इजरायल र प्यालेस्टाइनबीच भइरहेको युद्धमा नेपालीहरू सुरक्षित छन् : सहचारी गिरी [अन्तर्वार्ता]

इजरायल र प्यालेस्टाइनबीच भइरहेको युद्धमा नेपालीहरू सुरक्षित छन् : सहचारी गिरी [अन्तर्वार्ता]

A+ A A-

प्यालेस्टाइनको हतियारधारी संगठन हमासले अहिले तेलअभिवसहित इजरायलको दक्षिणी क्षेत्रमा रकेट आक्रमण गरिरहेको छ ।यो युद्धमा इजरायलमा रहेका करिब २ हजार नेपाली सुरक्षित रहेको इजरायलस्थित नेपाली दूतावासका सहचारी प्रदीप सागर गिरीले जानकारी दिए । गिरी नेपालीहरू सुरक्षित बस्ने तरिकाका सम्बन्धमा पनि जानकार रहेको बताउँछन् ।

प्रस्तुत छ सहचारी गिरीसँग शिलापत्रकर्मी रमेश भारतीले गरेको कुराकानी ः

हमासले इजरायलमा आक्रमण गरिरहेको छ, त्यहाँ रहेको नेपालीहरूको अवस्था कस्तो छ ?

इजरायल र प्यालेस्टाइनबीच भइरहेको आक्रमणका कारण तनाव बढिरहेको स्थिति छ । विगत केही दिनयता सयौँ रकेट तथा मिसाइल आक्रमण हुँदा सबै त्रसित अवस्थामा छन् । इजरायलको तेलअबिब तथा अन्य केन्द्रमा रहेका मुख्य सहरमा रकेटहरू पड्किएको आवाज सुनिन्छ ।

इजरायलमा रोजगारी अथवा अन्य पेशा व्यवसाय गर्दै बसेका नेपालीहरूलाई भौतिक रूपमा केही क्षति भएको इजरायलस्थित नेपाली दूतावासमा जानकारी आएको छैन ।

इजरायलमा रोजगारी गरिरहेका अथवा अन्य पेशामा संलग्न नेपालीहरूका घर–परिवार नेपालमा छन् । यहाँ भएको युद्धको त्रास उनीहरूको परिवारमा होला । तर, यहाँ रहेका नेपाली सुरक्षित नै छन् ।

इजरायल र प्यालेस्टाइनबीच छिटफुट यस्ता घटना उत्पन्न भइरहने भएका कारण आत्तिहाल्नुपर्ने अवस्था छैन । उनीहरू कसरी सुरक्षित बस्ने भन्ने विषयमा जानकार छन् ।

इजरायलमा कति नेपाली छन् ?

इजरायलमा करिब २ हजार नेपालीहरू छन् । नेपाली रोजगारीकै लागि आएका छन् । मुलतः केयरगिभर तथा नर्सिङ क्षेत्रमा कार्यरत छन् । ५ सय नेपाली युवाहरू साना किसान विकास बैंकमार्फत् इजरायली प्रोजेक्टमा कृषि अध्ययन तथा तालिमका लागि आएका छन् ।

केही नेपालीहरू अन्तर्राष्ट्रिय संगठनलगायत अन्य क्षेत्रमा काम तथा अध्ययन गरिरहनुभएको दूतावासलाई जानकारी छ ।

समस्यामा परेका नेपालीलाई दूतावासले कसरी सहयोग गर्दै आएको छ ?

