दुई वर्षदेखि एउटै कक्षा पढ्न बाध्य विद्यार्थी, भन्छन्- त्रिविको लापर्बाहीले हामीलाई डुबायो

दुई वर्षदेखि एउटै कक्षा पढ्न बाध्य विद्यार्थी, भन्छन्- त्रिविको लापर्बाहीले हामीलाई डुबायो

A+ A A-

पशुपति बहुमुखी क्याम्पसकी अलिसा दुलाल स्नातक तहमा भर्ना भएको दुई वर्ष टेक्यो । उनी अहिले स्नातक तह दोस्रो वर्षको परीक्षाको तयारीमा जुटिरहनुपर्ने हो । तर, प्रथम वर्षकै परीक्षा कुर्दाकुर्दै दिक्क भइसकिन् ।

अलिसालाई यस्तो परिबन्दको कारण कोरोना महामारी मात्र हो भन्ने पटक्कै लाग्दैन । यो परिस्थिति निम्तिनुमा महामारीसँगै त्रिविको लापर्बाही पनि जिम्मेवार रहेको उनको ठम्याइ छ । हुनपनि अन्य विश्वविद्यालयका सँगैका साथीहरू माथिल्लो कक्षा पुगिसकेका छन्। त्रिविले भने आफूहरूलाई किन अल्झाइरहेको छ भन्ने उनी जान्दिनन् ।

‘यसमा महामारीको मात्र दोष छैन । त्रिविको पनि लापर्बाही ज्यादा भयो,’ उनी भन्छिन्, ‘हामीसँगै पढेका अरु विश्वविद्यालयका साथीहरूको रोकिएको छैन त । हाम्रोमात्र किन रोक्ने ?’

काभ्रे पाँचखालदेखि स्नातक तह पढ्न भनेर २०७६ मा काठमाडौं झरेकी अलिसाको दुई वर्ष बित्दा पनि प्रथम वर्षको वार्षिक परीक्षा भएको छैन । छेउछाउका साथीहरूको चाहिँ निरन्तर पढाइ, परीक्षा चलिरहेको देखेपछि बाआमाले पनि गाली गर्न थालेको उनी बताउँछिन् । बाआमाको भनाइ उदृत गर्दै उनी सुनाउँछिन्, ‘कस्तो कलेजमा भर्ना गरिस् तैले ? सँगैका साथीहरू पढिरहेका छन्, अब तेरोमात्र रोकिन्छ ?’

त्यस्तै सर्लाहीको जनता क्याम्पसमा पढ्ने अनिता बुढाथोकी पनि त्रिविको लापर्बाहीले आफूहरू बिलखबन्दमा परेको बताउँछिन् । त्रिविले भर्खरै साउन मसान्तभित्रै परीक्षा गर्ने तयारीमा रहेको भनेर विज्ञप्ति निकालेको छ । तर, विगतमा धेरैवटा यस्ता विज्ञप्ति निरर्थक बनेकाले अहिलेपनि भर गर्ने स्थिति नरहेको उनी बताउँछिन् ।

‘यतिबेला तेस्रो वर्षमा जाने हाम्रो तयारी हुन्थ्यो । तर, त्रिविले कुनै विकल्प नसोच्नाले प्रथम वर्षमै अड्किनु परेको छ’, उनले भनिन् । क्याम्पसले अनलाइनबाटै कोर्स सक्काए पनि परीक्षा नहुँदा अलमलमा परेको उनको भनाइ छ ।

अनिताजस्तै हुम्लाकी सुरुची दाहाल पनि काठमाडौंकै पब्लिक युथ क्याम्पसमा पढ्छिन् । हाल उनी लकडाउनका कारण गाउँमा छिन् । उनको भर्ना गरेको रजिस्ट्रेसन नम्बर पनि क्याम्पसमै छ । उनीजस्ता धेरै साथीहरूको उक्त कार्ड क्याम्पसमै भएको उनी बताउँछिन् ।

तर, आइतबार त्रिविले परीक्षा फाराम खुलायो भनेपछि उनी तनावमा छिन् । त्रिविले अनलाइन माध्यमबाट फाराम भर्न सकिन्छ भन्दै विज्ञप्ति समेत निकालेको थियो । ‘पहिला परीक्षा भएन भन्ने तनाव थियो । अहिले एक्कासी फाराम खुलाइयो भन्छ,’ उनीले भनिन्, ‘अब मेरो रजिस्ट्रेसन कार्ड कलेजमा छ, म यता हुम्लामा छु । कलेज पनि बन्द छ, मैले कसरी फाराम भर्ने ?’

एकातिर परीक्षा हुने-नहुने अन्योल अर्कोतिर फाराम भर्दा झेल्नुपर्ने समस्याले जेलिएका छन् विद्यार्थी । तर, त्रिविले भने स्पष्ट रूपमा अझै विकल्प दिन सकेको छैन ।

के अब साँच्चै परीक्षा हुन्छ ?

त्रिवि शिक्षाध्यक्ष शिवलाल भुसालका अनुसार साउन मसान्तभित्र परीक्षा गर्ने तयारी छ । तर, अनलाइनबाट लिने कि भौतिक उपस्थितिमा परीक्षा गराउने भन्नेबारे कुनै निर्णय भइसकेको छैन । ‘विद्यार्थीहरू कराइरहेका छन्, त्यसैले अब चाहिँ विकल्प दिनुपर्छ भनेर निर्णय गरेका हौं,’ उनले भने, ‘परीक्षा गरौँ भन्ने छ । तर, अनलाइनबाट हुन्छ कि फिजिकल्ली भन्ने परिस्थिति हेरेर निर्णय गर्छौं ।’

प्रकाशित मिति: सोमबार, जेठ १०, २०७८ १८:३४