बजेटले पटक–पटक भन्यो– झापा अनि दमक, के हुँदै छ ओलीको गृहनगरमा ?

A+ A A-

संसद् विघटन गरेर अध्यादेशमार्फत ल्याइएको बजेट शनिबार अर्थमन्त्री विष्णु पौडेलले प्रधानमन्त्रीसहित अन्य मन्त्री र वर्तमान सरकार अन्य केही सरकारी अधिकारीलाई साक्षी राखेर सिंहदरबारमा वाचन गरे ।

बजेट वाचनका क्रममा कतिपय जिल्लाको नामै आएन । अधिकांश स्थानीय तहको नाम आउने कुरा पनि भएन । तर, पटक-पटक नाम आइरह्यो– झापा दमकको । प्रधानमन्त्री केपी शर्मा ओली दमकमा पर्ने झापा ५ बाट प्रतिनिधिसभामा निर्वाचित भएका हुन् ।

बजेट विनियोजन गर्दा अघिल्ला वर्षहरूमा पनि झापालाई प्राथमिकतामै राखिएको थियो । अहिले पनि बजेट भाषणका क्रममा सबैभन्दा बढी नामा झापा र दकमकै आयो ।

के-के गरिँदै छ दमकमा ?

बजेटको ८८ नम्बर बुँदामा भनिएको छ : बजेटमा बालबालिकाको अन्तरनिहित प्रतिभा प्रस्फुटन गराई बहुआयामिक विकास गर्न दमकमा गुणस्तरीय शिक्षासहितको चिल्ड्रेन प्याराडाइज स्थापना गरिनेछ ।

२७० नम्बर बुँदामा भनिएको छ : दमक शहरमा ढल प्रशोधन निर्माण सम्पन्न गरिनेछ ।

३४७ नम्बर बुँदामा भनिएको छ : झापाको दमकमा बहुतले बसपार्कसहित सिटी पार्क निर्माण गरिनेछ ।

१८० नम्बर बुँदामा भनिएको छ : झापाको दमकमा औद्योगिक क्षेत्र स्थापना गर्न सम्भाव्यता अध्ययन गरिनेछ । औद्योगिक क्षेत्रको पूर्वाधार निर्माण र व्यवस्थापनमा अन्तर्राष्ट्रिय लगानीकर्तालाई आकर्षित गरिनेछ ।

२५२ बुँदामा भनिएको छ : झापाको दमकमा अन्तर्राष्ट्रियस्तरको मदन भण्डारी रङ्गशाला निर्माण गरी दुई वर्षभित्र सञ्चालनमा ल्याइनेछ ।

शनिबार अध्यादेशबाट ल्याइएको बजेट प्रस्तुत गर्दै अर्थमन्त्री विष्णु पौडेल र सहभागी प्रधानमन्त्री केपी शर्मा ओली र अन्य मन्त्रीहरू (फोटो : प्रधानमन्त्रीको सचिवालय)

१३३ नम्ब बुँदामा भनिएको छ : झापादेखि कञ्चनपुरसम्मको चुरे पहाडको भावरक्षेत्रमा कोशी, गण्डकी, कर्णाली एवम् तिनका सहायक नदी प्रणालीलाई अन्तरआवद्ध गरी नहर निर्माण गर्न सम्भाव्यता अध्ययनका लागि बजेट विनियोजन गरिएको छ ।

११४ बुँदामा भनिएको छ : दुई वर्षभित्र झापाको चन्द्रडाँगीमा कृषि फार्मलाई सेन्टर अफ एक्सिलेन्सको रूपमा विकास गरी सञ्चालनमा ल्याइनेछ ।

४१६ नम्बर बुँदामा भनिएको छ : झापाको चन्द्रगढीमा उच्चस्तरीय प्रशिक्षण प्रतिष्ठान स्थापना गरिनेछ ।

१३१ नम्बर बुँदामा भनिएको छ : झापाको भद्रपुमा नदी कटानबाट संरक्षण गर्न बजेट विनियोजन गरिएको छ ।

१२७ नम्बर बुँदामा भनिएको छ : झापालगायतका २५ जिल्लामा ५ हजार स्यालो ट्युबवेल र २ सय डिप ट्युबवेल जडानका लागि बजेट विनियोजन गरिएको छ ।

१२३ नम्‍बर बुँदामा भनिएको छ : सुरुङको माध्यमबाट एक नदीको पानी अर्को नदीमा पथान्तरण गरी खानेपानी, सिँचाइ र विद्युत्‌का लागि बहुउद्देश्यीय प्रयोग गर्न सम्भावनायुक्त नदी पथान्तरण आयोजना सञ्चालन गरी झापादेखि कञ्चनपुरसम्म सिँचाइ सुविधा विस्तार गर्न बजेट विनियोजन गरिएको छ ।

स्थानीय तहले गर्न सक्ने सामान्य १ करोड रुपैयाँका कार्यक्रमदेखि अर्बौंका आयोजना पनि झापामा पारिएको छ । यसले झापाप्रतिको मोह देखाउँछ । यसले पनि बजेट वितरणमुखी र निर्वाचन केन्द्रित देखाइएको छ । पूर्वप्रशासक तथा अर्थविद् विमल कोइराला वित्तीय अनुशासन नाघेर पूर्णत: सरकारले वितरणमुखी र मतदाता रिझाउने बजेट ल्याएको बताउँछन् ।

उनले अब आउने सरकारलाई अप्ठेरो पार्ने गरी बजेट ल्याइएको टिप्पणी गरे । ‘वित्त अनुशासन कायम नभएपछि यी काम पूरा गर्न अर्को सरकारलाई पनि हम्मेहम्मे पर्छ । त्यसैले यो सरकारले आफूले त भताभुङ्ग पार्‍यो पार्‍यो, अर्कोलाई पनि दायित्व थपेर गयो । यसरी बजेट ल्याउन हुँदैनथ्यो,’ कोइरालालेले भने ।

नेपाली कांग्रेसका नेता बालकृष्ण खाँण सरकारले बजेट नभई केपी ओली पार्टीको महत्त्वाकांक्षी चुनावी घोषणापत्र प्रस्तुत गरिएको टिप्पणी गर्छन् ।

सरकारले आगामी वर्षका लागि प्रस्तुत गरेको १६ खर्ब ४७ अर्बको बजेटमा ५ खर्ब ५९ अर्ब बढी ऋण उठाउने लक्ष्य राखिएको छ भने ६३ अर्ब अनुदान आउने कल्पना गरिएको छ । यसका बीच महत्त्वाकांक्षी राजस्व लक्ष्य देखाएर वितरणमुखी र मतदाता रिझाउने कार्यक्रमलाई केन्द्रित गरेको देखिएको छ ।

प्रकाशित मिति: आइतबार, जेठ १६, २०७८ १३:३१