प्रदेश २ : ठाकुर-महतो समूहका मन्त्रीलाई बर्खास्त गर्ने तयारी, दुई मन्त्रीले छोडे साथ

प्रदेश २ : ठाकुर-महतो समूहका मन्त्रीलाई बर्खास्त गर्ने तयारी, दुई मन्त्रीले छोडे साथ

A+ A A-

जनता समाजवादी पार्टी (जसपा) का अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराई समूहले अध्यक्ष महन्थ ठाकुरसहित चार नेतालाई स्पष्टीकरण सोध्ने निर्णय गरेसँगै प्रदेश २ को राजनीति तरंगित बनेको छ ।

उपेन्द्र-बाबुराम पक्षधर जसपाको कार्यकारिणी समितिको बैठकले पार्टी अध्यक्ष महन्थ ठाकुर, नेताहरू राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई स्पष्टीकरण सोध्ने र चित्तबुझ्दो जवाफ नआए पार्टीबाटै निष्कासन गर्ने निर्णयपछि प्रदेश २ को सत्ता समीकरण फेरबदल हुने निश्चितप्रायः भएको छ ।

जसपाको एकल सरकार रहेको प्रदेश २ मा ठाकुर र महतो पक्षधर मन्त्रीलाई हटाएर कांग्रेस, एमालेको माधव नेपाल समूह र नेकपा माओवादी माओवादी केन्द्र सम्मिलित गठबन्धनको सरकार निर्माणका लागि छलफल थालिएको छ ।

जसपा औपचारिक रूपमा विभाजित भए सत्ता सहकार्य सम्भव रहेको कांग्रेस, माओवादी केन्द्र र एमालेको नेपाल समूहले बताउँदै आएका छन् । ठाकुर-महतो पक्षधर भौतिक पूर्वाधारमन्त्री जितेन्द्र सोनल, राज्यमन्त्री डिम्पल झा, उद्योग पर्यटन वन तथा वातावरण राज्यमन्त्री सुरेश मण्डल र सामाजिक विकास राज्यमन्त्री अभिराम शर्मालाई हटाएर ती दलहरूसँग सत्ता सहकार्यको तयारी थालिएको जसपाका एक कार्यकारिणी सदस्यले जानकारी दिए ।

‘स्पष्टीकरण सोधिएका नेताले चित्तबुझ्दो जवाफ नदिए उहाँहरूलाई पार्टीबाट निष्कासन गर्ने निर्णय भएको छ । केन्द्रीय कार्यकारिणी समितिको बैठक नमान्ने मन्त्रीलाई पनि प्रदेश सरकारबाट हटाइनेछ,’ उनले भने । प्रदेश २ सरकारबाट हटाउने तयारी थालिएका मन्त्री सोनल, राज्यमन्त्री मण्डल र शर्मा महन्थ ठाकुरनिकट हुन् भने डिम्पल अनिल झाकी श्रीमती हुन् ।

विचार, भावना र संगठनिक नीति नमिल्नेसँग सत्ता सहकार्य हुनु अनिवार्य नरहेको भूमि व्यवस्था, कृषि तथा सहकारी राज्यमन्त्री समेत रहेका कार्यकारिणी सदस्य योगेन्द्र राय यादव बताउँछन् । यद्यपि प्रदेशका मन्त्री हटाउने-नहटाउने विषयमा निर्णय नभइसकेकाले केही बताउन नमिल्ने उनको भनाइ छ । ठाकुर र महतोले पार्टीको पद्धति र विधान मिचेर मनपरीतन्त्र र छाडातन्त्र मच्चाएको उनको आरोप छ ।

गत ४ जेठमा अध्यक्षद्वय महन्थ ठाकुर र उपेन्द्र यादवले ८ र ९ जेठका लागि कार्यकारिणी समितिको बैठक तय गरे पनि शुक्रबार अचानक अध्यक्ष ठाकुरले कोरोनाको कारण देखाउँदै बैठक स्थगित भएको विज्ञप्ति जारी गरेका थिए । तर, लगत्तै अध्यक्ष यादवले अर्को विज्ञप्ति जारी गरी बैठक स्थगित नभएको र निर्धारित मितिमा नै बैठक हुने विज्ञप्ति जारी गरेका थिए ।

सोही निर्णय अनुसार बसेको उपेन्द्र-बाबुराम समूहको कार्यकारिणी समितिको बैठकमा ३१ जना भौतिक र तीन जना भर्चुअल रूपमा बैठकमा सहभागी भएको राज्यमन्त्री यादवले जानकारी दिए । ‘बालुवाटार, सिंहदरबार र रिसोर्टमा मिटिङ, विभिन्न दूतावास धाउँदा उहाँहरूलाई कोरोना लाग्दैन तर पार्टीको बैठक बस्दा कोरोना लाग्छ ? उनले प्रश्न गरे ।

दुई मन्त्रीले छोडे महतो-ठाकुरको साथ

तत्कालीन राष्ट्रिय जनता पार्टीको तर्फबाट नियुक्त भएका सामाजिक विकासमन्त्री नवलकिशोर साह र उद्योग, पर्यटन, वन तथा वातावरणमन्त्री रामनरेश राय यादव समूहमा लागेका छन् । मन्त्री साह र राय दुवै जना शनिबार उपेन्द्र यादवले बोलाएको कार्यकारिणी समितिको बैठकमा समेत सहभागी भएका थिए ।

साह महतोको कोटाबाट मन्त्रीबाट मन्त्री बनेका थिए भने राय महिन्द्र राय यादवको कोटाबाट मन्त्री भएका थिए । महिन्द्र राय खुलेरै उपेन्द्र समूहमा लागेपछि मन्त्री राय बैठकमा सहभागी हुनु स्वाभाविकै हो । तर, मन्त्री साह बैठकमा सहभागी भएपछि ठाकुर-महतो पक्ष झस्किएको छ । यद्यपि मन्त्री साहलाई अझै रोक्ने प्रयास जारी रहेको महतोनिकट एक नेताले जानकारी दिए ।

सप्तरी क्षेत्र नम्बर १ को २ बाट प्रदेशसभा सदस्यमा तत्कालीन राजपाबाट निर्वाचित साह महतोको कोटाबाट मन्त्री बनेका हुन् । तर, मन्त्री बनेको एक वर्ष नबित्दै महतो र मन्त्री साहबीच खटपट सुरु भएको थियो ।

त्योसँगै कार्यसम्पादनसमेत राम्रो नभएको भन्दै मन्त्री साह र अर्का मन्त्री रायको आलोचना बढेको भन्दै तत्कालीन राजपाका अध्यक्ष मण्डलको जनकपुरमा बसेको बैठकबाट दुवैलाई हटाउने तयारी थियो । तर, महिन्द्र रायले मन्त्री रायलाई हटाउन नहुने अडान लिएपछि उनको पद जोगिएको थियो ।

हटाए सबै मन्त्रीलाई हटाउनुपर्ने नभए उनीहरूलाई निरन्तरता दिनुपर्ने अध्यक्ष यादवले अडान लिएका थिए । त्यसयता निरन्तर महतो र मन्त्री साहबीच खटपट हुँदै आएको छ । मन्त्रीमा निरन्तरता र आफ्नो राजीतिक भविष्य उपेन्द्रतिर लाग्दा सुरक्षित देखेर मन्त्री साहले समूह परिवर्तन गरेको उनीनिकट एक नेताले जानकारी दिए ।

प्रकाशित मिति: आइतबार, जेठ ९, २०७८ १६:४५