कोभिडविरुद्धको लडाइँमा निजीक्षेत्रबाट भएका प्रशंसनीय काम, कसले के गरिरहेको छ ?

कोभिडविरुद्धको लडाइँमा निजीक्षेत्रबाट भएका प्रशंसनीय काम, कसले के गरिरहेको छ ?

A+ A A-

कोरोना संक्रमणबाट नेपालमा पछिल्ला केही दिनयता दैनिक २ सयभन्दा बढीले ज्यान गुमाइरहेका छन् । तर, कोरोना रोकथाम तथा नियन्त्रणका लागि सरकारको काम गर्ने रफ्तारमा भने खासै परिवर्तन आउन सकेको छैन ।

अस्पतालमा अक्सिजनको अभाव छ भने कोरोना संक्रमितले उपचारका लागि बेडसम्म पाउन पनि उत्तिकै सकस छ । कोरोना संक्रमण तीव्र गतिमा फैलिरहेका बेला स्वास्थ्य मन्त्रालयले हात झिक्दै सरकारको मात्रै भर नपर्न अपिल गरिसकेको छ ।

यस्तो अवस्थामा ७० प्रतिशत अर्थतन्त्रको भार ओगट्ने निजीक्षेत्र के गरिरहेको छ त ? के खोप नेपाल ल्याउन पनि कमिसन नपुगेको भन्दै रोक्ने काम मात्रै भएको छ त ?

पछिल्ल‍ो साता निजीक्षेत्रबाट केही प्रशंसनीय काम भएका छन् । नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स, निर्माण व्यवसायी महासंघलगायतका निजीक्षेत्रका प्रतिनिधिमूलक संस्थाले केही प्रशंसनीय कामको थालनी गरेका छन् । केही उद्योग तथा प्रतिष्ठानहरूले अस्पतालमा सहयोग गरेर जनताको जीवन बचाउन सहयोग गरिरहेका छन् ।

कसले के गरे ?

गत आर्थिक वर्ष सरकारलाई सबैभन्दा बढी आयकर तिरेका विजयकुमार शाह अध्यक्ष रहेको जावलाखेल ग्रुप अफ इन्डस्ट्रिजले धुलिखेल अस्पताललाई १ करोड ३४ लाख २५ हजार रुपैयाँ सहयोग गरेको छ ।उक्त सहयोग रकम आईसीयूका लागि आवश्यक उपकरण, अक्सिजन प्लान्ट र सिलिण्डरको प्रयोजनका लागि खर्च गर्ने प्रतिवद्धता धुलिखेल अस्पतालले गरेको छ ।

नेपाल उद्योग वाणिज्य महासंघका अध्यक्ष शेखर गोल्छा प्रबन्ध निर्देशक रहेको गोल्छा अर्गनाइजेसनले पनि १ करोड रुपैयाँ सहयोग उपलब्ध गराएको छ । गोल्छा ग्रुपले पाटन स्वास्थ्य विज्ञान प्रतिष्ठानलाई कोरोना संक्रमणको उपचारका लागि सहयोग उपलब्ध गराएको हो । पाटन अस्पतालले उक्त सहयोग रकमलाई अक्सिजन व्यवस्थापन र उपकरणको अभावलाई पूर्ति गर्न खर्चिने जनाएको छ ।

पाटन अस्पतालमार्फत १ करोड रुपैयाँ सहयोग उपलब्ध गराएपछि संकटका बेला सबैले सहकार्य गर्नुपर्ने ग‍ोल्छाले बताए । `हामी सबैले आ-आफ्नो स्थानबाट सहकार्य र हातेमालो गरेर यो महामारीबाट छिट्टै पार पाउन सफल हुनेछौँ,´ उनले भने ।

महासंघले सञ्चालन गर्‍यो आइसोलेसन

नेपाल उद्योग वाणिज्य महासंघको अगुवाइमा निर्माण भएको आइसोलेसन सेन्टर सञ्चालनमा ल्याइएको छ । महासंघले कोभिड संक्रमितका लागि कमलादीस्थित जैन ज्ञान निकेतनमा आइसोलेसन सेन्टर निर्माण गरेर सञ्चालनमा ल्याएक‍ो छ ।

आइसोलेसन सेन्टरमा निम्न आय भएका र दैनिक ज्यालादारी गरेर जीविकोपार्जन गर्ने संक्रमितलाई पौष्टिक आहारका साथै, सेवन गर्ने औषधि र स्वास्थ्य उपचार निःशुल्क उपलब्ध गराइनेछ ।आइसोलेसन सेन्टरमा ४० बेड रहेको महासंघको कार्यकारिणी समितिका सदस्य रञ्जितराज आचार्यले बताए ।

