राष्ट्रियसभा उपनिर्वाचनको तयारी पूरा, संक्रमित मतदातालाई ‘छुट्टै गेट’

हेटौँडामा बिहीबार हुने राष्ट्रियसभा उपनिर्वाचनको तयारी पूरा गरिएको बागमती प्रदेश निर्वाचन आयोगको कार्यालयले जानकारी दिएको छ ।

बागमती प्रदेशमा रिक्त राष्ट्रियसभा सदस्य पदको उपनिर्वाचनमा मतदानका लागि हेटौँडा–४ स्थित भुटनदेवी माध्यमिक विद्यालयमा व्यवस्था मिलाइएको छ । मतदान बिहान ९ बजेदेखि ३ बजेसम्म हुने मुख्य निर्वाचन अधिकृत डिल्लीरमण श्रेष्ठले जानकारी दिए । कोरोना महामारी र निषेधाज्ञाका बीच गर्न लागिएको उपनिर्वाचनमा आयोगले संक्रमित मतदाताका लागि छुट्टै गेटको व्यवस्था पनि गरेको छ ।

विद्यालयको पूर्वपट्टिको गेटबाट कोरोना संक्रमित मतदातालाई । पश्चिमतर्फको गेटबाट अन्य मतदातालाई प्रवेश गराइने श्रेष्ठले बताए । प्रदेश निर्वाचन आयोगको कार्यालयका अनुसार कुल मतदातामध्ये १३ जनालाई कोरोना संक्रमण पुष्टि भएको छ ।

अधिकांश मतदाताले हेटौँडा आइपुगेर हेटौँडा अस्पतालमा कोरोना परीक्षण गराएका छन् । अस्पताल सञ्चालन समिति सदस्य उत्सव चौलागाईंका अनुसार ३० भन्दा बढी प्रदेश सांसद र स्थानीय तहका प्रमुख, उपप्रमुखले कोरोना परीक्षण गराएका हुन् ।

प्रदेश निर्वाचन आयोगले मतदान स्थल र मतगणनाको संरचना तयार पारेको सहायक निर्वाचन अधिकृत गोविन्द पौडेलले जानकारी दिए । विद्यालय परिसरमा क, ख र ग नामाकरण गरेर तीनवटा मतदान केन्द्र स्थापना गरिएको छ । ‘क’ मा प्रदेशसभा सदस्य, ‘ख’ मा गाउँपालिका अध्यक्ष/उपाध्यक्ष, नगरका प्रमुख उपप्रमुख र ‘ग’ केन्द्रमा कोरोना संक्रमित मतदाताले मत हाल्ने व्यवस्था मिलाइएको पौडेलले जानकारी दिएका छन् ।

मतदान र मतगणनास्थलमा पूर्ण स्वास्थ्य सुरक्षा मापदण्ड लागू गरिने उनले बताए । सामाजिक दूरी, माक्स र स्यानिटाइजरको प्रयोग अनिर्वाय गरिएको छ । गोप्य मतदान भएकाले मतदान स्थलामा मोबाइल, क्यामेरा प्रयोगमा बन्देज, मादक पदार्थ सेवन गरी आउन नपाइने र हातहतियार प्रयोग गर्न नपाउनेलगायतका नियम बनाइएको छ ।

सहायक निर्वाचन अधिकृत पौडेलका अनुसार प्रदेशसभा सांसद र स्थानीय तहका प्रमुख, उपप्रमुखका लागि फरक मतपत्र हुनेछ । फरक रङको मतपत्रमा चुनाव चिह्न भने एउटै राखिएको हुने पौडेलले बताए । मतदान समय सकिए लगतै विद्यालयमै मतगणना गर्ने व्यवस्था मिलाइएको छ । मतदान केन्द्र र मतगणनामा खटिने गरी २४ जना कर्मचारी परिचालन गरिएको कार्यालयले जनाएको छ । उपनिर्वाचनमा प्रदेश सभातर्फ १ सय ९ र स्थानीय तहका २ सय ३८ जनप्रतिनिधिले मतदान गर्नेछन् ।

प्रकाशित मिति: बुधबार, जेठ ५, २०७८ १८:२३