अनि ती किशोरीलाई लाइभ च्याटले पोर्न साइटसम्म पुर्‍यायाे..

A+ A A-

कोभिड-१९ का कारण घरबाट बाहिर जान पाएकी थिइनन् उनी । कक्षा ११ को परीक्षा आउने बेलामा भएको कोभिडले उनलाई चिन्ता थपेको थियो ।

समय बिताउन उनी सामाजिक सञ्जालमा बढी सक्रिय हुन थालिन् । एक दिन दुई दिन त रमाइलै भयो । तर, साथीहरू उनै । खासै रमाइनन् । अर्थात् नयाँ साथीको खोजीमा लागिन् ।

यही बेला थाहा भयो । नेपालमा डेटिङ एप्सहरू छन् र त्यहाँबाट डेट गर्न सकिन्छ । उनी पनि टिण्डरमा जोडिइन् । टिण्डर चलाउँदै जाँदा भिडियो च्याट एप्स बिगाे लाइभमा पनि उनी जोडिइन् । प्रत्यक्ष भेटघाट भएजस्तै गरी लाइभमा धेरै जनासँग संवाद गर्न पाउँदा उनी खुसी भइन् । लाइभमा कुरा गर्दै जाँदा धेरै साथी भए उनका ।

नेपालका गाउँघरतिरका कुरा मात्र होइन, विदेशमा भइरहेका घटना पनि साथीहरूमार्फत थाहा पाउन थालिन् । दिनरात बिगाे लाइभमा बित्न थाल्यो उनको । बिगाे लाइभमा गेम पनि खेल्न मिल्छ भनेर उनले थाहा पाइन् । लाइभमै गेम खेल्न पाउने र दर्शक पनि हुने । उनीहरूले गिफ्ट पनि दिने । प्रशंसकहरू पनि हुने । उनी लाइभ गेमतिर लागिन् । बिगाेमा भेटिएका एक युवकसँग उनी ‘पिके’ अर्थात् गेममा मस्त थिइन् । घरी उनले जित्थिन् । घरी ती युवकले । गेमको नियमअनुसार जित्नेले हार्नेलाई सजाय दिने रहेछ ।

आफूले जित्दा युवतीले ओठमा लाली लगाउने, रुने, हास्नेजस्ता सजाय दिन्थिन् । ती युवकले पनि यस्तैयस्तै सजाय दिन्थे । एक महिनासम्म यसैगरी उनीहरूको गेम चलिरह्यो । रमाइलो पनि भयो । धेरै जनाले लाइभमै जोस थप्थे । हुटिङ हुन्थ्यो । कसरी जित्ने हुन्थ्यो । हार्नेलाई यस्तो सजिलो सजाय दिएको भन्ने गर्थे । कडा सजाय दिँदा अरुबाट गिफ्ट आउँथ्यो । किशोरीले त्यसरी नै कडा सजाय दिँदादिँदै लाइभमै ती युवकसँग वादविवाद भयो ।

हो मा हो । कोभन्दा को कम हुन थाल्यो । उता लाइभमा जोडिएकाहरूले जोस्याइरहेका थिए । यत्तिकैमा हारेको खण्डमा जे पनि गर्नेजस्तो भयो । एक/दुई/तीन गर्दै सजायहरू निर्धारण गरियो । खेल सुरु भयो किशोरीले हारिन् । ती युवाले किशोरीको कट्टु खोल्न भने । किशोरीले पत्तै पाइनन् । जोसमा खोलिन् । आजलाई गेम सकियो ।

