‘कोरोना संक्रमणले भन्दा पनि मानिसहरूको प्रेमले भावुक बनाउँदोरहेछ’

A+ A A-

३१ चैतको कुरा हो । कलाकार यमन श्रेष्ठलाई एक्कासि घाँटी खसखसाउन सुरु भयो । लगत्तै भोलिपल्ट दिनभरि सुतेको सुत्यै भए उनी । कोभिड भयो कि भन्ने आशंकामा २ वैशाखमा कोभिड परीक्षण गर्दा पोजिटिभ देखियो ।

‘घरमा सबैले मास्क लगाउन थालिसक्नुभएको थियो । तर, दुई दिनपछि बा (मदनकृष्ण श्रेष्ठ) लाई पनि कोभिड पोजिटिभ देखियो । त्यति मात्रै नभएर श्रीमती, बहिनी र छोरी सबैमा कोरोना देखियो,’ यमनले भने ।

सबैलाई एकैपटक कोरोना संक्रमण हुँदा के कसरी व्यवस्थापन गर्ने त ? चुनौती चुलिएको थियो श्रेष्ठ परिवारमा । हुन पनि सिटी भ्यालु सबैको १२, १३, १४ मा झरेको थियो जुन निकै जोखिमयुक्त थियो ।

‘हामी त सुरुसुरुमा यतिसम्म शिथिल भयौँ कि खानेकुरा पनि प्लेटसम्म लान नसक्ने भयौँ,’ यमन भन्छन् ।

यस्तो अवस्थामा अब कसले कसलाई हेर्ने ? घरका कुनै पनि सदस्य न पानी तताएर खान सक्छन्, न त खानेकुरा पकाउन नै !

यमन भन्छन्, ‘अन्ततः केही सीप नलागेपछि हामीले छिमेकीहरूलाई नै गुहार माग्यौँ । छिमेकीहरूले नै हामीलाई लन्चदेखि डिनरसम्म खानेकुराहरू ल्याइदिन थाल्नुभयो ।’

कोभिडको संक्रमणले एकातिर आफैँलाई गलाएको अवस्था, अर्कोतिर घरका अन्य सदस्यलाई के कसो भयो भन्ने पिरलो ।

‘कोरोना निकै काम नलाग्ने रै’छ,’ यमन भन्छन्, ‘बुबाको सिटी भ्यालु घटेर १३ हुँदा अस्पताल नै भर्ना गर्नुपर्ने भयो । सबै व्यवस्थापन फोनफोनबाटै गर्नुपर्ने भयो ।’

यसरी समग्र परिवार नै संक्रमित हुँदा भाइबरमा दिनहुँ नै डाक्टरसँग सबै सदस्यको कुराकानी, भिडियो च्याट भइरहनाले स्वास्थ्य उपचारमा नियमित परामर्श लिन भने सहज भएको यमन बताउँछन् । यमन भन्छन्, ‘डाक्टरको औषधि र बोली दुवैले एकैसाथ ऊर्जा दियो । व्यक्तिगत रूपमा नभेटे/नचिने पनि यसपटक टेलिमेडिसिन रिमोट केयरको पनि अनुभव गरियो,’ उनी हाँस्दै भन्छन् ।

त्यसो त यस्तो अवस्थामा आफ्नो डाक्टर आफैँ पनि हुनुपरेको यमन बताउँछन् । उनी भन्छन्, ‘अक्सिजन लेभल आफैँले हेर्ने, ज्वरो आउँदा आफैँ नाप्ने, अक्सिजनको पाइप आफैँले आफ्नो नाकभित्र छिराउने, आफ्नो ब्लड प्रेसर आफैँ नाप्ने, गुगलमा लक्षणहरूको रिसर्च गर्ने...। कहिलेकाहीँ त म डाक्टर कि बिरामी भनेर एक्लै हाँस्ने गर्थें ।’

कोभिड संक्रमण भएको २२ दिन भइसक्दा पनि छरछिमेक र ससुरालीबाट खाना ल्याइदिने क्रम जारी छ ।

कोभिडले त होइन, तर मानिसहरूले देखाएको प्रेम र सौहार्द्रताले भने एकदमै भावुक बनाएको उनको अनुभव छ । यमन भन्छन्, ‘साथीभाइ आफन्तहरूको एकदम फोन आउँथ्यो, फोन उठाएर कुरा गर्नसमेत नसकिने, तागत नै नआउने, तर त्यो फोनको रातो अक्षरमा भएको मिसकलको लिस्ट हेर्दा पनि सबैसँगै भएको जस्तो फिल हुन्थ्यो । त्यो रातो अक्षरजस्तो आफ्नो आँखा पनि रातोरातो हुन्थ्यो रोएर ।’

यसबीचमा यमनका लागि कोभिडसँगै जोगिनुपर्ने अर्को भयानक कुरा बन्यो, कोरोनाको आतंक मच्चाउने समाचार । आतंकबाट बच्नकै लागि केही समय त समाचारहरू हेर्नै छाडिदिए उनले । त्यसमाथि भारतीय च्यानल त बन्दै गरिदिए । उनी भन्छन्, ‘सरकारले गरेको राम्रो काम र सकारात्मक समाचार सुन्न नेपाल टेलिभिजन पो हेर्न थालेँ ।’

गत वर्ष कोरोना/लकडाउनसम्बन्धी गीत बनाएका यमनलाई यतिखेर सोही गीत शेयर गरेर शुभ स्वास्थ्यलाभको शुभकामना म्यासेज पठाएर दिएको प्रेमपूर्ण कमेन्ट नै सकारात्मक हुने कडी बन्न पुगेको छ । यतिखेर आफूलाई मनोरञ्जन दिन कमेडी कार्यक्रमहरू हेरेर समय व्यतीत गरिरहेका यमन हाल पनि सपरिवार नै कोरोनासँग लडिरहेका छन् ।

अस्पतालबाट डिस्चार्ज भएका कलाकार मदनकृष्ण श्रेष्ठ पनि उपचाररत नै छन् ।

यमन भन्छन्, ‘कोभिडले हामी घरभित्रैको मान्छेलाई नजिक हुन नदिए पनि मानिस/छरछिमेकको प्रेमले भावुक बनाइदिएको छ ।’

प्रकाशित मिति: बुधबार, वैशाख २२, २०७८ ११:२५