रंगमञ्चबाट उदाएर ठूलो पर्दामा चम्किएका नायिका

A+ A A-

दयाहाङ राई, विपिन कार्की, खगेन्द्र लामिछाने, नाजिर हुसेनलगायतका कलाकार रंगमञ्चमा निखारिएर चलचित्रमा जमेका कलाकार हुन् । रंगमञ्चबाट अभिनय यात्रा सुरु गरेका कलाकारले नेपाली चलचित्र जगतमा राज गर्ने क्रम जारी छ ।

यसै क्रममा रंगमञ्चबाट अभिनय सुरु गरेका महिला रंगकर्मीले समेत चलचित्रमा वर्चस्व जमाएका छन् । ती नारीहस्ताक्षरको रंगमञ्च र चलचित्र नगरीको यात्रा यस्तो रहेको छ :

सिर्जना सुब्बा
नेपाली चलचित्र उद्योगमा अब्बल नायिकामा पर्छिन्, सिर्जना सुब्बा । उनी मूलत रंगकर्मी हुन् । लुट, लुट–२, मिस्टर भर्जिन, डाइङ क्यान्डललगायतका चलचित्रमा उनी चर्चित भइन् ।

सुब्बाले ‘युमा’ नाटकमार्फत आफूलाई निर्देशकका रुपमा पनि स्थापित गरेकी छिन् । त्यस्तै, सुब्बाले माइला डटकम, चरनदास चोर, डिग्री माइला, मितज्यूलगायत दजर्नौं नाटकमा अभिनय गरेकी छन् ।
सुब्बाले डाइङ क्यान्डलबाट राष्ट्रिय तथा अन्तर्राष्ट्रिय अवार्ड जितिन् ।

दिया मास्के
मास्केले ‘चराहरुको सम्मेलन’ नाटकबाट आफूलाई निर्देशकका रूपमा उभ्याएकी छन् । उनी डेढ दशकदेखि नाटकमा सक्रिय छन् । उनले नाटक कोट मार्सल, थाङ्ला, शकुन्तला, औंठीलगायत दर्जनौं नाटकमा अभिनय गरिसकेकी छन् ।

दिया मास्केले हिमालय रोडिजको जजबाट धेरैको ध्यान तानिन् । मास्केलाई सत्यतथ्य बोल्ने नायिकाका रूपमा समेत लिइन्छ ।

मास्केले कागबेनी, सुनगाभा, साँघुरोलगायत दर्जन बढी चलचित्रमा अभिनय गरेकी छन् । उनी अभिनित चलचित्र व्यावसायिक रुपमा सफल भएनन् । तर, उनी अभिनयका कारण चर्चित छिन् ।

मेनुका प्रधान

मेनुका प्रधानले मलामी, काफ्का एक अध्याय, एन्जल अफ द अमेरिकालगायत दर्जन बढी नाटकमा सशक्त अभिनय गरेकी छन् ।
प्रधानले रात, भिसा गर्ल, सुनगाभा, भिजिलान्ते, रेसम फिलिली, लाल पुर्जा, शेरबहादुर, साइलीलगायतका चलचित्रमा अभिनय गरेकी छन् ।
प्रधान ‘सुन साइँली...’ गीतबाट थप चर्चामा आएकी हुन् ।

उषा रजक
उषा रजकले बाल्यकालदेखि नै अभिनयमा विशेष रुचि राख्थिन् । उनले

रजक ९ वर्ष मोडलिङ र नाटकमा आफूलाई निखारेर चलचित्रमा प्रवेश गरेकी हुन् । उनले कथा चलचित्रबाट धेरैको मन जितिन् । रजकले कागबेनी, कुसुमे रुमाल २, इकुलगायतका चलचित्रमा अभिनय गरेकी छन् ।

लक्ष्मी बर्देवा

लक्ष्मी बर्देवाले दर्जनौं नाटकमा अभिनय गरेकी छन् । उनी अलग र गम्भीर प्रकृतिका भूमिकालाई जीवन्तता दिन खप्पिस छिन् ।

त्यस्तै, बुलबुलमा टेम्पो ड्राइभर र घामपानीमा भट्टी साहुनीको भूमिकाका कारण उनी निकै चर्चा छिन् । उनले मिस्टर झोले, घामपानी, कागजपत्र, डमरुको डन्डिबियोलगायत दर्जनाैं चलचित्रमा अभिनय गरेकी छिन् ।

सरिता गिरी
सरिता गिरीले पत्थरको कथालगायत दर्जनौं नाटकमा अभिनय गरेकी छिन् । गिरी डेढ दशक अघिदेखि नेपाली रंगमञ्चमा सक्रिय छिन् ।
गिरीले सुनगाभा, वधशाला, नागरिक, रेड मनसुन, गुरु दक्षिणा, कागजपत्रलगायत दर्जनौं चलचित्रमा अभिनय गरिसकेकी छन् ।

प्रकाशित मिति: बुधबार, जेठ ८, २०७६ २०:५३