भोलिपल्ट उनको त्यो भिडियो पोर्न साइटमा आयो । र, अहिले पनि यो भिडियो पोर्न साइटमा छ । उनका साथीदेखि धेरैले फेसबुक, इन्स्टाग्राम जताततै म्यासेज गर्न थाले । सामाजिक सञ्जाल नै उनलाई अब घाँडो लाग्न थाल्यो । पछि फोन पनि आउन थाल्यो । ‘कल गर्ल’ भन्न थाले । पोर्न साइटमा भिडियो हुने केटी भनेर उनको खिसिटिउरी गर्नेहरू धेरै भए । आत्महत्या गर्ने अवस्थामा उनी पुगिन् । बेलैमा मनोविमर्शकर्ताकोमा पुगेका कारण उनको जीवन त जोगियो तर पीडा अझै बाँकी छ ।

अर्की किशोरीको पनि यस्तै घटना छ । साथीसंगीको लहलहैमा बिगाे लाइभमा जोडिइन् । आफ्नो उमेरको भन्दा अलि पाको उमेरका मानिसहरूको कुरा उनलाई मन पर्न थाल्यो । समूहमा हुने लाइभमा उनी जोडिइन् । धेरै जना एकसाथ लाइभमा कुरा गर्न पाउँदा उनलाई रमाइलो पनि लाग्यो ।

एक/दुई दिन गर्दै जाँदा उनलाई माया गर्नेहरू पनि धेरै भए । 'कोइलीको जस्तो स्वर, सुरिलो शरीर, मीठो मुस्कान' यस्तै भन्दै उनको प्रशंसा गर्न थाले । यस्तो प्रशंसा ग्रुप लाइभमै आउँदा उनी खुसी भइन् । कोभिडको त्रास जित्ने सहारा पाइन् । एकछिन कुरा नगरे उनलाई खान पनि मन लाग्न छाड्यो ।

विस्तारै उनमा लत नै बस्यो । यसैगरी ग्रुप लाइभ चलिरहँदा एक दिन अनौठो घटना भयो । रातको १२ बज्न लागेकाे थियो । उनीसहित आठ जना लाइभमा थिए । उनीबाहेक सबै पुरुष थिए । आज जेजस्तो भए पनि सबैले हेर्ने है भने । तीमध्ये एकले लाइभमै यौनसम्पर्क गर्न थाले । गोप्य अंगहरू देखाउन थाले । किशोरीले लाजले मुख छोपिन् । तर, अरु पुरुषहरूले बहिनी खै भनेर बोलाए र हेर्न लगाए ।

यो भिडियो पनि पोर्न साइटमा अपलोड भयो । र, अहिले पनि छ । त्यसपछि उनलाई नसोचेको तनाव भयो । जीवन नै तलमाथि हुने अवस्था आयो । त्यही भिडियो देखाएर ब्ल्याकमेल गर्नेहरू धेरै भए । परिवारले थाहा पाउला भनेर घटना लुकाउन उनले हर प्रयत्न गरिन् । उजुरी गर्न जाने आँट आएन । एक्लै लडिन् । मन मिल्ने साथीहरूको सहारामा उनी पीडा कम गर्न संघर्षरत छिन् ।

सामाजिक सञ्जाल चलाउँदै जाँदा डेटिङ एप्स टिन्डरमा जोडिइन् एक १६ वर्षकी किशोरी । १८ वर्षभन्दा कम उमेरको व्यक्ति जोडिन नमिल्ने भएकाले उनले उमेर बढाएर १९ वर्ष बनाइन् । त्यहाँ उनको नाम र फोटो थियो । पूरा नाम पनि थिएन । अरु सामाजिक सञ्जालको लिङ्क पनि थिएन । टिण्डरमा गरेको लाइक र म्यासेज हेर्न पैसा तिर्नुपर्ने थियो । तर, उनले लाइक, कमेन्ट सबै हेर्न पाइन् । केही दिन हेर्न दिने रहेछ कि भनेर उनले सोचिन् । तर, यथार्थ अर्कै थियो ।