इजरायलको श्रम कानून श्रमिकमैत्री छ । अन्य देशको तुलनामा इजरायलमा रोजगारी गर्न कामदारलाई कम मात्र समस्या पर्छ । श्रमिकलाई असुविधा भए कानुनी उपचार खोज्न सजिलो छ ।

इजरायलमा रहेका नेपाली समस्यामा परे दूतावासले तत्काल समाधान गर्दै आएको छ । इजरायलमा रहेको दूतावासले साइप्रसमा रहेका नेपालीका समस्यासमेत हेर्दै आएको छ भने, साइप्रसको समेत भिसा सह–प्रमाणीकृत यहाँबाट हुन्छ ।

साइप्रसमा पनि करिब १२ हजारभन्दा धेरै नेपाली कामदार र विद्यार्थी छन् । साइप्रसस्थित नेपाली अवैतनिक वाणिज्य दूतावास तथा त्यहाँ क्रियाशील विभिन्न नेपाली संघ संस्थाहरूसँग सहकार्य र समन्वयमा काम भइरहेको छ ।

इजरायल र साइप्रसमा समस्या परेका नेपालीलाई परराष्ट्र मन्त्रालय, श्रम, रोजगार तथा सामाजिक सुरक्षा मन्त्रालय, इजरायलमा रहेको नेपाली दूतावास र साइप्रसमा रहेका नेपालीहरूलाई सम्पर्कका लागि दुई वटा मोबाइल नम्बर, दूतावासको फेसबुक पेज तथा वेवसाइटमा सम्पर्क गर्ने व्यवस्था मिलाएका छौँ ।

इजरायलमा रहेका नेपालीहरू कोरोना महामारीबाट कति प्रभावित भए ?

कोरोनाका कारण इजरायलमा १ जना नेपालीको मृत्यु भएको दूतावासलाई जानकारी आएको छ । कोरोना संक्रमति करिब १ सय जना भएका थिए । उनीहरू उपचार गरेर निको भएको दूतावासलाई जानकारी आएको छ ।

इजरायलमा रोजगारीमा कार्यरत नेपालीलाई कोरोना महामारीको प्रभाव कम परेका छ । इजरायली उच्च प्रविधि विश्वमै चर्चित भएको र इजरायलले कोरोना महामारी नियन्त्रणमा राम्रो सफलता हासिल गर्ने देशभित्र पर्छ ।

इजरायल सरकारले आप्रवासी कामदारलाई स्वास्थ्य उपचारमा राम्रो सुविधा दिएको छ । कोरोना महामारीमा इजरायल सरकारले सुरक्षाकर्मीहरूलाई प्रभावकारी रूपमा परिचालन गरेको थियो ।

इजरायलमा कोरोना भाइरसविरुद्धको फाइजर बायोएनटेक खोपको निकै राम्रो प्रभावकारिता देखियो । करिब ६४ प्रतिशत जनसंख्याले लगाइसकेका छन् । जसमा नेपाली समेत पर्छन् ।

इजरायल नेपाली कामदारका लागि कस्तो रोजगार गन्तव्य देशभित्र पर्छ ?

वैदेशिक रोजगारीका लागि इजरायल आकर्षक रोजगार गन्तव्य देशभित्र पर्छ । आयस्रोत, आम्दानी, रोजगारीजन्य श्रमिक स्वास्थ्य सुरक्षाका दृष्टिले इजरायल विश्वकै उत्कृष्ट देशभित्र मानिन्छ ।

इजरायलमा कार्यरत नेपाली श्रमिक सुरक्षित भएर काम गरिरहेका छन् । उनीहरूले करार सम्झौताअनुसार नै पारिश्रमिक पाइरहेका छन् । इजरायल रोजगारीका लागि आएका नेपाली कामदारले काम मात्र होइन आत्मनिर्भर हुने तालिम समेत सिक्दैछन् ।

इजरायलको कृषि प्रविधि नेपाल भित्र्याउन समेत सहयोग भइरहेको छ । इजरायलमा रोजगारीका क्रममा सिकेको सीप नेपाल फर्किएपछि देशभित्र जीवनस्तर उठाउन तथा मुलुकलाई समृद्ध बनाउन समेत ठूलो सहयोग हुन्छ । कामसँग धेरै सीप समेत सिक्ने अवसर पाएका छन् ।

नेपाल र इजरायलबीच सरकारीस्तरमा श्रम सम्झौता भएको छ । कामदार लैजाने प्रक्रिया कहिलेबाट सुरु होला ?

