लुम्बिनी : मुख्यमन्त्री सत्ता बचाउन केन्द्रित, अक्सिजन अभावले छटपटाउँदै संक्रमित

लुम्बिनी : मुख्यमन्त्री सत्ता बचाउन केन्द्रित, अक्सिजन अभावले छटपटाउँदै संक्रमित

A+ A A-

बुटवलको लुम्बिनी प्रादेशिक अस्पतालमा अक्सिजनको अभाव हुन थालेको छ । संक्रमितहरूको संख्या दिनानुदिन बढ्दै जाँदा अस्पतालमा अक्सिजनको अभाव हुन थालेको हो ।

लुम्बिनी प्रादेशिक अस्पतालका लागि बाँकेबाट एचओ सप्लायर्सले अक्सिजन निर्यात गर्दै आएकोमा प्रशासनले बाहिरी जिल्लाका लागि अक्सिजन निर्यातमा रोक लगाएपछि अस्पतालमा थप जटिलता आएको अस्पतालमा मेडिकल सुपरिटेन्डेन्ट डा. राजेन्द्र खनालले बताए ।

अस्पतालमा अक्सिजनको अभाव भएपछि बिहानैदेखि स्वास्थ्य मन्त्रालय, स्वास्थ्य निर्देशनालय, विभिन्न सामाजिक संघसंस्थालगायतलाई जानकारी गराई व्यवस्थापनको काम भइरहेको उनले बताए ।

अहिले पनि मागअनुसारको अक्सिजन आपूर्ति भइरहेको छैन । पछिल्ला दिनमा दैनिक ५ सय सिलिन्डरको माग रहे पनि आपूर्ति भने १ सय ५० सिलिन्डर मात्र भएकाले अक्सिजनको समस्या थप बढ्दै गएको उनले बताए ।

प्रादेशिक अस्पतालमा अक्सिजन आपूर्ति गर्ने एचओ सप्लायर्सले जिल्ला प्रशासन कार्यालय बाँकेले जिल्लामै आपूर्ति अभाव भएको भन्दै बाहिर निकासा रोकेपछि प्रादेशिक अस्पतालमा अक्सिजन दिन नसकिएको बताएको छ ।

अस्पतालमा उत्पादन भएका अक्सिजन आईसीयू र एनआईसीयूमै खपत हुने गरेको र अन्यत्रबाट व्यवस्थापन नभए अवस्था थप जटिलतातर्फ जान सक्ने उनले बताए । अस्पतालद्वारा सञ्चालित धागो कारखानास्थित कोरोना विशेष अस्पतालमा अहिले १ सय ४ जना संक्रमितले उपचार गराइरहेको र सबैलाई अक्सिजन दिनुपर्ने अवस्था रहेको अस्पतालका प्रवक्ता डा. विष्णु गौतमले बताए ।

अक्सिजनका लागि नेपालगञ्जकै भर पर्नुपर्ने अवस्था रहेको तथा डिपोमा माग बढी आउन थालेकाले अक्सिजन पाउन कठिन भएको उनले बताए ।

अस्पतालहरू भन्छन्– अक्सिजन छैन

लुम्बिनी प्रदेशमा कोभिड–१९ को संक्रमण दिनानुदिन बढ्दै गएपछि अक्सिजनको सहज आपूर्तिका लागि अपिलसमेत गर्नुपर्ने अवस्थामा पुगेका छन् अस्पतालहरू । रूपन्देहीको भैरहवास्थित युनिर्भसल मेडिकल कलेज र नेपालगञ्जका मेडिकल कलेजले अक्सिजनको सहज आपूर्ति गरिदिन अपिल गरेका छन् ।

अस्पतालले अक्सिजनको अभाव भएकाले व्यवस्थापन गर्न सरकारलाई ध्यानार्कषणसमेत गराएका छन् । यूसीएमएसका जनसम्पर्क अधिकृत सुशील गुरुङले अक्सिजनको माग अत्यधिक भएकाले दैनिक ८ सय अक्सिजन सिलिण्डर सहज आपूर्तिका लागि सहयोग र समन्वय गरिदिन प्रशासनलाई अनुरोध गरेको बताए ।

अस्पतालमा सामान्य अवस्थामा करिब १२५ वटा अक्सिजन सिलिन्डर खपत भइरहेको थियो । तर अहिले कोभिडअन्तर्गतका करिब १ सय बेडको कोभिड आईसीयू र कोभिड एचडीयूमा उपचाररत प्रत्येक जटिल किसिमका बिरामीहरूलाई अनिवार्य रूपमा अक्सिजन आवश्यक पर्ने उनको भनाइ छ । यसका अतिरिक्त अन्य गम्भीर प्रकृतिका बिरामीसमेत उपचाररत रहेको अवस्थामा प्रत्येक दिन अस्पतालमा कम्तीमा पनि ५ सय सिलिन्डर अक्सिजन खपत भइरहेको विज्ञप्तिमा उल्लेख छ ।

