कोरोना संक्रमितको उपचारमा निजी अस्पतालको मनपरी शुल्क

A+ A A-

१९ वैशाखमा कोरोना संक्रमण पुष्टि भएपछि गौशालाकी २५ वर्षीया गीता अर्याल (नाम परिवर्तन) आइसोलेसन बस्नका लागि उपयुक्त अस्पतालको खोजीमा लागिन् ।

नि:शुल्क उपचार पाइने सरकारी अस्पतालहरूमा कहीँकतै बेड खाली नपाएपछि बाध्य भएर उनी निजी अस्पतालको खोजीमा लागिन् । आफूलाई पायक पर्ने चाबहिलस्थित हेल्पिङ ह्यान्ड्स अस्पतालमा बुझ्दा अस्पतालले दैनिक जनरल बेडको शुल्क ५ हजार भन्यो ।

अस्पतालको शुल्क सुनेर छक्क परेकी गीता कम शुल्कमा बेड पाइने आशामा अन्य निजी अस्पतालहरू धाइन् । ह्याम्स र ग्रान्डी अस्पतालले बेड शुल्क प्रतिदिन ७ हजार रुपैयाँ भने । त्यसपछि उनी मेडिसिटी अस्पताल पुगिन् । त्यहाँ पुग्दा अस्पतालको बेडशुल्क साढे १२ हजार रुपैयाँ पुग्याे । बेडबाहेकका अन्य उपचार, परीक्षण खर्च त सबैलाई थाहा भएकै कुरा हो ।

केही नमुना निजी अस्पतालहरूको शुल्कले विस्मृत भएकी गीताले चर्को शुल्क तिर्नुभन्दा अन्ततः कोठामा एक्लै होम आइसोलेसनमा बस्ने निर्णय गरिन् ।

शुल्ककै कारण ज्यान जोखिममा राखेर होम आइसोलेसनमा बस्ने गीता एक्ली भने हाेइनन् । सरकारी अस्पतालहरूमा बेड अभाव भएसँगै बाध्य भएर निजी अस्पताल धाउनेको लर्कोमा एउटा यस्तो पंक्ति पनि छ, जो उठिबास हुने गरी शुल्क तिर्नुभन्दा होम आइसोलेसनमै बस्न उचित ठानिरहेका छन् ।

निजी अस्पतालको मारमा यतिखेर दीर्घरोगी र कोभिडले ग्रस्त संक्रमितहरू पनि परेका छन् । १० वैशाखमा दाङबाट काठमाडौं आएकी चेतना गुरुङले कोभिड निमोनियाले ग्रस्त बुबाको ग्रीन सिटी अस्पतालमा उपचार गराउँदा ४ लाख रुपैयाँ तिरिन् । यति महँगो शुल्क तिरिसक्दा पनि उनले बुबालाई बचाउन भने सकिनन् ।

उपत्यकाका निजी अस्पतालहरूले कोरोना संक्रमितहरूसँग चर्को र मनपरी शुल्क लिने गरेको पाइएपछि यतिखेर जनमानसबाट विरोध भएको छ । उपत्यकाका निजी अस्पतालमा जनरल बेड, आइसोलेसन, आईसीयू र भेन्टिलेटरमा उपलब्ध अत्यावश्यक सुविधाका नाममा बिरामीको मोलमोलाइ भइरहेको छ ।

काठमाडौं जिल्ला प्रशासनले नेपाल मेडिकल कलेज र ह्याम्स अस्पताललाई त प्रस्टीकरण नै सोधेको छ । ‘बेडचार्ज धेरै लिएको गुनासो आएपछि कारबाही प्रक्रिया अगाडि बढाएका छौँ’, प्रमुख जिल्ला अधिकारी कालीप्रसाद पराजुलीले भने, 'दुवै अस्पतालका सीईओलाई लिखित जवाफसहित आउन भनेका छौँ ।’

ह्याम्स अस्पतालले डिलक्स आइसोलेसन बेडको शुल्क मात्रै ५० हजार रुपैयाँ तोकेको छ । दैनिक शुल्क ७ हजार तोकेको उक्त अस्पतालले आईसीयू शुल्क २२ हजार राखेकाे छ । अहिले संक्रमित भएका र नभएका दुवैमा निजी अस्पतालहरूको शुल्कले आतंक फैलाएको देखिन्छ । कोभिडको दैनिक बेडशुल्कबाहेक डाक्टरको जाँच, नर्स, औषधि, परीक्षण, खानपिनलगायतका अन्य शुल्कले बिरामीको मनोबल यसै पनि खस्काउने निश्चितप्रायः छ ।

कोरोना संक्रमितहरूको उपचारका लागि स्वास्थ्य तथा जनसंख्या मन्त्रालयले दैनिक शुल्कको मापदण्ड पहिले नै तोकिसकेको छ । सामान्य बेडका लागि ३५०० रुपैयाँ, मध्यमका लागि ७ हजार रुपैयाँ र गम्भीर उपचारका लागि दैनिक १५ हजार रुपैयाँ शुल्क लिनेगरी सेवा सम्झौता गर्न निजी अस्पतालहरूलाई प्रस्ताव गरेको मन्त्रालयको निर्णयलाई लत्याउँदै यतिखेर निजी अस्पतालहरूले मनपरी शुल्क उठाएका छन् ।

सरकारले तोकेको शुल्क त धेरै परको कुरा, निजी अस्पतालले आफूखुसी शुल्क सूची तयार पारेका छन् । निजी अस्पतालहरूले मनपरी शुल्क लिएको पाइएमा आवश्यक कारबाही गरिने स्वास्थ्य तथा जनसंख्या मन्त्रालयका प्रवक्ता डा. जागेश्वर गौतम बताउँछन् ।

प्रकाशित मिति: बिहीबार, वैशाख २३, २०७८ १८:२९