केन्द्रीय सदस्य ८१८, सदस्यता वितरणमा महाभारत !

A+ A A-

दुई वर्षअघि ६ वटा मधेसकेन्द्रित दलबीच एकता भएर बनेको राष्ट्रिय जनता पार्टी (राजपा) नेपाललाई सदस्यता वितरण नै महाभारत बनेको छ ।

पार्टी गठन भएको एक वर्षभित्र महाधिवेशन गरिसक्ने भने पनि दुई वर्ष बित्यो । राजपा अध्यक्ष मण्डलदेखि केन्द्रीय समिति बैठक र पदाधिकारी बैठक पनि सदस्यता वितरणमै बढी केन्द्रित हुने गरेको छ ।

तर, सदस्यता वितरण र महाधिवेशनको घोषण कार्यान्वयन हुन सकेको छैन । ६ वटा पार्टीका ८ सय १८ केन्द्रीय सदस्य मिलेर बनेको राजपा आफ्ना करिब साढे ७ लाख सदस्य भएको दाबी गर्छ ।

राजपा महासचिव केशव झाका अनुसार केन्द्रीय कार्यालयले साधारण सदस्यता फारम करिब ७ लाख ५० हजार र क्रियाशील सदस्यता फारम ४ लाख पठाइएको छ ।

पार्टीले सदस्यता वितरणका लागि गत वर्ष कात्तिक मसान्तसम्म समयावधि निर्धारण गरेको थियो । तर, सदस्यता वितरणको अभियानले गति नलिएपछि पुस मसान्त, माघ मसान्त हुँदै चैत मसान्तसम्म वितरण गर्ने मिति निर्धारण गरिएको थियो ।

पटक–पटक थप गरिएको सदस्यता वितरणको समय अन्तिमपटकका लागि भन्दै वैशाख मसान्तसम्मका लागि थप गरिएको थियो । ८ देखि १३ वैशाखसम्म राजधानीमा बसेको पदाधिकारी बैठकले नैं आगामी २८ देखि ३० कात्तिकसम्म महाधिवशेन गर्ने निर्णय गरेको थियो ।

पार्टीले अध्यक्ष मण्डलका सदस्य महन्थ ठाकुरको संयोजकत्वमा महाधिवेशन मूल आयोजक समिति गठन गरेको थियो ।

राजपा अध्यक्ष मण्डलको २ जेठमा बसेको बैठकले वितरण गरिएको सदस्यता फारम र पैसा ५ जेठसम्म जिल्लामा पठाउनैपर्ने निर्णय गरेको थियो ।

पार्टीका एक उपाध्यक्षका अनुसार ८ वैशाखसम्म कुनै पनि जिल्लामा सदस्यता संकलन भएको छैन । पार्टीले सबै जिल्लालाई १० जेठभित्रमा सदस्यता र शुल्क केन्द्रीय कार्यालयमा पठाउन निर्देशन दिएको थियो ।

अध्यक्ष मण्डलको २ वैशाखकै निर्णयबाट पार्टीको महाधिवेशन प्रत्येक दुई वर्षमा हुने भन्ने पार्टी विधानलाई संशोधन गरी तीन वर्ष पु¥याइएको थियो ।

राजपाको संगठन मुलुकका ६८ जिल्लामा विस्तारित छ । राजपाले आगामी महाधिवेशनपछि अध्यक्ष मण्डलको अवधारणा छोडेर अध्यक्ष प्रणाली बनाउने गरी पार्टी विधान संशोधन गरेको छ ।

प्रकाशित मिति: बिहीबार, जेठ ९, २०७६ ०४:२७