प्रदेश २: आईसीयू र भेन्टिलेटर नपाएर बिरामी ज्यान गुमाउँदै, सरकारको ध्यान बारुणयन्त्र र मन्दिरमा

प्रदेश २: आईसीयू र भेन्टिलेटर नपाएर बिरामी ज्यान गुमाउँदै, सरकारको ध्यान बारुणयन्त्र र मन्दिरमा

A+ A A-

प्रदेश २ सरकारले नौवटा वारुण यन्त्र किनेको छ । आन्तरिक मामिला तथा कानुन मन्त्रालयले किनेको बारुणयन्त्र बिहीबार जनकपुर आइपुगेको छ ।

प्रदेशका आठवटा जिल्ला प्रशासन कार्यालयलाई र एउटा प्रदेश प्रहरीका लागि गरी नौवटा बारुणयन्त्र किनेको मन्त्रालयका प्रवक्ता अवधकिशोर कुशवाहाले जानकारी दिए ।

उनका अनुसार भक्तपुरस्थित नेश्‍नल फ्यारेन सिफ प्रालिबाट प्रतियन्त्र ५३ लाख रुपैयाँका दरले खरिद गरिएको हो । सम्भावित आगलागीका घटना तत्काल नियन्त्रण र क्षति कम गर्ने उद्देश्यले बारुणयन्त्र खरिद गरिएको उनले बताए ।

यद्यपि कोरोना महामारीमा अस्प्तालमा आईसीयू बेड, भेन्टिलेटर अभावमा उपचार नपाएर बिरामीको मृत्यु भइरहेको बेला प्रदेश सरकारले बारुणयन्त्र खरिद गरेको भन्दै चौतर्फी आलोचना भइरहेको छ ।

बारुणयन्त्रसमेत आवश्यक भए पनि समय अनुकूल स्वास्थ्य क्षेत्र तथा महामारीलाई बेवास्ता गरेको भन्दै सरकारको आलोचना भएको हो । प्रदेश सरकारले संवेदनहीन भएको भन्दै समाजिक सञ्जालमा सर्वसाधारणदेखि स्वास्थ्यकर्मी र राजनीतिक व्यक्तिले समेत सरकारको आलोचना गरेका छन् ।

सत्तारुढ जसपाका सांसद उपेन्द्र महतोले प्रदेश सरकारको काम गर्ने शैलीमाथि प्रश्न उठाउँदै सरकारको कामले आगो लाग्ने टिप्पणी गरेका छन् ।

'प्रदेश सरकारलाई थाहा छ कि जुन हिसाबले प्रदेश सरकारले काम गरिरहेको छ, प्रदेशमा आगो लाग्ने निश्चत छ । त्यसैले यस्तो महामारीका समयमा पनि स्वास्थ्य सामग्रीको सट्टा दमकल किनेको छ', उनले समाजिक सञ्जालमा लेखेका छन् ।

प्रदेश सरकारको चालु वर्षको बजेटमै बारुणयन्त्र खरिदको लागि रकम विनियोजन गरिएको मन्त्रालयका प्रवक्ता कुश्वाहाले बताए । ७ महिनाअघि नै टेण्डर भए पनि खरिद प्रक्रियामा ढिलाइ भएको उनले दाबी गरे ।

यसअघि महामारीकै बेला कोरोना नियन्त्रण, स्वास्थ्य उपकरण खरिद तथा अस्पताल व्यवस्थापन छोडेर प्रदेशका समाजिक विकासन्त्री नवल किशोर साह, उद्योग पर्यटन वन तथा वातावरणमन्त्री राम नरेश राय मन्दिर निरीक्षण र राज्यमन्त्री सुरेश मण्डलले मन्दिर शिलान्यासलाई प्राथमिकता दिएपछि चौतर्फी आलोचना भएको थियो ।

प्रकाशित मिति: शुक्रबार, जेठ १४, २०७८ २०:०५