‘कोभिड युनिफाइड’ वीर अस्पतालले बिरामी भर्ना लिएन, स्वास्थ्य मन्त्रालयले भन्यो- 'वीरले असहयाेग गर्‍याे'

‘कोभिड युनिफाइड’ वीर अस्पतालले बिरामी भर्ना लिएन, स्वास्थ्य मन्त्रालयले भन्यो- 'वीरले असहयाेग गर्‍याे'

A+ A A-

सरकारले २५ वैशाखमा वीर अस्पतालको नयाँ भवनलाई ५ सय शय्याको ‘कोभिड युनिफाइड’ अस्पताल बनाउने निर्णय गर्‍यो ।

कोभिड फोकस अस्पतालहरूको बेड, आईसीयू र भेन्टिलेटर भरिएपछि सरकारले वीर अस्पतालको नयाँ भवनलाई कोभिड युनिफाइड अस्पताल बनाउने निर्णय गरेको थियो । तर, निर्णय भएको दुई साता बितिसक्दा पनि अस्पतालले सेवा सुरु गरेकाे छैन ।

वीरको नयाँ भवनमा सजिसजाउ गरिएका १ सय ७० वटा बेड खाली छन् । तर टेकु, टिचिङलगायतका अस्पतालले बिरामीलाई चिसो भुइँमै राखेर उपचार गरिरहेका छन् । बेड नपाएरै बिरामी अस्पताल चहार्दा-चहार्दै मृत्युवरण गर्न विवश छन् ।

५ सय बेड उपलब्ध भएको वीर अस्पतालमा हाल १ सय ८१ बेडमा मात्रै कोभिड बिरामीको उपचार भइरहेको छ । यद्यपि, वीरसँग ९ सय बेड सञ्चालन गर्न सक्ने क्षमता छ । तर, अक्सिजनको अभाव देखाएर कोरोना संक्रमित भर्ना गर्न अटेरी गरिरहेको छ ।

‘अक्सिजन पर्याप्त नपाएसम्म केही गर्न सकिँदैन,’ निमित्त कार्यकारी निर्देशक डा. शान्ता सापकोटा भन्छिन्, ‘बिरामी राखेपछि जिम्मेवारी लिन पर्‍यो । अक्सिजनबिना अहिले सम्भव छैन ।’

बिरामीको चाप बढे पनि नयाँ बिरामी भर्ना नगर्ने र भएका बिरामीलाई मात्र उपचार गर्ने निष्कर्षमा वीर अस्पताल पुगेको छ ।

वीरको आफ्नै अक्सिजन प्लान्ट भए पनि पुरानै बिरामीका लागि मात्र खपत हुने उनी बताउँछिन् । ‘१ सय ५० सिलिण्डरबराबरको अक्सिजन उत्पादन गर्ने प्लान्ट छ । पुरानै भवनका बिरामीका लागि नै त्याे अक्सिजन खपत हुन्छ’, उनी भन्छिन्, ‘हाल वीरमा थप दैनिक १५० सिलिण्डरबराबरको अक्सिजन आवश्यक छ ।’

तर, अक्सिजनको माग धेरै भए पनि अहिले समस्या नरहेको स्वास्थ्य तथा जनसंख्या मन्त्रालयको दाबी छ ।

अघिल्लो साता कोभिड-१९ संकट व्यवस्थापन केन्द्र (सीसीएमसी) ले काेटा प्रणाली लागू गरेर अक्सिजन व्यवस्थापनको जिम्मा लिएकाले अस्पतालहरूमा अक्सिजनको हाहाकार भएको थियो । तर, हाल अक्सिजनको जिम्मा स्वास्थ्य मन्त्रालयले नै लिएको छ ।

‘अक्सिजनको माग धेरै छ । अहिले मन्त्रालयले व्यवस्थापन गरिरहेकाले अब अक्सिजनको समस्या हुँदैन’, मन्त्रालयका प्रवक्ता डा. जागेश्वर गौतम भन्छन्, ‘अक्सिजनको बहानामा बेड खाली राख्न पाइँदैन ।’

बेड खाली राखेर वीर अस्पतालले सरकारलाई नै असहयोग गरेको मन्त्रालयको निष्कर्ष छ । ‘महामारीको नेतृत्व जेठो अस्पताल वीरले लिनुपर्ने हो । वीरबाट पटक्कै सहयोग पाइएन । नयाँ र पुरानो भवनमा गरेर ९ सय बेडमा बिरामी राख्न सकिन्छ,’ प्रवक्ता गौतम भन्छन्, ‘सरकारी अस्पताललाई प्रतिष्ठान बनाएर बिग्रियो । प्रतिष्ठानको अफिस वीर अस्पतालको बाहिर राख्नुपर्छ । वीरको नेतृत्वले काम गर्नुपर्छ ।’

स्वास्थ्य मन्त्रालयमातहतमै रहेको वीर अस्पताल र मन्त्रालयबीच समन्वय देखिँदैन । एकले अर्कोलाई आरोप-प्रत्यारोप लगाएर बस्दा बिरामी भने उपचार सेवाबाट वञ्चित भएका छन् । बेड खाली राख्ने वीर अस्पताललाई कारबाही गर्नुको सट्टा असहयोग गर्‍यो भन्दै मन्त्रालयको एकोहोरो टिप्पणी पनि निरर्थक भएको विज्ञहरू बताउँछन् ।

सरकार गैरजिम्मेवार भएको जनस्वास्थ्यविद् डा. शरद वन्त बताउँछन् । ‘बेड नपाएर नागरिक मर्नु भनेको राज्यको अपराध हो,’ उनी भन्छन्, ‘नागरिकले ठूलो कुरा मागेको होइन । राज्यले दिनुपर्ने आधारभूत कुरा न मागेको हो ।’

तस्वीर :सुशील श्रेष्ठ

प्रकाशित मिति: बुधबार, जेठ ५, २०७८ १३:२४