रक्तदान गर्ने युवाको संख्या बढ्दै

A+ A A-

रोल्पामा रक्तदान गर्नेको संख्या बढ्न थालेको छ । केही वर्षपहिले रगत दान गरे कमजोर भइन्छ, विभिन्न रोग लाग्छ भन्ने गलत धारणा रहेको स्थानीयमा बिस्तारै चेतनाको स्तर उठ्न थालेपछि रगत दान गर्नेको संख्या बढ्दै गएको हो ।

‘आजभन्दा एक–दुई वर्षपहिले रक्तदान गर्नुपर्यो भन्दा प्रायः सबैले विभिन्न बहाना पारेर रगत दिँदैनथे, कयौं कोसिस गर्दा पनि रगत दिन कोही तयार हुँदैनथे । बिरामीको ज्यान जसरी पनि जोगाउनुपर्यो । चिकित्सक स्वयंले रगत दिएर कतिको ज्यान जोगायौँ,’ जिल्ला अस्पताल रोल्पाका सिनियर अहेब कुलबहादुर डाँगीले भने ।

‘नेपाल रेडक्रस सोसाइटी रोल्पाको आकस्मिक रक्तसञ्चार सेवा पनि प्रभावकारी रूपमा सञ्चालन भएको थिएन । रक्तदान गर्नुपर्छ भन्ने भावना पनि अति न्यून थियाे । रगत अभावकै कारण हामीले कुनै सामान्य सेवाका लागि पनि बाहिर सिफारिस गर्नुपर्यो भने केहीले त रगतकै अभावमा अकालमै ज्यानसमेत गुमाए,’ अहेब डाँगीले थपे ।

‘जिल्ला अस्पतालमा सामग्री र दक्ष जनशक्तिको अभाव छैन । आकस्मित रक्तसञ्चार सेवाको अभाव छ । पटक–पटक चिकित्सकले रक्तदान गरेर बिरामीको ज्यान जोगाए भनेको कति पटक सुने । यस क्षेत्रमा केही गर्नुपर्छ भनेर हामीले ‘ब्लड फर रोल्पा’ अभियान सञ्चालनमा ल्याएका हौं,’ युवा समाजसेवी तथा अभियानकर्मी विनोद डाँगीले भने, ‘यही अभियानका लागि हामीले मोबाइल एप्ससमेत सञ्चालनमा ल्याएका छौं । रगत दिन चाहनेको रक्त समूह, नाम, ठेगाना र मोबाइल नम्बर सबै राखिएको हुन्छ । जिल्ला अस्पताललाई आवश्यक परेको खण्डमा उहाँहरु फोन गर्नुहुन्छ । हाम्रो टिम तुरुन्त पुग्छौं । अनि, रक्तदान गर्न तम्सिन्छौं ।’

अहिलेसम्म ‘ब्लड फर रोल्पा’ अभियानमा ८० युवा जोडिइसकेका छन् भने २५ ले रक्तदान गरिसकेको बताइएको छ ।

‘रगत दिनुपहिले त केही हुने हो कि भन्ने मनमा डर लागिरहेको थियो, जब रक्त परीक्षण गरी समूह पहिचान भयो । अनि रगत दिएँ । त्यस्तो केही गाह्रो महसुस गरिनँ । कमजोर पनि भएन,’ रोल्पा नगरपालिका–२ का रक्तदान गरिसकेका स्थानीय युवा दिलबहादुर डाँगीले भने, ‘रगत दिँदा आफूलाई गर्वको महसुस गरें । मेरो सानो सहयोगले कसैको ज्यान बाँच्यो । यस्तै–यस्तै कुराले मनभरि खुसी छायो, यस्तो खुसीको महसुस मैले कहिले गरेको थिइनँ ।’

हाल नेपाल रेडक्रस सोसाइटी रोल्पाले पनि आकस्मिक रक्तसञ्चार सेवालाई प्रभावकारी बनाउन विभिन्न अभियान सञ्चालन गरिरहेको छ । जिल्लामा विभिन्न स्थानमा रक्त समूह पहिचान गर्ने, रक्तदान गर्न अभिप्रेरित गर्ने, रक्तदान गर्दा हुने फाइदाबारे जनचेतना फैलाउने तथा विभिन्न व्यक्तिको नाम, ठेगाना र सम्पर्क नम्बर संकलन गर्ने कार्यलाई तीव्रता दिएको जिल्ला सभापति डीबी टुहुरोले जानकारी दिए ।

आर्थिक वर्ष २०७३/७४ मा २२ युवाले र गत आव २०७४/७५ मा २६ युवाले रक्तदान गरेका थिए । चालू आवमा ५६ युवाले रक्तदान गरेको जिल्ला अस्पताल रोल्पाले बताएको छ ।

रगत आवश्यक परेका बिरामीको मिलेसम्म उसकै आफन्त र आफन्त नभएको खण्डमा मात्र अरुको रगत दिने गरेको जिल्ला अस्पताल रोल्पाका डा. अनुभव पौड्यालले बताए । चेतना बढेसँगै रक्तदान गर्ने युवाको संख्यामा वृद्धि भएको पौड्यालको भनाइ छ । आफ्नो स्वास्थ्य अवस्था ठीक भएको व्यक्तिले सहयोग गर्दा राम्रो हुने उनले बताए । (रासस)