बिरामी कुरुवा पनि सङ्क्रमित, डाक्टर भन्छन्– 'यो हुनुहुन्‍नथ्यो तर बाध्यकारी भो'

बिरामी कुरुवा पनि सङ्क्रमित, डाक्टर भन्छन्– 'यो हुनुहुन्‍नथ्यो तर बाध्यकारी भो'

A+ A A-

राष्ट्रिय ट्रमा सेन्टरको इमर्जेन्सी वार्डमा २२ वर्षीया रेखा उप्रेती संक्रमित भएका आफ्ना ५९ वर्षीय बुबाको निधार छामिरहेकी छन् ।

उप्रेती घरि बुबाको अक्सिजन तह नाप्छिन् त घरि सिलिन्डबाट अक्सिजनको फ्लो मिलाउँछिन्, कहिले बुबाको आँखाको कोसमा भरिएको आँसु पुछिदिन्छिन् ।

ज्वरो नाप्ने, अक्सिजन मिलाउने, खाना खुवाउने, जिउ मालिस गर्दिनेलगायतका सम्पूर्ण काम गरिरहेकी रेखालाई नर्सभन्दा कम देखिन्नन् । । तर, यसरी नै विगत पाँच दिनदेखि उनी बुबाका लागि खटिइरहेकी छन् ।

कोभिड संक्रमित बुबाका लागि खटिइरहेकी छोरी रेखा उप्रेती ।

रेखा आफैँ कोभिड संक्रमित हुन् । घरमा धेरै सदस्य संक्रमित हुँदा को बिरामी र को कुरुवा भन्ने छुट नभएको रेखा बताउँछिन् । उनी भन्छिन्, ‘बुबालाई अलि गाह्रो भएको छ । त्यसैले म नै कुरुवा बसेकी हुँ ।’

हप्ता दिन कटिसकेकाले संक्रमित नै भए पनि बुबाका लागि कुरुवा बस्न आफू नै उपयुक्त पात्र भएको रेखाको ठम्याइ छ । ‘मलाई त सञ्चो पनि भइसक्यो होला !,’ उनले भनिन् ।

यसरी परिवारका सदस्य संक्रमित हुँदा बिरामीको हेरचाहका लागि सुरक्षा मापदण्डलाई पर्वाह नै नगरी घरका अन्य सदस्य नै खटिएका दृश्य अस्पतालहरूमा सामान्य बन्दै गइरहेको छ ।

त्रिवि शिक्षण अस्पतालको इमर्जेन्सीबाहिर प्यासेजमा कोभिड संक्रमित ९३ वर्षीया आमा तरदेवी खतिवडाको उपचारमा खटिएका छोरा राजन खतिवडा अर्का उदाहरण हुन् ।

कोभिड संक्रमित ९३ वर्षीया आमा तरदेवी खतिवडा ।

स्वयम् कोभिड संक्रमित राजन आमाको उपचारका लागि टिचिङ अस्पतालमा छन् । गत २६ वैशाखमा धुम्बाराहीबाट टिचिङमा जचाउँदा कोरोना संक्रमण पुष्टि भएको उनी बताउँछन् ।

‘मलाई त खोकी अलिअलि छ । आमालाई कोभिड सञ्चो हुँदै गए पनि दम अझै सञ्चो भएको छैन ।’ अक्सिजन लिइरहेकी आमालाई हेर्दै उनले भने ।

खतिवडा परिवार बेडको अभावमा टिचिङको प्राङ्गणमै उपचाररत छ ।

टेकु, ट्रमा, टिचिङ मात्रै होइन, हाल अधिकांश अस्पतालमा संक्रमित बिरामीका लागि खटिएका कुरुवा स्वयम् संक्रमित हुनु कोरोना घरघरमै पुगेको प्रमाण भएको चिकित्सकहरू बताउँछन् ।

टेकु अस्पतालमा संक्रमितलाई खाना खुवाउँदै एक कुरुवा ।

टेकु प्राङ्गणमा रहेको पार्किङको कोभिड वार्डमा बिरामी श्रीमान्‌को उपचारका लागि खटिइरहेकी छिन् ५९ वर्षीया समिना तामाङ । धादिङको लापागाउँबाट आएकी उनको परिवारमा छोरी, आमा र बुबा गरी तीनै जना संक्रमित भएका थिए । हाल अन्य सदस्यलाई सुधार हुँदै गर्दा ६५ वर्षीय श्रीमान्‌लाई भने सास फेर्न अलि गाह्रो भएपछि संक्रमित भए पनि श्रीमान्‌को सेवा गर्न उनी बाध्य छिन् ।

कोभिड संक्रमित श्रीमान्‌को सेवामा खटिएकी समिना तामाङ ।

अहिले संक्रामक बिरामीसँग कसले कसरी ‘डिल’ गर्ने र कुरुवाले स्वास्थ्यका मापदण्ड कसरी पालना गर्ने भन्ने अन्योल देखिएको छ । यी परिदृश्य अस्पतालहरूमा जनशक्तिको अभाव देखाउन पर्याप्त भएको संक्रामक रोग विशेषज्ञ डा. शेरबहादुर पुन बताउँछन् ।

हालको यो अवस्था दु:खद तर बाध्यकारी भएको उनी स्वीकार्छन्, ‘कस्तो बाध्यता पर्‍यो भने यदि यहाँ प्रशस्त जनशक्ति हुन्थ्यो भने यस्तो अवस्था देखिँदैनथ्यो होला । नर्स, डाक्टर पनि सीमित संख्यामा छन् । इमर्जेन्सी बिरामीलाई पनि हेर्नैपर्‍यो ।’

एकातिर जनशक्ति अभाव, अर्कोतिर संक्रमणको दरको चित्रणले नै उतारिदिएको पुनको निष्कर्ष छ । अहिलेको दोस्रो लहरमा परिवार नै संक्रमित हुनेको संख्या बढिरहेको पुनले बताए ।

उनले भने, ‘कति बेला घरमा संक्रमण पुग्यो भनेर कसैले थाहा पाउन सकेका छैनन् । संक्रमित परिवारमा कम गाह्रो हुने सदस्यले बढी गाह्रो हुने सदस्यलाई हेरचाह गरेर बसेको दृश्य देखिन्छ । यो हुनु हुँदैनथ्यो तर बाध्यकारी नै भयो ।’

प्रकाशित मिति: मंगलबार, जेठ ४, २०७८ २०:१६