‘नेपालजस्ता हाम्रा मित्रराष्ट्रले हमासलाई भनिदिऊन्- इजरायलमाथिको आक्रमण रोक’ (पाेडकास्टसहित)

‘नेपालजस्ता हाम्रा मित्रराष्ट्रले हमासलाई भनिदिऊन्- इजरायलमाथिको आक्रमण रोक’ (पाेडकास्टसहित)

A+ A A-

इजरायल–प्यालेस्टाइनबीच संघर्ष सय वर्षयता चलिरहेको छ । सन् १९९३ मा हामीले शान्ति सम्झौता गर्‍यौँ, जसलाई ‘ओस्लो एग्रिमेन्ट’ पनि भनिन्छ । सम्झौताअनुसार संवाद र शान्तिका साथ विवाद समाधान गर्ने सहमति थियो । सम्झौता सबैका लागि राम्रो चिज त होइन । तर, विवाद हुँदा दुवै पक्षका लागि यो राम्रै हुन्छ ।

गाजा प्यालेस्टाइनको नियन्त्रणमा छैन । त्यहाँ त हमास नामको आतंकवादी संगठनले कब्जा जमाएको छ । इजरायलले हमासलाई कुनै राज्यका रूपमा चिन्दैन । हामीले हमाससँग वार्ता गर्नुपर्छ भन्ने छैन । यो असम्भव कुरा हो । उनीहरूले हाम्रा शहर, हस्पिटल, भौतिक पूर्वाधारलाई लक्षित गरी आक्रमण गरिरहेका छन् । यस्तो आक्रमण तुरुन्तै रोकिनुपर्छ । हमलामा आतंकवादी संगठनको संलग्नता हुँदा इजरायल चुप लागेर बस्दैन । युद्धका नियमहरूप्रति हामी प्रतिबद्ध नै छौँ । प्रतिरक्षा गर्दा हाम्रातर्फबाट निर्दोषहरूलाई क्षति पुग्यो होला, यसप्रति हामी दुःखी छौँ । तर, हामीले यो नियतवश गरेका होइनौँ । निहत्था नागरिकको ज्यानमा कुनै खालको खतरा आउनु हुँदैन भन्ने मन्यतामा हामी दृढ छौँ ।

नेपालसँग अपेक्षा

यस्तो बेला अन्तर्राष्ट्रिय समुदायसँग हाम्रा केही अपेक्षा छन् । खासगरी नेपालजस्ता हाम्रा असल मित्रहरूले हमासलाई आक्रमण रोक्न भनिदिऊन् भन्ने हामी चाहन्छौँ । हमासले हमला गरेपछि इजरायलले प्रतिरक्षा गरेकाे हाे । हरेक देशलाई प्रतिरक्षाको अधिकार छ । अन्तर्राष्ट्रिय समुदायले यो कुरा बुझिदिनुपर्छ । कसैले तपाईंलाई आक्रमण गर्छ भने तपाईंले आफ्नो सुरक्षाका लागि प्रत्याक्रमण गर्नुपर्छ । आफ्ना नागरिक जोगाउनु हाम्रो दायित्व हो । हमासले आक्रमण रोक्यो भने हामी पनि रोकिन्छौँ ।

नेपालले विगतमा इजरायललाई महत्त्वपूर्ण साथ दिएको छ । अहिले मध्यपूर्वमा जुन अशान्तिको संकेत देखिँदैछ, त्यसको मूल कारण हमास हो । आतंकवादी संगठनले इजरायलमाथि आक्रमण गरिरहेको छ । यस्तो बेला नेपालजस्ता देशले हामीमाथि भइरहेको आक्रमण देखेका छन् । ती देश न्याय र लोकतन्त्रको पक्षमा उभिदिऊन् भन्ने हाम्रो अपेक्षा छ ।

नेपालले दुवै पक्षलाई शान्ति बनाइराख्न आह्वान गरेको छ । तर, बुझ्नुपर्ने कुरा के हो भने हमासले आक्रमण गर्नुअघि इजरायल शान्त थियो । अचानक हमासले हमला गर्‍यो । यस्तोमा एक पक्ष मात्र शान्त भएर के हुन्छ ? दुई हजारभन्दा बढी रकेट बम हाम्रा शहरहरूमा प्रहार गरिएको छ । यो सहेर हामी कसरी बस्न सक्छौँ ? आतंकवादी संगठन हमासले आक्रमण सुरु गरेको हो । र, यसमा ऊ नै जिम्मेवार हुनुपर्छ ।

इजरायलमा धेरै नेपालीहरू छन् । कोही तालीम गरिरहेका छन् । कोही पढिरहेका छन् । कोही रोजगारीमा छन् । उनीहरूकाे सुरक्षाप्रति इजरायल सरकार प्रतिबद्ध छ । मलाई विश्वास छ, यो संकट चाँडै समाधान हुन्छ । (नेपालका लागि इजरायली राजदूत हनान गाेडरसँग शिलापत्रका नवराज कुँवरले गरेकाे कुराकानीमा आधारित ।)