नेपाली श्रमिक आपूर्ति गर्न विषयमा इजरायल र नेपाल सरकारबीच श्रम सम्झौता गत असोजमै भएको थियो । श्रम सम्झौता गर्दा इजरायलको श्रम बजारमा अस्थायी रोजगारीमा कामदार आपूर्ति गर्न विषय समेटिएको छ ।

दुई देशबीच भएको श्रम सम्झौताका आधारमा नेपाली कामदार ल्याउन प्रक्रिया चाँडै सुरु हुन्छ ।

वैदेशिक रोजगार विभागले यही प्रयोजनका लागि निर्देशिका जारी गरिसकेको छ । आगामी दिनमा इजरायलबाट औपचारिक डिमान्ड लेटर पाएपछि छिटै नै विभागले आवेदन फारामका लागि सूचना प्रकाशन गर्छ ।

इजरायलले नेपालबाट कस्ता कामदार रोजगारीमा लिन चाहन्छ ? नेपाली कामदारको माग बढाउन नेपाल सरकारले के गर्नुपर्छ ?

इजरायलको श्रम बजारमा तत्काल केयरगिभर, नर्सिङसँगै स्वास्थ्य क्षेत्रमा काम गर्ने श्रमिकको माग धेरै छ । सोहीअनुसार नेपालले पनि श्रम सम्झौता गरेको छ । दूतावासले इजरायलमा कृषिमा समेत नेपाली श्रमिक भित्र्याउनका लागि पहल काम गरिरहेको छ ।

कृषि र स्वास्थ्यसँगै निर्माण, होटल क्षेत्रमा पनि नेपाली श्रमिक भित्र्याउन सकिन्छ । यो विषयमा इजरायलको सम्बन्धित पक्षसँग दूतावासले छलफल समेत गर्दै आएको छ ।

इजरायल रोजगारीमा आउने नेपाली श्रमिकले सीप, हिब्रु भाषा, इमान्दारिता, परिश्रम गर्नुपर्छ ।
इजरायल प्रविधिमैत्री देशभित्र पर्छ । सोहीअनुसार विदेशी श्रमिक आपूर्ति गर्दै आएको छ । इजरायलमा नेपाली श्रमिकलाई धेरै मन पराइन्छ ।

हाल इजरायलमा रहेका नेपालीहरूलाई के सन्देश दिन चाहानुहुन्छ ?

इजरायल र प्यालेस्टाइनबीच भएको युद्धका कारण नेपालीहरूलाई त्रसित तुल्याएको छ । यो घटनाबाट नआत्तिन तथा सम्भव भएसम्म सुरक्षाका उपायहरूको खोजी गर्नेतर्फ लाग्न दूतावासले इजरायलमा रहेका नेपालीलाई हार्दिक अपिल गर्दै आएको छ ।

इजरायल र प्यालेस्टाइनबीच आक्रमण सुरु भएपछि साइरन बज्छ । साइरन बजेपछि घरभित्र हुनुहुन्छ भने बङ्कर, भर्याङ्ग वा त्यस्तै सुरक्षित क्षेत्रमा जानुपर्छ । यो विषयमा प्राय सबै नेपालीलाई जानकारी छ ।

साइरन बजेपछि झ्याल नजिक नजानु, यदि घरबाहिर (बजार, सडक, फार्म वा अन्यत्र कतै) हुनुहुन्छ भने पनि नजिकैको बङ्करमा पस्नुपर्छ । बङ्कर उपलब्ध नभएमा जहाँ हुनुहुन्छ त्यहाँ सुरक्षित हुने उपाय अपनाउनु होला ।

यादि समस्या पर्नु भए तत्काल इजरायलमा रहेको दूतावास, रोजगारीमा कार्यरत घर र साथीभाइलाई सम्पर्क गर्न अनुरोध छ ।

प्रकाशित मिति: शनिबार, जेठ १, २०७८ ०८:१३