कोरोनाको साइड इफेक्ट : 'रक्त सञ्चार बन्द हुनसक्छ'

A+ A A-

४० वर्षे रमेश गौतम (परिवर्तित नाम) लाई १६ वैशाखमा कोरोना संक्रमण देखियो । पहिलेदेखि नै मधुमेहका रोगी गौतम ज्वरो, खोकी र श्वास फेर्न गाह्रो भएपछि २१ वैशाखमा उपचारका लागि बलम्बुस्थित सशस्त्र प्रहरी अस्पताल पुगे ।

कोरोना निको भएर ३१ वैशाखमा अस्पतालबाट डिस्चार्ज भएका उनलाई अर्को गम्भीर समस्या देखियो । उनको बायाँ गोडामा रक्तसञ्चार रोकियो । गोडाको उपचारका लागि उनलाई मनमोहन कार्डियोथेरासिक भास्कुलर तथा ट्रान्सप्लान्ट सेन्टर पुर्‍याइयो ।

मनमोहन अस्पताल पुर्‍याउँदा ढिला भइसकेको थियो । उनको खुट्टा नै काट्नुपर्‍यो । संक्रमित भएर सशस्त्र प्रहरी अस्पतालमा रहँदा नै उनको खुट्टामा समस्या देखिइसकेको थियो ।

कोरोना भाइरसले रगत बाक्लो बनाउँदा रक्त सञ्चारमा समस्या आउने बताउँछन् चिकित्सकहरू । टेकुस्थित शुक्रराज ट्रपिकल तथा सरुवा रोग अस्पतालका चिकित्सक डा. अनुप बाँस्तोलाका अनुसार भाइरस र त्यसविरुद्ध शरीरले प्रतिरोध गर्दा लाग्ने शक्तिका कारण रगत बाक्लो हुन्छ । कतिपय अवस्थामा त रगत जम्छ पनि ।

टेकु अस्प्तालमै पनि एक जना बिरामीको हातमा रक्तसञ्चार अवरोध भएको सुनाउँछन् डा. बाँस्तोला । चिकित्सकहरूका अनुसार कोभिडले रगत बाक्लो बनाउँदा मुटुबाट शरीरका अन्य अंगमा रगत पठाउने नशामा अवरोध हुन्छ । त्यसपछि हात, खुट्टालगायतका अंगमा समस्या देखिन्छ । शरीरबाट मुटुमा रगत पठाउने नशामा अवरोध भएमा मुटुमा समस्या देखिने बताउँछन् चिकित्सकहरू । कोरोना संक्रमित कतिपय बिरामी मुटुमा पर्याप्त रगत नपुगेर मरेका छन् ।

वीर अस्पतालका डा. राजेन्द्र भण्डारी गम्भीर प्रकृतिका संक्रमितमा यस्तो समस्या देखिने बताउँछन् । रगत जम्ने समस्या नहोस् भनेरै कोरोना संक्रमित व्यक्तिलाई अस्पताल पुर्‍याउनेबित्तिकै हेपारिन नामक रगत पातलो बनाउने औषधि दिने गरिएको बताउँछन् डा. बाँस्तोला ।

बेलायतस्थित अक्सफोर्ड एकेडेमिकको जर्नल अफ सर्जिकल केस रिपोर्टमा प्रकाशित रिपोर्ट अनुसार कोभिड-१९ को संक्रमणले श्वासप्रश्वासमा मात्र नभई संक्रमित व्यक्तिमै पहिलेदेखि रहेको रोगलाई बल्झाउने गर्छ । जसका कारण संक्रमित व्यक्तिको शरीरका विभिन्न अंगले काम गर्न छाड्छन् । उक्त रिपोर्टअनुसार हात, खुट्टा र औँला मात्र नभई आँखा, मस्तिष्क र शरीरका अन्य अंगमा पनि यसको असर पर्न सक्छ ।

कस्ता व्यक्तिमा देखिन्छ यस्तो समस्या

रगत जम्ने र त्यही कारणले हातखुट्टा काट्नु पर्ने वा मृत्यु नै हुने सम्भावना थोरै व्यक्तिमा देखिने बताउँछन् डा. बाँस्तोला । डा. बाँस्तोलाका अनुसार अत्याधिक धुमपान, मद्यपान गर्ने व्यक्तिलाई कोरोना संक्रमण भएमा यस्तो समस्या देखिन सक्छ । शारीरिक अभ्यास कम गर्ने, मोटोपना भएका व्यक्तिमा समेत रगत जम्ने, नशा बन्द हुने सम्भावना हुने उनी बताउँछन् ।

ह्याम्स अस्पतालका डा. बद्रि रिजालका अनुसार मधुमेह, मुटु वा नशासम्बन्धी रोग भएकालाई कोरोना संक्रमण भएमा रगत जम्ने समस्या देखिन सक्छ । यस्तो रोग भएका कतिपय बिरामीको त रक्तनली नै बन्द भएर मृत्यु पनि हुने बताउँछन् डा. रिजाल । शरीरका अंगमा रगत सञ्चार नभएपछि ति अंगमा संक्रमण भएर काट्नुपर्ने अवस्था पनि आउने उनी सुनाउँछन् ।

प्रकाशित मिति: मंगलबार, जेठ ११, २०७८ १४:१७