सधैँ बजेट आउने तर अहिलेसम्म जग्गा किन्‍न नसक्‍ने सुर्खेत मेडिकल कलेज

A+ A A-

आर्थिक वर्ष २०७२/२०७३ बाट नियमित बजेट भाषणमा सुनिने सुर्खेत मेडिकल कलेजले अहिलेसम्म पनि जग्गा प्राप्ती गर्न सकेको छैन । आर्थिक वर्ष २०७८/७९ को बजेट प्रस्तुत गर्दै अर्थमन्त्री विष्णुप्रसाद पौडेलले पनि सुर्खेतमा मेडिकल कलेज स्थापना गर्ने बजेट भाषण गरेका छन् ।

सुर्खेतमा मेडिकल कलेज बनाउनका लागि २०७६ जेठमा सुर्खेतमा पूर्वाधार विकास कार्यालय स्थापना गरेको थियो । तर, वर्ष दिन बितिसक्दा पनि मेडिकल कलेज स्थापनाको कुनै प्रक्रिया अघि बढेको छैन ।

सुर्खेतमा नै मेडिकल कलेज स्थापना गर्नका लागि संघीय सरकारले गत आर्थिक वर्षमा १० करोड रकम वजेट विजियोजन गरेको थियो । चालु आर्थिक वर्षमा बजेट विनियोजन कार्यान्वयनमा आउन सकेको छैन ।

सुर्खेत मेडिकल कलेज पूर्वाधार निर्माण विकास आयोजनाले शिक्षण अस्पताल र प्राज्ञिक भवन अलग–अलग स्थानमा सञ्चालन गर्न तयारी थालेको आयोजनाका प्रमुख जीतबहादुर शाहले बताए ।

‘वीरेन्द्रनगर–११, १२ र १३ का ६ वटा सामुदायिक वनक्षेत्रको अध्ययन भइरहेको छ,’ उनले भने, ‘शिक्षण प्रयोजनका लागि प्रदेश अस्पताल कालागाउँ र आवासीय, प्रशासनिक तथा अन्य प्राज्ञिक प्रयोजनका लागि गाग्रेताल वन क्षेत्रमा भवनहरू बनाइने योजना रहेको छ ।’

तत्कालीन शिक्षामन्त्री दिनानाथ शर्माले मेडिकल कलेज स्थापनाका लागि एक कार्यदल बनाएर दुई महिनाभित्र विस्तृत अध्ययन प्रतिवेदन बुझाउन निर्देशन दिएको र जग्गा तथा पूर्वाधार पहिचान गरी भोगाधिकार प्राप्तिका लागि सिफारिस गर्ने, पूर्वाधार तथा सम्भाव्यताको अध्ययन गरी शिक्षा मन्त्रालयलमा विस्तृत अध्ययन प्रतिवेदन पेश गर्ने र स्थानीयस्तरमा समन्वय गरेर पूर्वाधार विकासका लागि तयार गर्न भनेर निर्देशन दिएको मेडिकल कलेज पूर्वाधार विकास समितिले जनाएको छ ।

तर, प्रत्येक आर्थिक वर्षमा मेडिकल कलेज स्थापना गर्ने बजेट भाषणमा आउने गरेको भए पनि हालसम्म कहाँ बनाउने भन्ने टुङ्गो लगाउन सकेको छैन ।

प्रकाशित मिति: शनिबार, जेठ १५, २०७८ २१:३०