निर्वाचन आयोगले खोलिदियो जसपा लुम्बिनीका चार सांसदलाई मत हाल्ने बाटो

A+ A A-

जनता समाजवादी पार्टीले लुम्बिनी प्रदेश सांसदबाट हटाएका चार सांसदले सोमबार हुने राष्ट्रियसभा सदस्यको उपनिर्वाचनमा भोट हाल्न पाउने भएका छन् ।

निर्वाचनको अघिल्लो दिन आइतबार निर्वाचन आयोगले मुख्यमन्त्री शंकर पोखरेल नेतृत्वको सरकारमा रहेका जसपाका चार सांसदलाई मत हाल्ने अधिकार दिएको हो ।

जसपाबाट मुख्यमन्त्री पोखरेल नेतृत्वको सरकारमा रहेका सन्तोष कुमार पाण्डेय, कल्पना पाण्डे लम्साल, विजयबहादुर यादव र सुमन शर्मा रायमाझीलाई अन्तिम समयमा मतदानको अधिकार आयोगले दिएको जिल्ला निर्वाचन कार्यालय दाङका सूचना अधिकारी गेहेन्द्र कुँवरले जानकारी दिए ।

प्रदेशका ८७ प्रदेशसभा सदस्यमध्ये अब ८३ जनाले मात्रै मतदानमा सहभागी हुन पाउने छन् । अन्य ५ जना भने विभिन्न दलबाट कारबाहीमा परेकाले मतदानमा सहभागी हुन पाउने छैनन् ।

लुम्बिनी प्रदेशसभातर्फ रिक्त रहेको राष्ट्रियसभा सदस्य उपनिर्वाचन भोलि सोमबार हुँदैछ । उपनिर्वाचनमा एमालेका तर्फबाट चन्द्रबहादुर खड्का र विपक्षी गठबन्धनका तर्फबाट कांग्रेसका दृगनारायण पाण्डे उम्मेदवार बनेका छन् ।

दाङका खड्का माओवादी पार्टी परित्याग गरी एमालेमा प्रवेश गरेपछि एमालेबाट राष्ट्रियसभा उपनिर्वाचनमा टिकक पाएका हुन् । यस्तै, लुम्बिनी प्रदेशसभा सदस्यबाट राजीनामा दिएर कांग्रेस प्रवेश गरेका पाण्डेलाई कांग्रेससहित माओवादी केन्द्र, जनता समाजवादी पार्टी उपेन्द्र यादव समूह र जनमोर्चाको समर्थन छ ।

मतदानमा लुम्बिनी प्रदेशका नगरपालिका प्रमुख, उपप्रमुख, गाउँपालिका अध्यक्ष र उपाध्यक्ष गरी २ सय १७ मतदान गर्नेछन् ।

यस्तो छ अंकगणित

लुम्बिनी प्रदेशमा रहेका १ सय ९ स्थानीय तहतर्फ नेकपा एमालेका ९१ जना जनप्रतिनिधि छन् । त्यसैगरी कांग्रेसका ६४, नेकपा माओवादी केन्द्र ३९, जसपा १३, राष्ट्रिय जनमोर्चा ५, राप्रपा २ र स्वतन्त्र ४ जना रहेका छन् ।

लुम्बिनीमा एक गाउँपालिका अध्यक्ष पद खाली छ । पश्चिम नवलपरासीको प्रतापपुर गाउँपालिकाका अध्यक्ष राजकुमार शर्माको दुर्घटनामा परेर मृत्यु भएपछि उक्त स्थान रहेको हो । यता प्रदेशसभामा भने एमालेका ३८ सांसद छन् । मुख्यमन्त्री पोखरेल नेतृत्वको सरकारमा सामेल भएका जसपाका (महन्थ पक्षधर) का चारसहित ४२ सांसद एमालेका पक्षमा छन् । लुम्बिनी प्रदेशसभा माधव नेपाल समूह पक्षका दुई जना सांसद छन् भने स्थानीय तहमा १५ भन्दा बढी रहेको बताइएको छ ।

त्यस्तै प्रदेशसभामा कांग्रेसका १९, माओवादी केन्द्रका १८, राष्ट्रिय जनमोर्चा १, जसपा उपेन्द्र पक्षका २ जना सांसद छन् । राष्ट्रियसभा सदस्यको निर्वाचनमा मतभार प्रदेशको १ बराबर ४८ र स्थानीय तहको १ बराबर १८ हुन्छ । लुम्बिनी प्रदेश सरकारका प्रवक्ता बैजनाथ चौधरीले एमाले एक्लैको स्पष्ट बहुमत नभएकाले स्वतन्त्र र राप्रपाको मतले एमालेका उम्मेदवार खड्का विजयी हुने विश्वास व्यक्त गरे ।

यता गठबन्धनले भने आफूहरुको विजयी सुनिश्चित भएको बताएको छ । कांग्रेस लुम्बिनी प्रदेशसभाका प्रमुख सचेतक फकरुद्दिन खानले एमालेसँग बहुमत नभएकाले गठबन्धनको तर्फबाट उम्मेदवार बनेका पाण्डेको विजयी निश्चित रहेको बताए ।

प्रकाशित मिति: आइतबार, जेठ १६, २०७८ १८:४१