सप्तरीका शिक्षक हत्या आरोपी दुई वर्षमा समातिए, साता नबित्दै धरौटीमा छुटे

A+ A A-

सप्तरीको राजविराज नगरपालिका–७ खर्साल टोलमा भएको शिक्षक हत्या घटनाका अर्का आरोपी पनि पक्राउ परेको साता दिन नबित्दै धरौटीमा छुटेका छन् ।

सप्तरी जिल्ला अदालतबाट आइतबार भएको थुनछेक आदेशले ३ लाख रुपैयाँ धरौटी तिरेर वडा नम्बर ७ कै ४० वर्षीय आरोपी टुनटुन भनिने सुभाष चन्द्र यादव छुटेका हुन् । न्यायाधीश प्रेमबहादुर न्यौपानेको आदेशअनुसार हत्याका आरोपी यादवले धरौटी तिरेर रिहा भएको अदालतका सूचना अधिकारी हेमबहादुर बुढाथोकीले बताए ।

१० असार २०७६ को बिहान २ बजे तिरहुत गाउँपालिका–२ गोइठी घर भई राजविराज नगरपालिका–२ स्थित पिस जोन मोडेल स्कुलमा अध्यापन गरिरहेका २५ वर्षीय भट्टराई भनिने जयकृष्ण बिराजीको हत्या भएको थियो ।

छोरालाई आठ जनाको समूहले कुटपिट गरी हत्या गरेको भन्दै मृतक बिराजीका बुवा उपेन्द्रप्रसाद यादवले ११ असारमा जिल्ला प्रहरी कार्यालयमा उजुरी दिए । १२ असारमा उजुरी दर्ता भएसँगै प्रहरीले घटनाको अनुसन्धान सुरु गरेका थिए ।

अनुसन्धानकै क्रममा यादवलाई यही ४ जेठमा घरमै लुकिछिपी बसिरहेको अवस्थामा पक्राउ गरिएको जिल्ला प्रहरी कार्यालय सप्तरीका प्रहरी नायव उपरीक्षक माधवप्रसाद काफ्लेले बताए । ‘हामीले पक्राउ गरेपछि यादवलाई जिल्ला अदालतमा पेश गरेका छौँ,’ उनले भने ।

यसअघि पनि गत ५ चैतमा प्रहरीले सोही घटनाका आरोपमध्ये राजविराज नगरपालिका–७ कै २४ वर्षीय श्रवणकुमार महेतालाई ईलाका प्रहरी कार्यालय धरान सुनसरीबाट खटिएको प्रहरी टोलीले सुनसरीको धरान उपमहानगरपालिका–८ तीनकुनेबाट पक्राउ गरेका थिए । मेहता पनि धरौटीमै छुटेका छन् ।

गत ३० चैतमा सोही अदालतबाट भएको आदेशअनुसार मेहताले २ लाख रुपैयाँमा धरौटी तिरेर छुटेको प्रहरी नायव उपरीक्षक काफ्लेले बताए । घटनाका अन्य पाँच जना आरोपी अझै फरार छन् । उनीहरूको खोजी कार्य भइरहेको र आरोपीमाथि थप अनुसन्धान भइरहेको प्रहरीले जनाएको छ ।

प्रकाशित मिति: मंगलबार, जेठ ११, २०७८ १४:२८