त्यस्तै, महासंघले `एफएनसीसीआई अपरेशन कोभिड रिलिफ नेपाल’ अभियानको थालनी गरेको छ । यो अभियानअन्तर्गत गत शनिबारदेखि हेल्लो डाक्टर कार्यक्रम थालनी गरिएको छ ।

‘कोभिड संक्रमित भई घर वा आइसोलेसनमा बसेका र चिकित्सकको परामर्श लिन चाहनेलाई पाँच जना डाक्टरमार्फत परामर्श दिइएको महासंघले जनाएको छ । बिहान ९ बजेदेखि १२ बजेसम्म र दिउँसो ३ बजेदेखि ६ बजेसम्मका लागि समय छुट्याइएको यो कार्यक्रमबाट परामर्श लिन २११११२११११ भाइवर नम्बरमा म्यासेज गरेर भिडियो संवाद गरिनेछ ।

चेम्बरको एम्बुलेन्स सेवा

नेपाल चेम्बर अफ कमर्सले एम्बुलेन्स सेवा सञ्चालनमा ल्याएको छ । आपत्कालीन स्वास्थ्य प्रयोजनका लागि बिहान ७ बजेदेखि साँझ ७ बजेसम्म एम्बुलेन्स सेवा उपलब्ध गराइएक‍ो चेम्बरले जनाएको छ ।

काठमाडौं उपत्यकाभित्रका अस्पताल जानुपर्ने बिरामीहरूले एम्बुलेन्स सेवा लिन सक्ने गरी सेवा सञ्चालन गरिएको चेम्बर अध्यक्ष राजेन्द्र मल्लले जानकारी दिए । सेवा लिन मोबाइल नम्बर ९८५१२१६०३९ मा सम्पर्क गर्न चेम्बरले आह्वान गरेको छ ।

सीएनआईको करिब २ करोडबराबरको अक्सिजन कन्सन्ट्रेटर सहयोग

नेपाल उद्योग परिसंघ (सीएनआई) ले सरकारलाई अक्सिजन कन्सन्ट्रेटर उपलब्ध गराएको छ । गत मंगलबार ८ लिटर क्षमताका २०० थान अक्सिजन कन्सन्ट्रेटर स्वास्थ्यमन्त्री हृदयेश त्रिपाठीलाई उपलब्ध गराएको हो । जसको बजार मूल्य करिब २ करोड रुपैयाँ छ ।

हस्तान्तरण गरिएका कन्सन्ट्रेटर परिसंघका सदस्य संस्था होङ्सी–शिवम् सिमेन्टमार्फत सहयोग प्रदान गरिएको जनाएको छ । यता नेपाल निर्माण व्यवसायी महासंघले अक्सिजन अभावले मृत्यु हुन नदिन आफूहरूसँग भएका सिलिण्डर उपलब्ध गराउन आह्वान गरेको छ । अहिले जिल्ला-जिल्लाबाट अक्सिजन सिलिण्डर उपलब्ध गराइएको महासंघका अध्यक्ष रवि सिंहले बताए ।

निजीक्षेत्र सधैँ नाफाको पक्षमा देखिएको हुन्छ । तर, मानवीयता बिर्सेर परिधिभन्दा बाहिर गएर गरिने नाफाका कारण कतिपय घरानाहरू आलोचित छन् । कोभिड-१९ को पहिलो लहरमा शंकर ग्रुपका सुलभ अग्रवालले एउटै थर्ममिटरको १५ हजार मूल्य लिएर बेच्ने क्रममा पक्राउ परेका थिए । दोस्रो लहरका क्रममा नेपाल उद्योग वाणिज्य महासंघको नेतृत्व गरिसकेका व्यवसायी सुरज वैद्यसमेत एजेन्ट बनेर खोप ल्याउन अवरोध गरेको विषय छरपस्ट बनेको छ ।

यद्यपि यसअघि नेपाल उद्योग वाणिज्य महासंघ, उद्योग परिसंघ र नेपाल उद्योग परिसंघले संकटको समयमा नाफा कमाउने उद्देश्य नराख्न र अनुचित कार्यमा सहभागी नहुन अपिल गरेका छन् ।

प्रकाशित मिति: शुक्रबार, वैशाख ३१, २०७८ १२:०१