चार्टर्ड उडानका नाममा तीन गुणा बढी भाडा असुल्दै एयरलाइन्स, पर्यटन मन्त्रालय भन्छ– थाहा छैन

चार्टर्ड उडानका नाममा तीन गुणा बढी भाडा असुल्दै एयरलाइन्स, पर्यटन मन्त्रालय भन्छ– थाहा छैन

A+ A A-

कोभिड महामारी नियन्त्रण तथा रोकथामका लागि सरकारले २३ वैशाखदेखि अन्तर्राष्ट्रिय हवाई उडानमा रोक लगाएको छ । अन्तर्राष्ट्रिय उडानमा रोक लगाए पनि हाल सरकारले भारत, साउदी, कतार र चीनसँग भने चार्टर्ड उडान गरिरहेको छ ।

सोमबारयता विभिन्न देशमा करिब ६० वटा चार्टर उडान भएको त्रिभुवन अन्तर्राष्ट्रिय विमानस्थल कार्यालय (टीआईए)ले जनाएको छ ।

सरकारले पछिल्लो समय नेपालको त्रिभुवन अन्तर्राष्ट्रिय विमानस्थलहुँदै भारतीय कामदारलाई साउदीका लागि चार्टर्ड उडानको अनुमति दिएको छ । नेपाल र भारतबीच भएको एयर बबल सम्झौताअनुरुप दुई मुलुकको उडान नियमित र सातामा १० वटा चार्टर्ड उडान साउदीका लागि गर्न अनुमति दिएको छ ।

सरकारले साउदीका लागि दिएको चार्टर्ड उडानका नाममा एयरलाइन्स कम्पनी र ट्राभल एजेन्सीहरूले यात्रुसित सामान्य समयभन्दा चार गुणा बढी भाडा असुल्ने गरेको खुलासा भएको छ ।

यात्रुसँग तीन गुणा भाडा असुली

भारत दिल्लीका सुमन रोविया एक सातादेखि नेपालमा बसेका छन् । नेपालहुँदै शनिवार साँझ उनी साउदीको रियाद जाँदै छन् । रोवियाले साउदी जानका लागि हिमालय एयरलाइन्समा ८५ हजार रुपँयाँ तिरेर टिकट काटेको बताएका छन् ।

नेपालबाट उडानमा साउदी जान सामान्य बेला ३०–३५ हजार भाडा लाग्ने रहेछ । तर, आफूले दोब्बर तिरेर हिमालय एयरलाइन्समा टिकट लिएको रोवियाले बताए । ‘एक साताभित्र साउदी पुग्नुपर्ने भएकाले महँगो टिकटमा काटन बाध्य भएको हुँ । मभन्दा अघि जाने साथीले १ लाख २० हजारसम्म तिरेको भन्थे,’ उनले भने, ‘महामारीको फाइदा एयरलाइन्सले उठाए । एक महिनाको कमाइ नेपालहुँदै जाँदा खर्च भयो । भारतबाट साउदी जान २३ हजार नेपाली खर्च लाग्छ ।’

नेपालहुँदै साउदी जाने भारतीय कामदारले ९० हजारभन्दा धेरै तिर्नुपर्ने बाध्यता रहेको उनको भनाइ छ । यस्तै, अमेरिकाबाट बहिनीको विवाहमा आएका रामेछापमा च्याङ्वा तामाङले समेत कतार एयरलाइन्समा ३३ सय अमेरिकी डलर तिरेर चार्टर्ड उडानको टिकट लिएको बताउँछन् । सामान्य बेला याे उडानकाे ९ सय डलर मात्र लाग्ने गरेको थियो । कोरोना महामारीमा चार्टर्ड उडानका नाममा तीन गुणा भाडा तिर्नुपरेको च्याङ्वाले बताए । अरू बेलाभन्दा ४ गुणा बढी भाडातिर टिकट काटेको च्याङवाको भनाइ छ ।

रोविया र तामाङजस्ता धेरै चार्टर्ड उडानमार्फत विदेश जाने भारतीय र नेपाली यात्रुले अरू बेलाभन्दा तीन गुणा भाडा तिर्न बाध्य भएको गुनासो गर्छन् । चार्टर्ड उडान गर्दै आएका नेपाल एयरलाइन्स, हिमालय एयरलाइन्स, कतार एयरलाइन्स र टर्की एयरलाइन्सले ट्राभल्समार्पत अनलाइनबाट टिकट वितरण गरिरहेका छन् ।

