अब विदेशबाट आएका नेपाली कामदारले ५ दिन अनिवार्य होटल क्वारेन्टाइन बस्नुपर्ने, अन्यलाई १० दिन

अब विदेशबाट आएका नेपाली कामदारले ५ दिन अनिवार्य होटल क्वारेन्टाइन बस्नुपर्ने, अन्यलाई १० दिन

A+ A A-

सरकारले नेपाली तथा विदेशी नागरिकहरू नेपाल आउँदा पालना गर्नुपर्ने मापदण्ड सार्वजनिक गरेको छ । नयाँ मापदण्डअनुसार अब खाडी मुलुक र मलेसियामा वैदेशिक रोजगारीमा गएका नेपाली श्रमिक नेपाल आउँदा पाँच दिन होटल क्वारेन्टाइन बस्नुपर्ने भएको छ ।

मापदण्डअनुसार वैदेशिक रोजगारीबाट फर्किने नेपालीलाई होटल क्वारेन्टाइनमा बसी पीसीआर परीक्षणबाट नेगेटिभ रिपोर्ट आएपछि थप १० दिन होम क्वारेन्टाइनमा बस्ने गरी घर–गन्तव्यमा जान दिइनेछ ।

आकस्मिक अवस्थामा बाहेक विदेशबाट आउने अन्य यात्रु (नेपाली–विदेशी) लाई भने अनिवार्य १० दिन होटल क्वारेन्टाइनको प्रावधान दोहोरिएको छ । नेपाल आउँदा साथमा ७२ घण्टायताको नेगेटिभ रिपोर्ट साथमा हुनुपर्छ । यात्रुको साथमा १० दिन होटल बुकिङ गरेको प्रमाण पनि चाहिन्छ ।

सरकारले भारतमा साताको दुई र अन्य तीन मुलुक चीन, कतारमा साताको एक/एकवटा दुईतर्फी उडान गर्न सक्ने गरी अनुमति खुला गरेसँगै त्यहाँबाट आउने यात्रुलाई लक्षित गर्दै मापदण्ड बनाएको हो ।

त्यसरी हवाईमार्गबाट आएका यात्रुको होटल क्वारेन्टाइनको खर्च भने यात्रु स्वयम्‌ले बेहोर्नुपर्ने बताइएको छ । १० दिन होटल क्वारेन्टाइनपछि भने कोरोनाको लक्षण देखिएका व्यक्तिले पीसीआर परीक्षण गर्नुपर्छ । पीसीआर परीक्षण गर्दा रिपोर्ट पोजिटिभ आएमा १० दिन आइसोलेसन सेन्टर, अस्पताल वा तोकिएको होटलमै बस्नुपर्नेछ ।

कूटनीतिक नियोगका पदाधिकारी, कर्मचारी र उनीहरूको परिवारका सदस्यलाई नियोगको सिफारिसमा जान दिइनेछ ।

१० दिनसम्म बसेपछि भने लक्षण नदेखिएका वा परीक्षणबाट रिपोर्ट नेगेटिभ आएका सबै यात्रु घर/गन्तव्यमा जान सक्नेछन् । तर, आफ्नो धर्म, रीतिरिवाज, परम्पराअनुसार आफन्तको अन्तिम संस्कार (काजक्रिया)मा सहभागी हुन विदेशबाट नेपाल आउने व्यक्तिको हकमा भने स्थानीय तहको सिफारिसमा कम्तीमा १० दिन अनिवार्य होम क्वारेन्टाइनमा बस्ने गरी जान दिइनेछ ।

दीर्घरोगी, शारीरिक रूपमा अशक्त र बिरामीसँगै आएका कुरुवाको हकमा अस्पतालबाट घटना पुष्टि हुने कागजात र स्थानीय तहको सिफारिसका आधारमा १० दिन होम क्वारेन्टाइनमा बस्ने गरी जान दिइनेछ ।

७५ वर्षमाथिका ज्येष्ठ नागरिक, पाँच वर्षमुनिका नाबालक र नाबालकका आमा–बुबाको हकमा स्थानीय तहको सिफारिसमा कम्तीमा १० दिन क्वारेन्टाइनमा बस्ने गरी जान दिइनेछ ।

कोभिड नियन्त्रणमा खटिन आउने विदेशमा काम गरिरहेका स्वास्थ्यकर्मी, स्वास्थ्यसम्बन्धी अध्ययन पूरा गरेका वा अध्ययन गरिरहेका नेपालीलाई स्वास्थ्य मन्त्रालयको सिफारिसमा तोकिएको गन्तव्यमा १० दिन क्वारेन्टाइनमा बस्ने गरी जान दिइने भएको छ ।

ठमेल, सुन्धारा, गोंगबु र कलंकी घना बस्ती भएका क्षेत्रमा पर्ने भएकाले कोरोना संक्रमण नियन्त्रण गर्न ती क्षेत्रका होटललाई क्वारेन्टाइन होटलका रूपमा सूचीकृत नगर्ने निर्णय सरकारले गरेको छ । होटल क्वारेन्टाइनका लागि होटलको सूचीकरण गर्ने जिम्मा पर्यटन विभागको सिफारिसमा नेपाल पर्यटन बोर्डले पाएको छ ।

प्रकाशित मिति: मंगलबार, जेठ १८, २०७८ १७:३४