प्रयोग बढेको बढ्यै तर टेलिकमको नाफा २२ प्रतिशतले घट्यो, घट्नुका यी हुन् कारण

प्रयोग बढेको बढ्यै तर टेलिकमको नाफा २२ प्रतिशतले घट्यो, घट्नुका यी हुन् कारण

A+ A A-

सरकारी दूरसञ्चार सेवा प्रदायक कम्पनी नेपाल टेलिकमको खुद नाफा ह्वात्तै घटेको छ । टेलिकमले बिहीबार निकाले चालू वर्षको तेस्रो त्रैमास (साउनदेखि चैतसम्मको) अवधिको नाफामा २२ प्रतिशतले कमी आएको हो ।

यो अवधिमा टेलिकमले ५ अर्ब ८८ करोड रुपैयाँ नाफा कमाएको छ । यो गत वर्षको यसै अवधिको तुलनामा १ अर्ब ६८ करोड रुपैयाँले कमी हो ।

सेवा बिक्रीबाट हुने आम्दानीसहित सञ्चालन नाफा बढे पनि खुद नाफा भने घटेको छ । यो अवधिमा सबैभन्दा बढी आम्दानी हुने सेवा बिक्रीबाट २७ अर्ब ४५ करोड १३ लाख रुपैयाँसहित समग्र आम्दानी ३१ अर्ब ६७ करोड ७३ लाख रुपैयाँ भएको छ ।

खर्चतर्फ प्रशासनिक ८ अर्ब ८ करोड, सञ्चालन तथा मर्मत ५ अर्ब ५३ करोड, कर्मचारी ५ अर्ब ३२ करोडसहित समग्र खर्च २२ अर्ब ७५ करोड रहेको छ ।

सञ्चालन नाफा भने बढेको छ । सञ्चालन नाफा ८ अर्ब ९२ करोड रहेको छ । तर, खुद आम्दानी भने २२ प्रतिशतले कमी आएको छ ।

किन घट्यो नाफा

कोभिडका कारण इन्टरनेटको प्रयोग पछिल्लो वर्ष अत्यधिक बढेको छ तर नाफा भने कसरी घट्यो त ? नेपाल टेलिकमका महाप्रबन्धक डिल्लीराम अधिकारी भन्छन् `नाफा घट्नुमा मुख्य कारण फरेन एक्सचेन्ज रेट हो, फरेन एक्सचेञ्जमा कमी आएको कारण मुख्य रूपमा नाफा घटेको हो ।'

उनका अनुसार टेलिकमले राख्ने विदेशी मुद्राको सञ्चितीबाट हुने नाफामा कमी आएको छ । गत वर्ष यस्तो नाफा १ अर्ब ४ करोड रहेकोमा यो वर्ष भने ८ करोड घाटामा छ । गत वर्ष एक डलर बराबर १ सय २० रुपैयाँ रहेकोमा अहिलेको वित्तीय विवरण निकाल्ने क्रममा १ डलर बराबर १ सय १७ रुपैयाँ रहेको छ ।

त्यस्तै वाणिज्य बैंकहरूमा राखेको माैजदातबापत हुने आम्दानीमा पनि कमी आएको छ । गत वर्ष बैंकको निक्षेप ब्याजदर १० प्रतिशत रहेकोमा यो वर्ष ७ प्रतिशत मात्र‌ै रहेको महाप्रबन्धक अधिकारीले बताए ।

त्यस्तै विदेश आवतजावतमा कमी आएका कारण रोमिङ कलमार्फत हुने आम्दानीमा पनि कमी आउँदा समग्र नाफा घटेको टेलिकमले उल्लेख गरेको छ । मुख्य रूपमा विनिमयदर घटेको र ब्याज घटेका कारण नाफामा कमी आएको टेलिकमले जनाएको छ ।

प्रकाशित मिति: बिहीबार, वैशाख ३०, २०७८ १७:०१