काेच अलमुताइरीको नेतृत्वमा नेपालले विश्वकप छनाेटमा देखाएकाे तरक्की

A+ A A-

बिहीबार कुवेतकाे जबर अल अहमद अन्तर्राष्ट्रिय रंगशालामा तामक्रम ४२ डिग्री पुगेको थियो । वातावरणीय हिसाबले खेलाडीका लागि कुवेतको यो तामक्रम खेल्न उपयुक्त मानिँदैन ।

कोरोना महामारीका कारण फिफाले विश्वकप २०२२ र एएफसी एसियन कप २०२३ को दोस्रो चरणको छनोट खेल कुवेतमा खेलाएको हो ।

कोरोना महारामारीको लहर विश्वभर नफैलिएको हुन्थ्यो भने छनोट चरणका खेल हरेक देशले आफ्नै ‘होम ग्राउण्ड’मा खेलाउन पाउँथे । र, नेपालले हिजो २० जेठको पहिलो खेल काठमाडौंस्थित दशरथ रगंशाला खेल्थ्याे ।

तर, अब नेपालसहित समूह चरणको ‘बी’ मा रहेका पाँचवटै देश चाइनिज ताइपेई, अस्ट्रेलिया, कुवेत र जोर्डनले छनोट चरणका बाँकी सबै खेल उच्च तापक्रमका बीच कुवेतमै खेल्नेछन् ।

यस्ताेमा फिफाले खेलाडीलाई केही राहत भने दिएकाे छ ।

उच्च तामक्रममा खेल्नुपर्ने भएकाले खेलाडीले खेलको पहिलो हाफ र दोस्रो हाफको तीन/तीन मिनेटमा ‘कुलिङ’ समय पाएर आराम गर्ने मौका पाएका छन् । अन्य खेलहरूमा प्रायः यसरी ‘कुलिङ’ समय भनेर दिइँदैन ।

यसरी उच्च तामक्रमका बीच भएको पहिलो खेलमा नेपालले शानदार जित हात पार्दै नेपाली दर्शकको मन जितेको छ । नेपालले चाइनिज ताइपेईलाई २–० गोल निराश पारिदियाे ।

खेलको सुरुवाती समयदेखि नै आक्रमक खेलेकाे नेपाली टोलीले खेलको अन्त्यसम्म उत्कृष्ट प्रदर्शन जारी राख्यो ।

नेपालले अग्रता अञ्जन विष्टकाे गाेलबाट अग्रता लिएकाे थियाे । उनले खेलको चौथो मिनेटमै सुनौलो पेनाल्टीको अवसर पाए । त्याे माैका उनले चुक्न दिएनन् ।

पेनाल्टी एरियामा चाइनिज ताइपेईका खेलाडी चेङ हाउले हाण्ड गरेपछि नेपालले पेनाल्टी पाएको हो । खेलको चौथो मिनेटमै अग्रता पाएको नेपालले त्यसलाई अन्तिमसम्म लयमै राख्यो ।

चाइनिज ताइपेईका खेलाडीले बराबरी गोल गर्ने केही मौका भने नपाएका हाेइनन् । तर, त्यसलाई नेपाली खेलाडीले विफल पारिदिए ।

चाइनिज ताइपेईले खेलको दोस्रो हाफमा पेनाल्टी एरियानजिकैबाट फ्री किकको अवसर पाएको थियो ।गौतम श्रेष्ठको फाउलमा चाइनिज ताइपेईले फ्रिकिक पाएको हो । तर, उसले त्यसको फाइदा उठाउन सकेन । खेलको अन्तिमतिर नेपालका नवयुग श्रेष्ठले दोस्रो गोल गर्दै नेपालको जित सुनिश्चत गरे ।

उसो त, नेपालले चाइनिज ताइपेईलाई यसअघि छनोट चरणको पहिलो खेलमा पनि उसैको होम ग्राउन्डमै २–० ले पराजित गरेको थियो । खेलमा जित निकाल्दा दुवै गाेल नेपालका अञ्जन विष्टले गरेका थिए ।

फिफा वरीयतामा नेपालभन्दा ताइपेई निकै माथि छ । नेपाल वरीयताको १७१औँ स्थानमा छ भने ताइपेई १४१औँ नम्बरमा छ ।

ताइपेईसँगको लगातार दोस्रो जितले नेपाली खेलाडीको मनोबल त बढेको छ नै, नेपाली फुटबलको भविष्यलाई लिएर पनि धेरैले शान्तिका सास फेरेका छन् ।

ताइपेईसँगको बिहीबारको खेल नेपालले उच्च तापक्रमका बीच पनि राम्राे खेलेको नेपाली फुटबल टोलीका पूर्वकप्तान एवं प्रशिक्षक राजुकाजी शाक्यको प्रतिक्रिया छ ।

