थिए । ‘मन्त्रालय टुक्र्याउने विषयमा सरकारपक्षभित्रै विवाद छ । त्यसका लागि पहिले तपाईँहरू आफैँभित्र क्लियर होमवर्क गरेर आउनुस्, कि त सँगै बसेर छलफल गरौँ । अनि मन्त्रालय टुक्र्याऊँ भनेर उहाँले प्रस्ताव गर्नुभयो,’ एक नेताले भने ।

स्रोतका अनुसार भौतिक पूर्वाधार विकास मन्त्रालय कांग्रेसलाई दिन मुख्यमन्त्री तयार छन् । तर, अन्य दुईवटा मन्त्रालय फुटाउन सत्तापक्षभित्रै विवाद देखिएकाले मुख्यमन्त्रीलाई मन्त्रीमण्डल पुनर्गठनमा अप्ठ्यारो परेको छ ।

महन्थ ठाकुर समूहबाट कित्ता परिवर्तन गरेर उपेन्द्र समूहमा आएका तत्कालीन राजपाका समाजिक विकासमन्त्री नवलकिशोर साह र उद्योग वन पर्यटन तथा वातावरणमन्त्री राम नरेश रायले कुनै हालतमा आफ्नो मन्त्रालय टुक्र्याउन नदिने अडान लिएका छन् ।

उनीहरूले मन्त्रालय टुक्र्याइए फेरि कित्ता परिवर्तन गरेर ठाकुर समूहमै फर्किने चेतावनी समेत दिएकाले मन्त्रालय फुटाउन समस्या भएको हो । त्यसैगरी, भूमि व्यवस्था कृषि तथा सहकारी र आन्तरिक मामिला तथा कानुन मन्त्रालय समेत फुटाउने तयारी छ ।

उसो त मुख्यमन्त्री राउतले भौतिक पूर्वाधार मन्त्रालयसमेत टुक्र्याएर कांग्रेसलाई दिने प्रस्ताव गरेका थिए । तर, कांग्रेस संसदीय दलका नेता यादवले मानेका छैनन् । सत्ता सहकार्यका लागि मन्त्रालयको बाँडफाँट सन्तुलन मिलाएर सम्मानजनक हिसाबले गर्नुपर्ने कांग्रेस सांसद वीरेन्द्र सिंहले बताए ।

सत्ता सहकार्यका लागि माओवादी संसदीय दलका नेता भरत साहसँग पनि सत्ता पक्षले निरन्तर छलफल गरिरहेको छ । उनले दुईवटा मन्त्रालय लिने अडान राखे पनि एउटा शक्तिशाली मन्त्रालय दिएर मन्त्रीमण्डलमा सहभागी गराउने मुख्यमन्त्री राउतको तयारी छ ।

प्रकाशित मिति: मंगलबार, जेठ २५, २०७८ ११:४६