उनको फोटोलाई पछ्याउँदै उनको फेसबुक पत्ता लगाएछन् । त्यसरी फेसबुक पत्ता लगाउनेले एक महिना टिण्डर चलाउन लाग्ने पैसा तिरिदिएका रहेछन् । आफ्नै उमेरको साथी सम्झेर किशोरीले कुरा गर्दै गइन् । मन पर्ने, नपर्ने, के गर्दा खुसी हुने, के कुराले दुःखी हुनेजस्ता कुरा चल्दै गए ।

किशोरीले ती व्यक्तिलाई विश्वास गर्न थालिन् । दुःखसुखका कुरा भए । लकडाउन खुलेपछि भेट्ने कुरा भयो । दिनरात कुरा गर्थे । एक दिन म्यासेजमा स्क्रिनसट आयो । किशोरीको पैसा उनले तिरेका रहेछन् । त्याे स्क्रिनसट बल्ल पठाए । आफूसँग मीठो कुरा गरिरहेका व्यक्तिले नै टिण्डर चलाउने पैसा तिरेको थाहा पाउँदा किशोरी झन् खुसी भइन् । अब उनीहरू अरु सामाजिक सञ्जालतिर पनि जोडिन थाले । ती व्यक्तिले भनेअनुसार किशोरीले म्यासेज गर्ने, फोटो पठाउने गरिन् ।

लकडाउन खुल्यो । उनीहरू भेट भए । किशोरी छाँगाबाट खसिन् । ती व्यक्ति ४० वर्षवरपरका थिए । धेरै कुरा नगरी किशोरी घर फर्किइन । एक साइटमा ब्लक गर्थिन् । अर्कोमा उनी कडा रूपमा प्रस्तुत हुन्थे । किशोरीको फोटो पोर्न साइटमा हाल्ने धम्की दिन्थे । म्यासेजहरूको स्क्रिनसट पठाउँदै धम्की दिन थाले । केही उपाय नलागेपछि किशोरीले पुनः उनलाई भेटिन् । ‘लभ गर्ने साथी चाहियो भनेर डेटिङ साइट चलाउनेलाई कसैले राम्रो भन्दैन, केटा खोज्न आएकी नै भन्छ,’ यस्तै कुरा गरिरहे ती व्यक्तिले, ‘केटा चाहियो भन्दै साइट धाउने अनि अहिले सती सावित्री बन्ने ?’ धम्काउन पनि भ्याए उनले ।

कस्तो प्रकारको साथी खोजेको मात्र होइन, यौन सम्पर्क गर्दा कस्तो साधन प्रयोग गर्नुहुन्छ भनेर पनि केही साइटमा सोधिएको हुन्छ । अझ अहिले त कोरोना महामारीका कारण 'यौन सम्पर्क गर्दा मास्क लगाउनुहुन्छ कि नाइँ' भनेरसमेत यस्ता साइटमा सोधिएको हुन्छ । यी साइट वयस्क साइट हुन् । र, वयस्कलाई यसरी सोध्नु पनि पर्छ ।

किशोरीलाई यौन प्रस्ताव राखे । उनले उमेर नपुगेको भनेर चलाखी गरिन् । तर ती व्यक्तिले केही गरे पनि मानेनन् । जबर्जस्ती गर्न थाले । ट्वाइलेटमा गएर योनीमा स्यानिटरी प्याड राखिन् । र, महिनावारी भएको बताइन् । जसका कारण त्यो दिन उनी जोगिइन् । त्यति मात्र होइन, ती व्यक्तिसँग भएको संवाद जति उनले मोबाइलमा रेकर्ड गरिन् । पछि भेट्न नमान्दा पुनः फोटो पोर्न साइटमा हाल्ने धम्की दिएका थिए उनले । किशोरीले पनि यौन सम्पर्कका लागि उनले दिएको दबाबको रेकर्ड सुनाइन् । त्यसपछि ती व्यक्तिले किशोरीको पिछा गर्न छाडे ।

