जुम्लाका कोरोना संक्रमित गाउँपालिका अध्यक्ष मापदण्ड तोड्दै कर्णालीका मन्त्री भेट्न सुर्खेत पुगे

जुम्लाका कोरोना संक्रमित गाउँपालिका अध्यक्ष मापदण्ड तोड्दै कर्णालीका मन्त्री भेट्न सुर्खेत पुगे

तस्वीरः गाउँपालिका अध्यक्ष शाही कर्णालीका आर्थिक मामिला तथा योजना मन्त्री गोपाल शर्मालाई अविवादन गर्दै

A+ A A-

जुम्ला हिमा गाउँपालिकाका अध्यक्ष रजबहादुर शाहीले कोरोना महामारीको स्वास्थ्य मापदण्ड पालना नगरेको आरोप लागेको छ । कोरोना संक्रमित अध्यक्ष शाहीले स्वास्थ्य मापदण्ड विपरीतका काम गरेको आरोप लागेको हो ।

गाउँपालिका अध्यक्ष शाहीलाई यही ९ जेठमा कोरोना भाइरस (कोभिड–१९) संक्रमणको पुष्टि भएको थियो । कोरोना पुष्टि भएर होम आइसोलेसनमा बसेका शाही कोरोना रिर्पोट नेगेटिन नआउँदै उनी १७ जेठमा कर्णाली प्रदेश सरकारसँग योजना माग्न गाडी चढेर सुर्खेत पुगेका थिए । १७ जेठमा उनी संक्रमित भएको ९ दिन पुगेका थिए । सुर्खेत पुगेका शाहीले कोरोना पुष्टि भएको १०औँ दिन (१८ जेठ)मा कर्णाली प्रदेशका आर्थिक मामिला तथा योजनामन्त्री गोपाल शर्मालाई भेटेको तस्वीर सामाजिक संजालबाट सार्वजनिक भएको थियो । सरकारले कोरोना भाइरस संक्रमण भएपछि कम्तिमा पनि १४ दिन आसोलेसनमा बस्नुपर्ने मापदण्ड तय गरेको छ ।

९ जेठमा अध्यक्ष शाही र वडाध्यक्ष मुनबहादुर बुढालगायत १० जनामा कोरोना संक्रमण पुष्टि भएको हिमा गाउँपालिकाका स्वास्थ्य शाखा संयोजक रतन रावतले जानकारी दिए । ‘उहाँहरूमा ऐन्टिजेन विधिबाट परीक्षण गर्दा कोरोना पुष्टि भएको थियो,’ उनले भने,‘कोरोना पुष्टि भएपछि उहाँहरू होम आइसोलेसनमा बस्नुभएको थियो ।’

अध्यक्ष शाहीलाई कोरोना पुष्टि भएको ९ दिनमै प्रदेश राजधानी सुर्खेतमा गएको भन्ने खबर पाएको हिमा गाउँपालिकाका उपाध्यक्ष हिमाली रोकायाले बताइन् । ‘अध्यक्ष, ९ जेठमा कोरोना संक्रमित भएपछि मलाई अध्यक्षको कार्यबाहक अध्यक्षको जिम्मेवारी दिएर होम आइसोलेसनमै बस्नु भएको थियो,’ उनले भनिन्, ‘योजना माग्ने भनेर प्रदेश जानुभयो भन्ने खबर नागरिकबाटै आएको हो । यस विषयमा मलाई केही जानकारी छैन ।’

गाउँपालिका अध्यक्ष शाहीलाई फोन सम्पर्क गरी बुझ्दा आफू संक्रमित भएर १४ दिनसम्म होम आइसोलेसनमा बसेको बताए । अध्यक्ष शाहीले आफ्नो रिपोट नेगेटिभ आएपछि मात्रै प्रदेश राजधानीमा आएको बताए । शाहीले आफूलाई कोरोना संक्रमण भएको ९ दिनमै प्रदेश राजधानी सुर्खेत आएको भन्ने प्रचार झुटो भएको बताए ।

कोरोना संक्रमित गाउँपालिकाका अध्यक्ष शाही अनेरास्ववीयू (क्रन्तिकारी) कर्णाली प्रदेशका संयोजक अमरजंग शाही, नेकपा माओवादी केन्द्र जुम्ला जिल्लाका अध्यक्ष बिरबहादुर कुवँरसहित एउटै गाडीमा कर्णाली प्रदेश पुगेका थिए ।

उनीसँगै कोरोना पुष्टि भएका अन्य स्थानीयहरू सुरुमा गाउँपालिकाले बनाएको आइसोलेसनमा बसेका थिए । तर, अध्यक्ष शाही होम आइसोलेसनमा बस्ने भनेपछि उनको सिको गर्दै अन्य संक्रमित पनि होम आइसोलेसनमा बस्ने भन्दै स्थानीय तहको आइसोलेसनबाट घर फर्किएका थिए ।

अध्यक्ष शाहीसँगै कोरोना संक्रमित भएका विशाल शाहीले होम आइसोलेन सुरक्षित बसेको बताए । ‘अध्यक्षजस्तो जिम्मेवर मान्छेले नै स्वास्थ्यका मापदण्ड पालन नगरेको देख्दा अचम्म लाग्छ,’ उनले भने ।

अध्यक्ष शाही होम आइसोलेसनमा बस्दा पनि आइसोलेसनको बसाइँ कुनै भोज भतेरभन्दा कम नभएको अध्यक्ष शाहीका एक छिमेकीले बताए । ‘दैनिक मासु किनेर लान्थे, साँझ पार्टी हुन्थ्यो,’ उनले भने, ‘ठूलाबडालाई लागेको कोरोना अरुलाई नसर्ने रहेछ ।’

जुम्लामा कोरोना संक्रमित बढ्दै गएका कारणले निषेधाज्ञा जारी गरिएको छ ।

प्रकाशित मिति: शनिबार, जेठ २२, २०७८ २१:१९