एयरलाइन्सहरूले चार्टर्ड फ्लाइटको नाममा भारतीय र नेपालीसँग तीन गुणा भाडा लिइरहेको विषयमा जानकार भए पनि अनुगमन र केही गर्न नसकेको ट्राभल्स व्यवसायीको आरोप छ ।

चार्टर्ड उडानको हिमालय एयरलाइन्सले साउदी जाने यात्रुलाई १ लाख ७८ हजार रुपैयाँसम्म भाडा तोकेको थियो । साउदी हवाई यात्राले सामान्य समयमा ३०–४० हजार रुपैयाँ मात्र भाडा लाग्ने ट्राभल्स व्यवसायीहरू नै बताउँछन् ।

साउदीका लागि चार्टर्ड उडान गर्न अनुमति पाएको नेपाल एयरलाइन्सले करिब ९० हजार रुपैयाँ भाडा तोकेको छ । साथै, परराष्ट्र मन्त्रालयको अनुमतिमा चार्टर्ड उडान गरिरहेका कतार एयरलाइन्स र टर्की एयरलाइन्सले पनि युरोपसँगै अमेरिका चार्टर्ड उडान भर्दा ३–४ हजार अमेरिकी डलर लिने गरेको पाइएको छ ।

ती देशका लागि सामान्य समयमा ९ सय अमेरिकी डलर भाडा लाग्ने ट्राभल व्यवसायीहरू बताउँछन् । । यी दुई एयरलाइन्सले अन्तर्राष्ट्रिय हवाई उडान बन्द हुने समयमा टिकट लिएका यात्रुलाई समेत चार्टरमार्फत लैजाने भनेर टिकट फिर्ता लिन दबाब दिइरहेका छन् ।

टर्की एयरलाइन्सको टिकेटिङ गर्दै आएको मेघाबाइट ट्राभल्सका सञ्चालक चित्र गुरुङ र कतार एयरलाइन्सका लागि टिकेटिङ गर्दै आएको प्रेसिडेन्ट ट्राभल्सका भोला विक्रम थापा र सिद्धार्थ थापाले एयरलाइन्सका कर्मचारीसँगको मिलोमतोमा अग्रिम टिकट लिएका यात्रुलाई छोडेर अन्य यात्रुलाई चार्टर्ड फ्लाइटमार्फत लैजान थालेका छन् ।

कतार एयरलाइन्स र टर्की एयरलाइन्समा अन्तर्राष्ट्रिय हवाई उडान बन्द हुनुअघि अग्रिम बुकिङ लिएका ३ हजारभन्दा धेरै हवाई यात्रु अझै अलपत्र अवस्थामा छन् ।

हाल चार्टर्ड उडानका नाममा हवाई यात्रुसँग ४–५ गुणा भाडा लिने काम भइरहेको पर्यटन मन्त्रालयका एक कर्मचारी बताउँछन् । ती कर्मचारीका अनुसार पर्यटन मन्त्रालयका केही कर्मचारी, ट्राभल एजेन्सी र हवाई माफियाले प्रलोभन देखाएर चार्टर्ड उडान थालेका हुन् । चार्टर्ड उडानका कारण अन्तर्राष्ट्रिय हवाई सेवा कम्पनीसँग सम्बन्ध बिग्रिन पनि सक्ने ती कर्मचारीले बताए ।

चार्टर्ड उडानका नाममा महँगो भाडा लिएको उजुरी परे तत्काल कारबाही हुने संस्कृति, पर्यटन तथा नागरिक उड्डयन मन्त्रालयका सह–सचिव तथा प्रवक्ता तारानाथ अधिकारीले बताए । एयरलाइन्सले धेरै भाडा लिएको उजुरी र गुनासो नआएको उनको भनाइ छ । 'चार्टर्ड उडान गर्न एयरलाइन्सले धेरै भाडा लिएको उजुरी यात्रुले गरेका छैनन् । यादि त्यस्तो उजुरी परे तत्काल कारबाही हुन्छ,' उनले भने ।

विमानस्थल कार्यालयका अनुसार तीन नेपालीसहित २० वायु सेवा प्रदायकले उडान सञ्चालन गरिरहेका छन् । अन्तर्राष्ट्रिय विमानस्थलमा आन्तरिकतर्फ १० हेलिकोप्टर कम्पनीसहित १९ वायु सेवा प्रदायक कम्पनीले उडान भर्दै आएका छन् ।

प्रकाशित मिति: शुक्रबार, जेठ ७, २०७८ २०:२५