कांग्रेसले राष्ट्रपतिसमक्ष दाबी पेस गर्नु लज्जास्पद : शंकर पोखरेल

A+ A A-

संविधानको धारा ७६ (३) अन्तर्गतको सरकारमा जसपा तटस्थ रहने र धारा ७६ (५) अन्तर्गतको सरकारमा सहभागी हुने भएपछि प्रधानमन्त्रीले (३) अन्तर्गत विश्वासको मतको कोशिस नगरी मार्गप्रशस्त गर्नु भएको र (५) अन्तर्गतको सरकारमा जसपाको संस्थागत समर्थन प्राप्त भएपछि दाबी गर्नुभएको कुरा स्पष्ट छ ।

यसलाई विवादास्पद विषयका रूपमा चित्रण गर्नु संवैधानिक र कानुनी दृष्टिकोणवाट उचित होइन । राजनीतिक रूपमा जुन प्रक्रियाबाट सरकार दिन सकिन्छ त्यही प्रक्रियामा प्रवेश गर्नु स्वभाविक हो । विगतको सर्वोच्चको फैसलाले पनि त्यही निर्देश गरेको छ ।

यस्तो अवस्थामा संसदीय प्रणालीमा प्रतिबद्ध भएको दाबी गर्ने नेपाली कांग्रेसले सम्बन्धित दलको सहमतिबिना असंसदीय तरिकाले सांसदहरूको व्यक्तिगत रूपमा समर्थन छ भनेर राष्ट्रपतिकोमा दाबी गर्नुचैँ लजास्पद घटना हो ।

किनकि उपधारा ५ मा पनि उपधारा २ अन्तर्गत नै प्रधानमन्त्री बन्न चाहने सांसदले संसदमा रहेका दुई वा दुईभन्दा बढी दलहरूको समर्थन जुटाउनु पर्ने हुन्छ । दलीय पद्धतिबाहिर गएर सांसदको व्यक्तिगत समर्थन जुटाउने कुरा हाम्रो संसदीय अभ्यास अनुकूल आचरण पनि होइन ।

अर्कोतिर पार्टी अनुशासन र संसदीय मान्यताविपरीत सत्तारुढ पार्टीका नेताहरूले औपचारिक रूपमा दल विभाजन नभएको अवस्थामा प्रमुख प्रतिपक्षी दलको नेतालाई प्रधानमन्त्रीमा समर्थन गर्नु कानुनी र राजनीतिक दुवै हिसाबले अझ गम्भीर घटना हो ।

यसले जनताको ठूलो बलिदानबाट स्थापित हाम्रो संवैधानिक व्यवस्था र राजनीतिक प्रणालीलाई नै कमजोर बनाउनेछ । यस्ता अवस्थामा संविधानको संरक्षकसमेत रहनुभएकी सम्माननीय राष्ट्रपतिबाट उपरोक्त प्रकृतिका असंसदीय कार्यलाई मान्यता नदिई संसदीय प्रणालीको रक्षा हुने नै छ ।

शंकर पोखरेलको फेसबुकबाट

प्रकाशित मिति: शुक्रबार, जेठ ७, २०७८ २२:४२