रूपन्देहीमा सेनाको हेलिकोप्टरमार्फत ल्याइयो ५० थान अक्सिजन सिलिन्डर

A+ A A-

रूपन्देहीमा अक्सिजनको अभावमा कोरोना संक्रमितको ज्यान जान थालेपछि नेपाली सेनाको हेलिकोप्टरबाट अक्सिजन ल्याइएको छ ।

नेपाली सेनाको एमआई ९० हेलिकोप्टरबाट ५० थान सिलिन्डर अक्सिजन बुटवलमा ल्याइएको हो । रूपन्देहीका प्रमुख जिल्ला अधिकारी अस्मान तामाङले रूपन्देहीको उत्पादनले धान्न नसकेपछि तत्काल समस्या समाधानमा लागि ५० थान सिलिन्डर अक्सिजन ल्याइएको बताए ।

हेलिकोप्टरमार्फत ल्याएको ५० थान सिलिन्डर अक्सिजन भैरहवास्थित भीम अस्पताल र लुम्बिनी प्रादेशिक अस्पतालमा पठाइने उनले बताए ।

सेनाले बाराको सिमराबाट र चितवनबाट ५० थान सिलिण्डर ल्याएको र बिहीबार बिहान दुई पटक गरी थप एक सय थान सिलिन्डर ल्याइने उनले बताए ।

यसका साथै बुटवलबाट पोखरा, चितवन, वीरगन्ज, विराटनगरलगायतका स्थानमा खाली सिलिण्डर पठाइएको र ती सिलिन्डरहरू समेत सडकमार्गबाट आउने क्रममा रहेको उनको भनाइ छ ।

अक्सिजन अभावमा नौसहित १३ संक्रमितको मृत्यु

अक्सिजन अभाव हुँदा रूपन्देहीका विभिन्न अस्पतालमा नौ जना कोरोना संक्रमितको मृत्यु भएको छ । भैरहवाको भीम अस्पतालमा चार र बुटवलको कोरोना विशेष अस्पतालमा पाँच गरी नौ जनाको अक्सिजन अभाव हुँदा मृत्यु भएको हो भने उपचारका क्रममा थप पाँच संक्रमितको मृत्यु भएको छ ।

बुटवलको कोरोना विशेष अस्पतालमा अक्सिजन अभावका कारण बुधबार दिउँसो पाँच जनाको मृत्यु भएको हो । अस्पतालका सूचना अधिकारी डा. विष्णु गौतमले अक्सिजन अस्पतालमा हिजोदेखि नै अभाव भएकाले संक्रमितको मृत्यु भएको बताए ।

आईसीयूमा उपचाररत चार पुरुष र एक महिलाको मृत्यु भएको उनको भनाइ छ । मृत्यु हुनेमा बुटवल–८का २९ वर्षीय पुरुष, बुटवल– ११ का ५२ वर्षीय पुरुष, बुटवल–१२ का ५९ वर्षीय पुरुष र बुटवल–१३ का ५२ वर्षीय पुरुष तथा बर्दघाटकी ४४ वर्षीया महिला रहेको प्रवक्ता गौतमले बताए ।

त्यस्तै, भीम अस्पताल भैरहवामा अक्सिजनको अभावमा चारसहित उपचारत थप तीन जनाको मृत्यु भएको छ । भीम अस्पतालमा आज बिहान १५ मिनेट अक्सिजन अभाव हुँदा चार जनाको मृत्यु भएको अस्पताल स्रोतले जनाएको छ ।

भीममा अक्सिजन नपाएर मृत्यु हुनेमा लुम्बिनी सांस्कृतिक नगरपालिका ११ का ३९ वर्षीय पुरुष, ओमसतिया गाउँपालिका २ का ७० वर्षीय पुरुष, तिलोत्तमा नगरपालिका ४ की ४४ वर्षीया महिला र तिलोत्तमा ८ की ४४ वर्षीया महिला रहेका छन् । यसैगरी, उपचारका क्रममा सिद्धार्थनगर ७ की ६५ वर्षीया महिला, रोहिणी ३ का ५८ वर्षीय पुरुष र सियारी २ का ८५ वर्षीय पुरुषको मृत्यु भएको छ ।

त्यस्तै, युनिभर्सल मेडिकल कलेजमा उपचाररत दुई जना संक्रमितको मृत्यु भएको छ । गैडहवा गाँउपालिका ७ की ४० वर्षीय महिला र तिलोत्तमा नगरपालिका १३ का ३२ वर्षीय पुरुष संक्रमितको आज बिहान मृत्यु भएको अस्पताल प्रशासनले जानकारी दिएको छ ।

प्रकाशित मिति: बुधबार, वैशाख २९, २०७८ २०:१५