निषेधाज्ञा छलेर घ्याम्पेडाँडातिर बरालिँदै सर्वसाधारण

A+ A A-

भक्तपुरमा पर्ने घ्याम्पेडाँडा उपत्यकावासीका लागि परिचित गन्तव्य हो । सामान्य समयमा यो डाँडामा दैनिक हजारौँको संख्यामा सर्वसाधारण घुम्न पुग्छन् । घ्याम्पेडाँडाबाट सगरमाथा, मकालु, कञ्चनजङ्घा, चोयूसहित विभिन्न हिमश्रृङ्खलाहरू हेर्ने पाइन्छ । काठमाडौं, ललितपुर र भक्तपुर शहरलाई समेत यो डाँडादेखि नियाल्न सकिन्छ ।

सरकारले कोरोना भाइरस नियन्त्रण गर्न गत १६ वैशाखदेखि उपत्यकाका तीन जिल्लामा निषेधाज्ञा जारी गरेको थियो । हाल निषेधाज्ञा जारी नै छ । तर, यो निषेधाज्ञामा पनि दैनिक सर्वसाधारण घ्याम्पेडाँडा आसपास घुम्न आउने गरेको पाइलट बाबाको आश्रम अगाडिका एक व्यापारी बताउँछन् ।

निषेधाज्ञामा पनि घ्याम्पेडाँडा, रानीकोट र पाइलट बाबाको आश्रममा घुम्न आउने सर्वसाधारणको भीड लाग्ने गरेको ती व्यापारीको भनाइ छ । गस्तीमा प्रहरी आउँदैन भन्ने प्रश्नमा ‘कहिलेकाहिँ आउँछन् । अलिक साँझ परेपछि प्रहरी नै आउँदैन् । आए पनि वास्ता नगरी फर्किन्छन् । हाम्रो त व्यापार भइरहेको छ । कोरोना नसरे पुग्छ । गत सातादेखि अलिक बढी भीडभाड बढेको छ’ उनले जवाफ दिए ।

घ्याम्पेडाँडा र पाइलट बाबाको आश्रम आसपासको चौरमा सर्वसाधारणको भीड नै छ । ती व्यापारीले भनेजस्तै घ्याम्पेडाँडा र पाइलट बाबाको आश्रम अगाडिको चौरमा टिकटक बनाउन भिडियो खिच्ने, मदिरा पिउँदै बस्ने, बाइक लिएर गएको युवाहरूको समूह, केटा–केटीको भेटघाट र समूहमा वनभोजजस्तै गरी खाएर बस्ने सर्वसाधारणको भीडभाड नै देखिन्छ ।

घ्याम्पेडाँडा र पाइलट बाबा आश्रमको चौरमा डुल्न आएकाहुरूले सामाजिक दूरीलगायत सरकारले तोकेका स्वास्थ्य मापदण्ड पालना गरेको देखिँदैन । उनीहरू सामान्य समयमा जस्तै समूह बनाएर बसेका थिए । कतिपयले त मास्कसमेत नलगाई घुमिरहेका भेटिन्थे ।

पाइलट बाबा आश्रमको चौरमा एक जोडी मस्त गफमा व्यस्त थिए । उनीहरू काठमाडौंको कोटेश्वरबाट घ्याम्पेडाँडा घुम्न पुगेका रहेछन् । ती जोडीलाई हामीले कामले आउनु भएको हो कि घुम्न मात्र भन्ने प्रश्न गर्दा, 'के गर्नु निषेधाज्ञामा घरभित्र बस्दा बोरिङ भइरहेको थियो, त्यही भएर केटासाथीसँग घुम्न घ्याम्पेडाँडा आएको हो' जवाफ फर्काए ।

निषेधाज्ञामा यसरी हिँड्दा प्रहरीले केही भन्दैन् भन्ने प्रश्नमा युवतीले भनिन्, ‘प्रहरीलाई झुक्याएर आइयो । हस्पिटलमा आफन्त बिरामी छन् भनेर आएको हुँ ।'

प्राय: घ्याम्पेडाँडा र पाइलट बाबाको आश्रम घुम्न पुगेका सर्वसाधारण प्रहरीलाई झुक्याएर जाने गरेको बताउँछन् । काम, बिरामीलाई भेट्ने बहाना बनाएर र अन्य काम देखाएर यो ठाँउ घुम्ने आउने गरेको उनीहरूको भनाइ छ ।

कोरोना महामारीमा समेत घ्याम्पेडाँडा र पाइलट बाबाको आश्रम आसपासका किसानासँगै साना होटल खुलेको थिए । पछिल्लो समय घ्याम्पेडाँडा आसपासमा रिर्सोट खुलेका छन् । जसका कारण आन्तरिक र बाह्य पर्यटनको आकर्षणसमेत बढ्दै गएको छ ।

प्रकाशित मिति: शनिबार, जेठ २२, २०७८ १९:५७