कफी, हाइकिङ, नृत्य, खानाजस्ता २५ मध्ये दशवटासम्म छानेर ती कुरा मिल्ने सोल्मेट छान्न पाइने डेटिङ एप्सहरू अहिले प्रचलनमा छन् । यस्तै एप्समध्ये एक हो क्वीक क्वीक । यो साइटमा नेपाली युववायुवती धेरै आवद्ध छन् । फेसबुक र फोनमध्ये एकबाट भेरिफाइ गर्न मिल्ने यो साइट अलि विश्वसनीय मानिन्छ ।

यही साइटमा जोडिएकी एक किशोरी धेरै कुरा मिल्ने साथी पाउँदा खुसी थिइन् । यो साइटमा पनि १८ वर्षभन्दा कम उमेरलाई एकाउन्ट खोल्न प्रतिबन्ध छ । त्यसको कारण उनले उमेर बढाएकी थिइन् । नौवटा मिल्ने कुरा भएको एक साथी भेटिन् किशोरीले । उनले लाइक मात्र के गरेकी थिइन्, उनको फेसबुक म्यासेन्जरमा एक व्यक्तिको स्क्रिनसट आयो । त्यो थियो डेटिङ एप्समा भएको उनको फोटो । र, भनिएको थियो, ‘जसरी तिमीले पूरा नाम र फोन नम्बर पब्लिक नगर्दा पनि पत्ता लगाएर म्यासेन्जरमा पठाउन सकेँ । त्यसैगरी तिम्रा अरु गोप्य कुराहरू पनि थाहा छ ।’

तुरुन्तै डेटिङ साइटबाट आफ्नो एकाउन्ट डिलिट गरिन् र केही समय अरु सामाजिक सञ्जाल चलाउन छाडिन् । र, विस्तारै पुरानो घटना बिर्सिएर अगाडि बढेकी छन् उनी । भन्छिन्, ‘मन मिल्ने साथी खोज्नु भनेको यौनकर्मी नै बन्नु हो र ? यस्ता साइटमा हुनेहरूले यस्तै व्यवहार गर्दा रहेछन् ।’

यस्तो देखेपछि वाक्क लागेर यी साइट चलाउन छाडेको उनले बताइन् । कतिपयले यिनै साइटबाट राम्रा साथीहरू पनि पाएको उदाहरण छ । राम्रोसँग चलाउन जान्यो भने यी साइटहरू पूरै खराब होइनन् । तर, प्रभावकरी नियमनका कारण यिनै साइटहरूबाट मानिसहरूले यौन व्यवसायसमेत चलाएका छन् ।

फेसबुक, टिकटक, इन्स्टाग्रामजस्ता सामाजिक सञ्जालबाट मात्र युवापुस्ता सन्तुष्ट छैन । अझ किशोरावस्था त जिज्ञासु उमेर हो नै । यो बेला उनीहरू हरेक बेला नयाँ-नयाँ कुरा खोजिरहेका हुन्छन् । कोरोनाका कारण भएको लकडाउनमा घरबाहिर निस्कन नपाउँदा उनीहरूको महत्त्वपूर्ण साथी भनेकै सामाजिक सञ्जाल हो । सामाजिक सञ्जालमा को, कस्तो पर्छ थाहा हुन्न । तर, डेटिङ साइटहरू भने अलि फरक छन् । र, विश्वभरमा नै मानिसहरू विस्तारै डेटिङ साइटमा जोडिँदै गएको पाइन्छ । आनीबानी मिल्ने साथी प्रत्यक्ष भेटबिना नै छान्न पाइने भएकाले यस्ता साइटहरू लोकप्रिय हुँदै गएका हुन् ।