उनी भन्छन, ‘हाम्रा लागि सुरुमै पेनाल्टी पाउनु सुनौलो अवसर थियाे । त्यसको उपयोग भयो । बीचमा थप केही गोलको अवसर पाए पनि त्यसको फाइदा उठाउन सकिएन । तर, नवयुग श्रेष्ठले राम्रो गोल गरे । त्यो निकै फास्ट र फिनिसिङ गोल थियो ।’

नेपालको खेलमा निकै राम्राे सुधार देखिएको उनको तर्क छ । यो जितसँगै नेपालले छनोट चरणमा प्रवेशको सम्भावना जाेगाएकाे छ ।

एसियन कप २०२३ छनोटको सम्भावना पनि बढेको छ । दुई खेल जितेसँगै नेपालको ६ अंक पुगेको छ । समूहको शीर्ष स्थानमा रहेको अस्ट्रेलियाकाे १२ र कुवेत र जोर्डनको समान १०–१० अंक छ । ताइपेई अंकविहीन छ ।

कोचको नयाँ शैली

चाइनिज ताइपेईसँगको खेलको नतिजा र शनिबार इराकविरुद्धको खेललाई लिएर नेपाली टोलीका प्रशिक्षक अब्दुल्लाह अलमुताइरीकाे खुबै प्रशंसा भइरहेकाे छ ।

यसअघि नेपाली फुटबल टोलीको शैली आक्रामक हुँदैनथ्यो । पछिल्ला खेलमा नेपाली टोलीले केही गोलकै लागि आक्रामक शैली अपनाएको देखिन्छ । इराकविरुद्धको खेलमा समेत नेपालले नै अग्रता लिएको थियो । नयाँ प्रशिक्षक अलमुताइरीले नेपाली फुटबल खेलको शैलीमा केही परिवर्तन ल्याउन खोजेको देखिन्छ । यो कुरामा राजु शाक्यसमेत सहमत छन् ।

‘हिजोको खेलमा पनि सुरुदेखि नै खेलाडीहरू आक्रामक देखिए । खेलको फर्मेसन तीन/चार खेलाडी फर्वार्ड बनाएर खेलाएको देखिन्थ्यो । त्यो भनेको गोल गर्न सजिलो होस् भनेर नै हुनुपर्छ’, शाक्य भन्छन् ।

त्योबाहेक पहिलो हाफमा नवयुगलाई बेन्चमा राखेर काेचले आशिष लामालाई मैदान छिराएका थिए । दोस्रो हाफमा उनलाई बाहिर बोलाएर नवयुगलाई पठाउनु र उनैले गोल गर्नुलाई सही निर्णय मान्नुपर्छ ।

उच्च तामक्रमा खेल हुँदा वा खेलमा नयाँ शैली अपनाउँदा कोचले विश्वास गरेका केही खेलाडीलाई महत्त्वपूर्ण समयमै खेल मैदानमा प्रवेश गराउने फुटबलको चलनजस्तै हाे, जुन अलमुताइरीले हिजाेकाे खेलमा अपनाए ।

प्रशिक्षक अलमुताइरीको प्रशिक्षणमा नेपालले खेलेको यो पहिलो अन्तर्राष्ट्रिय प्रतियोगिता हो । अलमुताइरीले विश्वकप २०२२ को अर्को चरण प्रवेश गर्न नसके पनि समूह चरणको चौथो स्थान पक्का गर्दै एएफसी एसियन कप छनोटमा अवसर पाउने लक्ष्य रहेको बताउँदै आएका छन् ।

अब नेपालले बाँकी दुई खेल २४ जेठमा जोर्डन र २८ जेठमा अस्ट्रेलियासँग खेल्नेछ ।

यी हुन् नेपाली फुटबल टोलीका सदस्य

प्रशिक्षक : अब्दुल्लाह अलमुताइरी

गोलरक्षक : कप्तान किरणकुमार चेम्जोङ, विशाल सुनार, दीप कार्की ।

रक्षक : रोहित चन्द, अनन्त तामाङ, सुमन अर्याल, विकास खवास, गौतम श्रेष्ठ, दिनेश राजवंशी ।

मिडफिल्डर : मनीष डाँगी, सन्तोष तामाङ, पुजन उपरकोटी, आयुस घलान, सुमन लामा, सुरज जिउ ठकुरी, एरिक विष्ट, कमल थापा, सुनील बल, विशाल राई ।

स्ट्राइकर : अञ्जन विष्ट, अभिषेक रिजाल, नवयुग श्रेष्ठ, आशिष लामा, सुमन लामा ।

व्यवस्थापक : मधुसुदन उपाध्याय ।

तस्वीर स्राेतः एन्फा

प्रकाशित मिति: शुक्रबार, जेठ २१, २०७८ ११:१७