यता बाँकेको नेपालगञ्ज मेडिकल कलेज शिक्षण अस्पतालले पनि अक्सिजन अभाव भएकाले व्यवस्था मिलाइदिन आग्रह गरेको छ । थेग्नै नसक्ने गरी संक्रमितहरू बढिरहेको र सबैका लागि अक्सिजन आवश्यक परेकाले अक्सिजन नभएको अवस्थामा बिरामीको उपचार गर्न नसक्ने अस्पतालले जनाएको छ ।

नेपाल मेडिकल कलेजका प्रबन्ध सञ्चालक डा. सुरेशकुमार कनौडियाले एक प्रेस विज्ञप्ति प्रकाशित गर्दै लिक्विड अक्सिजन ट्याङ्क सकिएको र भारतबाट आउन नसकेकाले अस्पतालले हाल उपचार गराइरहेका बाहेक थप कोरोनाका बिरामी भर्ना गर्न असमर्थ रहेको बताएका छन् ।

हप्तैपिच्छे फेरिए स्वास्थ्यमन्त्री, संक्रिमतको समस्या जहाँको तहीँ

जनताले पैसा तिरेर अक्सिजन बेड खोजिरहँदा नेताहरू भने सरकार गिराउने र बचाउने खेलमा जुटेका छन् । यसअघि नै पहिलो चरणको कोरोना संक्रमण सामना गरेको भए पनि त्यसपछि पर्याप्त तयारी नहुँदा अहिले अधिकांश संक्रमित अक्सिजन नपाएर मृत्युवरण गरिरहेका छन् भने आईसीयू र भेन्टिलेटर नपाउने समस्या झन् दिनानुदिन बढ्दै गएको छ ।

सरकार जोगाउन एक दिनमै अनेक प्रपञ्च गर्ने मुख्यमन्त्री शंकर पोखरेल जनताको स्वास्थ्यप्रति गम्भीर देखिएको छैन । मानवअधिकार तथा शान्ति समाजका केन्द्रीय अध्यक्ष गोविन्द खनाल सत्ता बचाउने र ढाल्ने खेल खेल्नुको सट्टा नेपालगञ्जमा पुगेर संक्रमितको अवस्था हेरेर जनताको स्वास्थ्यमा थप गम्भीर बन्न दलहरूलाई आग्रह गरेका छन् ।

सत्ताको जोडघटाउमा लुम्बिनी प्रदेशमा हप्तैपिच्छे स्वास्थ्यमन्त्री फेरिएका कारणले पनि स्वास्थ्य संवेदनशीलतामा सरकार गम्भीर छैन भन्ने प्रस्ट हुन्छ । कोभिडले स्वास्थ्यक्षेत्र हायलकायल बनाइरहेका बेला लुम्बिनी प्रदेशमा १६ दिनमा चार जना स्वास्थ्यमन्त्री फेरिइसकेका छन् ।

६ वैशाखमा सामाजिक विकासमन्त्री सुदर्शन बरालले राजीनामा दिएपछि मात्र तीन जना स्वास्थ्यमन्त्री फेरिए । सत्ता जोगाउन सामाजिक विकास मन्त्रालयलाई टुक्र्याएर स्वास्थ्य तथा जनसंख्या मन्त्रालय छुट्टै बनाएका मुख्यमन्त्री पोखरेलले सुरुमा लीला गिरीलाई स्वास्थ्य तथा जनसंख्या मन्त्रालयको जिम्मेवारी दिए । त्यसपछि उनी १९ वैशाखसम्म कायम रहे । फेरि मुख्यमन्त्रीले मन्त्रिमण्डल पुनर्गठन गरे । १९ वैशाखमा हरि रिजालले स्वास्थ्य तथा जनसंख्या मन्त्रीको रूपमा शपथ लिए ।

त्यसपछि पनि २१ वैशाखमा स्वास्थ्य तथा जनसंख्यामन्त्रीको जिम्मेवारी भोजप्रसाद श्रेष्ठले पाएका छन् । बुटवलको पूर्वमेयरसमेत रहेका श्रेष्ठले पहिलो निर्णय निःशुल्क रक्त सञ्चार सेवालाई अगाडि सारेका छन् । मन्त्री श्रेष्ठले कोरोना संकटलाई प्रदेश सरकारले गम्भीर रूपमा हेरेको बताउँदै यसबारे थप रणनीति तय गर्ने बताए ।

सरकारका प्रवक्ता बैजनाथ चौधरीले हिजो मात्र प्रदेशका १२ वटै जिल्लाका विपद् व्यवस्थापन समितिलाई ७९ लाख रुपैयाँ कोभिड नियन्त्रण तथा उपचारमा खर्च गर्ने गरी प्रदान गरेको भन्दै स्वास्थ्यकर्मीको अभाव र पैसाको अभाव हुन नदिन प्रदेश सरकार गम्भीर रहेको बताए । उनले अक्सिजनको समस्या समाधानका लागि प्रमुख जिल्ला अधिकारीको समन्वयमा व्यवस्थापनको तयारी भइरहेको उनको भनाइ छ ।

प्रकाशित मिति: बिहीबार, वैशाख २३, २०७८ १८:२५