नेपाली युवामाझ केही डेटिङ साइटहरू प्रसिद्ध छन् । टिण्डर, क्वीक क्वीक, को मिट, मिट मि, दिलमिल, स्कीउट, नेपाली मात्री मोनी, मुसुक्क, तानतानमा नेपाली युवाहरू भेटिन्छन् । उमेर छलेर युवा देखिन खोज्नेहरू पनि यिनै साइटमा भेटिन्छन् । युवा पुस्ताले साथी खोज्ने यी साइटहरू यौनधन्दा चलाउन पार्टनर खोज्ने, धम्क्याएर पैसा असुल्नेजस्ता गैरकानुनी कार्य गर्नेहरू पनि यी साइटमा जोडिएको पाइन्छ । इन्स्टाग्राम र फेसबुक पेजमा लाइक र भ्युअर्स बढाउन सेलिब्रेटी हुन खोज्नेहरू पनि यी साइटमा पाइन्छन् । उनीहरू भने आफ्नो इन्स्टाग्रामकाे आईडीसहित यी साइटमा जोडिएका छन् ।

यस्तै बिगाे लाइभ, एयपार्टी, युम्मी लाइभ भिडियो च्याट, वलिभ, डोडोलगायत लाइभ च्याट गर्न मिल्ने साइटहरू पनि छन् । कतिपयमा त मेरो घरमा श्रीमान् छैन, म एक्लै छु, के मलाई समय दिन सक्छौ भनेर महिलाको फोटो राखी संवाद गरिएको देखाइएको हुन्छ । कति साइटमा 'म यो ठाउँमा छु, कृपया यो वरपरकाले मलाई सम्पर्क गर्नुहोला' समेत भनिएको हुन्छ । ६० वर्षकाहरूसमेत उमेर छलेर यस्ता साइटमा युवा देखिएर जोडिएका हुन्छन् भने जिज्ञासु बालबालिका नजोडिने कुरै भएन ।

नेपाल दुरसञ्चार प्राधिकरणका अनुसार २०७७ असार मसान्तसम्म कुल जनसंख्याको ७४ दशमलव ४३ प्रतिशतले इन्टरनेट प्रयोग गर्छन् । यसमध्ये ५५ दशमलव ३० प्रतिशतले मोबाइलबाट इन्टरनेट चलाउँछन् । युनिसेफले सन् २०२० मा नेपालमा गरेको अध्ययनअनुसार ८५ दशमलव ८५ प्रतिशत बालबालिकाले मोबाइलमार्फत इन्टरनेट प्रयोग गर्छन् । यीमध्ये ४२ प्रतिशतले अश्लील साइटहरू खोल्ने गरेको अध्ययनमा देखिएको छ । तर, अहिलेसम्म नेपालमा कति जनाले डेटिङ एप्स चलाउँछन् र कस्ता साइटमा उनीहरू जोडिएका छन् भन्ने तथ्याङ्क छैन ।

यस्ता साइटहरूमा भेटिएका किशोर किशोरीहरूलाई ब्ल्याकमेल गर्ने क्रम निरन्तर बढिरहेको छ । कस्तो प्रकारको साथी खोजेको मात्र होइन, यौन सम्पर्क गर्दा कस्तो साधन प्रयोग गर्नुहुन्छ भनेर पनि केही साइटमा सोधिएको हुन्छ । अझ अहिले त कोरोना महामारीका कारण 'यौन सम्पर्क गर्दा मास्क लगाउनुहुन्छ कि नाइँ' भनेरसमेत यस्ता साइटमा सोधिएको हुन्छ । यी साइट वयस्क साइट हुन् । र, वयस्कलाई यसरी सोध्नु पनि पर्छ । तर, उमेर बढाएर १९ पुर्‍याउँदा जोकोही बालक वा बालिका पनि यस्ता साइटको सदस्य बन्न सक्छन् । यस्ता प्रश्नलाई जवाफ दिँदै साइटमा एकाउन्ट खोलेको देखेपछि नियत नै खराब भएकाहरूले बालबालिका, किशोर किशोरीलाई किन छाड्थे र ? त्यसैले बेलैमा सचेत बनौँ ।

प्रकाशित मिति: शुक्रबार, वैशाख २४, २०७८ १३:०३