जनता समाजवादी पार्टी नेपालको महन्थ ठाकुर समूहका प्रदेश सांसदहरूले आज बस्ने प्रदेशसभा बैठक बहिष्कार गर्ने भएका छन् ।
सोमबार बिहान बसेको ठाकुर पक्षका सांसदहरूको बैठकले छैठौँ अधिवेशनको पहिलो बैठकमा सहभागी नहुने निर्णय गरेको हो ।
‘पछिल्लो राजनीतिक घटनाक्रमलाई हेरेर आजको बैठकमा हामीहरू सहभागी नहुने निर्णय गरेका छौँ । यद्यपि सरकारलाई अझै समर्थन छँदैछ,’ एक सांसदले भने ।
बैठकमा ठाकुर पक्षका १५ जना प्रदेशसभा सदस्यहरू उपस्थित रहेको सांसद परमेश्वर साहले बताए । उनका अनुसार ठाकुर पक्षलाई समर्थन गर्ने ५ जना सांसद विशेष काम तथा उपचारका लागि काठमाडौंमा रहेकाले उनीहरू बैठकमा सहभागी हुन सकेनन् ।
ठाकुर पक्षको संसदीय दलको बैठकमा सभामुख सरोज यादव पनि सहभागी भएको बताइएको छ । अनौपचारिक छलफल भएकाले सभामुख यादव पनि केहीबेर बैठकमा सहभागी भएको सांसद साहले बताए ।
प्रदेश २ मा ठाकुर पक्षका मन्त्री तथा राज्यमन्त्रीलाई हटाउनुअघि जसपाका ३६ सांसदको हस्ताक्षरसहितको समर्थनमा आइतबार मुख्यमन्त्री लालबाबु राउतलाई संसदीय दलको नेता चयन गरिएको थियो ।
सरकारले ल्याउन लागेको नीति तथा कार्यक्रम र बजेट पास गर्न पार्टीले ह्वीप जारी गर्ने र विधानविपरीत कार्य गर्नेलाई कारबाही गर्ने उपेन्द्र यादव पक्षको रणनीति छ ।
प्रकाशित मिति: सोमबार, जेठ २४, २०७८ १३:४९
-1717941092.jpg)
-1743579183-1743604118.jpg)
