काेराेना निकाे भएपछि ७९ वर्षीया मिठुदेवीको सुझाव : मास्कमा जीवन छ नछोड्नू, बाहिर कोरोना छ नडुल्नू

काेराेना निकाे भएपछि ७९ वर्षीया मिठुदेवीको सुझाव : मास्कमा जीवन छ नछोड्नू, बाहिर कोरोना छ नडुल्नू

A+ A A-

नयाँ वर्षको पूर्वसन्ध्यामा हेटौंडाकी ७९ वर्षीया मिठुदेवीलाई एक्कासि छाती दुख्ने, सास फेर्न गाह्रो हुने र ज्वरो आउने समस्याले गाँज्यो ।

उनको परिवारलाई डर थियो, कतै हृदयघात त हुन लागेन ?

पाँच वर्षअगाडिको घटना सम्झेर छोरी बिनाले उनलाई तत्कालै अस्पताल लगिन् । त्यसबेला उनी हृदयघातबाट जसाेतसाे बँचेकी थिइन् । यसपालि फेरि अस्पताल पुग्नेबित्तिकै मुठुदेवी बेहोस् भइन् ।

जाँचेपछि डाक्टरले प्रतिक्रिया दिए, ‘माइनर अट्याक’ ।

उनलाई इमरजेन्सीमा भर्ना गरियो । स्लाइन् चढाइयो । अक्सिजन दिइयो । एक्स–रे गर्दा निमोनिया देखियो । अस्पताल बसाइको पाँच दिनसम्म पनि निमोनिया नघटेपछि डाक्टरको सल्लाहमा कोरोना परीक्षण गरियो । १ वैशाखमा रिपोर्ट पोजिटिभ आयो ।

घर हेटौंडा भए पनि मिठुदेवी काठमाडौं बस्थिन् । चार महिनाअघि उनी छोरीको घर भरतपुर आएकी थिइन् ।

उनको हात दुर्घटनामा परी भाँच्चिएको थियो । छोरीकै घरबाट अस्पताल धाएर उनी हातको उपचार गर्दै थिइन् । तर, हात निको नहुँदै कोरोना लागिहाल्यो ।

कोरोना संक्रमण देखिएपछि छोरी बिनाले आमालाई भरतपुर अस्पतालको कोभिड वार्डमा भर्ना गरिन् ।

१४ दिन अस्पतालमा बसेकी मिठुलाई कोरोनाका जटिल लक्षण त देखा परेनन् । तर, खान मन लाग्दैन थियो । कमजोर महसुस भइरहन्थ्यो । नजिक जान नपाए पनि छोरी बिनाले उनलाई टाढैबाट हौसाइरहन्थिन्, ‘नआत्तिनु है । खाना खानुपर्छ । कति धेरै मान्छे कोरोना ठीक भएर घर फर्केका छन् । तपाईं पनि फर्किनुपर्छ चाँडै ।’

छोरीले सम्झाउन्जेल त मिठुदेवी शान्तिको सास फेर्थिन् । तर, आँखैअगाडि आफूजस्तै संक्रमित मरेको देख्दा भने उनको मुटु काँप्थ्यो । तर, उनले कोरोना जितेर फर्कन्छु भन्ने आत्मविश्वासलाई मर्न दिइनन् ।

पाँच वर्षअगाडि पाठेघरको क्यान्सर हुँदाको पीडा सम्झिन्थिन् । हौसला र समयमै उपचार पाउँदा क्यान्सर जितेको अनुभवले थप आत्मविश्वास जगाउँथ्यो । अस्पताल बसाइको १३ दिनमा पीसीआर गर्दा रिपोर्ट नोगेटिभ आयो । ‘यसपछि त म अस्पतालमै नाचिदिएँ’, उनले सुनाइन्, ‘संक्रमित नहुँदासम्म त कोरोना केही होइनजस्तो लाग्थ्यो । तर, पछि थाहा पाएँ, यो खेलाँची गर्न नहुने रोग हो ।’

अहिले उनी आफ्नो सम्पर्कमा आएजतिलाई सुझाउँछिन्, ‘मास्कमा जीवन छ, त्यो नछोड्नू । बाहिर कोरोना छ, लखरलखर नडुल्नू ।’

प्रकाशित मिति: शुक्रबार, वैशाख २४, २०७८ १५:५८