मलमा कालोबजारी : सहकारीले किसान होइन, व्यापारीलाई बेच्छन्

A+ A A-

देशमा कोरोना भाइरसको त्रासकै बीच मल अभाव झेलिरहेका किसान बिचौलियाबाट थप हैरान भएका छन् । सिरहामा निषेधाज्ञाका बेला सरकारी अनुदानको रासायनिक मलको कालोबजारी बढेको छ । जिल्लामा सरकारी अनुदानको मल किसानलाई बिक्री नगरी कृषि सहकारी संस्थाले बढी मुनाफा लिएर व्यापारीलाई बिक्री गरिरहेका छन् ।

भारत तथा तेस्रो देशबाट सरकारले खरिद गरेर ल्याएको रासायनिक मल कृषि सामग्री कम्पनी लिमिटेड र साल्ट ट्रेडिङ कर्पोरेसनले कृषि सहकारी संस्थामार्फत किसानलाई अनुदानमा उपलब्ध गराउँदै आएको छ । तर, सिरहामा भने कृषि सहकारी संस्थाहरूले अनुदानको मल किसानलाई नभई बढी मुनाफाको लोभमा व्यापारीलाई बिक्री गरिरहेका छन् ।

मिर्चैया नगरपालिका ५ स्थित बजारबाट बिहीबार मलमा कालोबजारी गर्ने दुई खुद्रा व्यापारी पक्राउ परे । मिर्चैया नगरपालिकाले युरिया मलको मूल्य ८ सय ९० तोकेको छ । तर, स्थानीय खुद्रा व्यापारी श्यामप्रसाद महतो र रञ्जितकुमार साहले अनुमतिप्राप्त कृषि सहकारी संस्थाहरूले बेच्नुपर्ने मल तोकिएको मूल्यभन्दा बढी मूल्यमा किसानलाई बिक्री गरेको पाइएपछि प्रहरीले उनीहरूलाई पक्राउ गरेको हो ।

श्यामको पसलबाट प्रहरीले युरिया मल १० बोरा, डीएपी मल साढे ४ बोरा, मसिनो युरिया आधा बोरा र खस्रो युरिया आधा बोरा तथा रञ्जितको पसलबाट डेढ बोरा युरिया मलसमेत बरामद गरेको छ ।

मिर्चैया नगरपालिकाले नगरभित्रका छवटा सहकारीलाई मात्रै डिलरको अनुमति उपलब्ध गराएको छ । तर, खुद्रा पसलबाट सरकारी अनुदानको मल चर्को मूल्यमा बिक्रीवितरण भइरहेको सूचना आएपछि प्रहरीको सहयोगमा छापा हानी उनीहरूसहित मल नियन्त्रणमा लिएको नगरपालिकाका सहकारी शाखा प्रमुख धनञ्जय महतोले जनाए ।

उनका अनुसार, उनीहरूले प्रतिबोरा ८ सय ९० पर्ने युरिया मल ११ सयदेखि १३ सयसम्ममा किसानलाई बेच्ने गरेका थिए । कृषकले सहुलियत दरमा मल प्राप्त गर्नुपर्ने पक्षमा आफू रहेको र बढी मूल्यमा जोकोहीले बिक्री गरेको भए छानबिन गरी कारबाहीको दायरामा ल्याउने मिर्चैया नगरपालिकाका मेयर श्रवणकुमार यादवले बताए ।

कोरोनाका कारण सञ्चालकद्वयलाई तारेखमा छाडेर खुद्रा बिक्रेताले मल कहाँबाट ल्याए भन्ने विषयमा अनुसन्धान भइरहेको जिल्ला प्रहरी कार्यालय सिरहाका प्रवक्ता शालिग्राम शर्माले बताए । जिल्लामै मलको कालोबजारी बढ्दो देखिए पनि सम्बन्धित निकायको भने सक्रियता न्यून छ ।

प्रकाशित मिति: शुक्रबार, जेठ ७, २०७८ १४:३६