प्रादेशिक अस्पतालले आईसीयू खाली छैन भन्दै फर्काइदियो, उपचार नपाएरै बिरामीले संसार छाडे

प्रादेशिक अस्पतालले आईसीयू खाली छैन भन्दै फर्काइदियो, उपचार नपाएरै बिरामीले संसार छाडे

A+ A A-

धनुषामा उपचार नपाएर एक जना पुरुषको मृत्यु भएको छ । उच्च ज्वरो र रुघाखोकीबाट ग्रसित बटेश्वर गाउँपालिका–४ स्थित ससुरालीमा बस्दै आएका ४५ वर्षीय लोकबहादुर परियारको उपचार नपाएरै मृत्यु भएको हो ।

अस्थायी प्रहरी चौकी बटेश्वरका अनुसार बटेश्वर बजारस्थित झोपडीमा होटेल व्यवसाय सञ्चालन गदै आएका उनलाई चार दिनदेखि ज्वरो आएको थियो । स्थानीय क्लिनिकमा उपचार गराउँदै आएका उनको सोमबार बेलुकीबाट अवस्था बिग्रिँदै गयो । उपचार गराउन उनी एक जना सहयोगीसँगै उनी बटेश्वरकै आरपी मेडिकल हलमा पुगेका थिए ।

‘पहिले कहाँ उपचार गराउँथे त्यो मलाई थाहा भएन । हिजो साँझ मेरो क्लिनिकमा उपचार गराउन आउँदा उहाँको अवस्था गम्भीर भइसकेको थियो,' मेडिकल हल सञ्चालक सुवोध साहले भने, ‘मैले यहाँ उपचार सम्भव छैन बाहिरै लानुस् भने । उहाँको आफन्त नभएकाले मैले नै एम्बुलेन्स बोलाएर प्रादेशिक अस्पताल जनकपुर पठाइदिएको हुँ ।’

हिजो राति करिब ८ बजे उनलाई प्रादेशिक अस्पताल पुर्‍याइए पनि आईसीयू बेड खाली नरहेको भन्दै अस्पतालले फर्काइदिएको एम्बुलेन्स चालक रामबाबु महतोले बताए ।

‘आफैँ एम्बुलेन्समा चढ्नुभयो । कुरा पनि राम्रैसँग गर्दै हुनुहुन्थ्यो तर केहीबेरपछि उहाँलाई सास फेर्न अप्ठ्यारो भएपछि मैले अक्सिजन लगाइदिए,' चालक महतोले भने, ‘प्रादेशिक अस्पताल पुग्दा डाक्टरले अक्सिजन लेभेल एकदमै कम छ । आईसीयूमा भर्ना गर्नुपर्छ यहाँ आईसीयू खाली छैन, अर्को अस्पताल लैजानुस् भनेर फर्काइदिए ।’

परियारलाई सास फेर्न निकै अप्ठ्यारो हुन थालेपछि एम्बुलेन्स चालकले त्यहाँबाट उनलाई लिएर जानकी हेल्थ केयर एण्ड टिचिङ हस्पिटल पुर्‍याएका थिए । तर, त्यहाँ आईसीयू बेड चार्ज महँगो रहेको भन्दै परियारले अर्को अस्पताल लैजान भनेको चालक महतोले बताए । त्यसपछि उनलाई लिएर अर्को निजी अस्पताल रामजानकीमा पुगे ।

‘राम जानकी अस्पतालमा पनि उपचार खर्च धेरै भन्दैछ भनेर भन्नुभयो,’ चालक महतोले भने, ‘उहाँले मसँग पैसा छैन । घरमै पुर्‍याइदिन भन्नुभयो । मैले जहाँबाट बोकेर लगेको थिएँ त्यही क्लिनकमा छोडेर फर्किएको हुँ ।’

स्थानीयका अनुसार क्लिनिकबाट राति उनी बस्दै आएको घरमा गएका थिए । प्रहरीका अनुसार उनकी श्रीमतीसहित अन्य आफन्तहरू भारत बस्दै आएका छन् । घरमा एक्लै बसेर उनले मासु तथा रक्सी पसल सञ्चालन गरिरहेका थिए । असैह्य पीडा हुन थालेपछि मंगलबार बिहान फेरि उनी आरपी मेडिकल हलमै पुगेका थिए । करिब ७ बजे अर्का एक जना सहयोगीसँगै उपचार गरिदिन भन्दै परियार क्लिनिक आएको मेडिकल हल सञ्चालक साहको भनाइ छ ।

‘उहाँलाई फेरि किन यहाँ ल्याउनुभयो ? यहाँ उपचार सम्भव छैन बाहिर लैजानुस् भनेर उहाँको सहयोगीलाई मैले भनेको थिएँ । तर, आफन्त नभएपछि उहाँलाई कसैले वास्ता गरेन । बरण्डामा बसेको केहीबेरमै उहाँको मृत्यु भयो,' उनले भने ।

मृत्युपछि नेपाली सेनाको टोलीले उनको शव व्यवस्थापन गरेको छ ।

अस्पतालबाट किन फर्काइयो बुझ्दै छु : मेसु यादव

प्रादेशिक अस्पताल जनकपुरमा १२ वटा आईसीयू बेड छन् । अस्पतालका मेडिकल सुपरिटेन्डेन्ट (मेसु) डा. प्रमोद यादवका अनुसार हिजो १० जना बिरामीलाई मात्र आईसीयूमा भर्ना गरिएको थियो ।

तर, परियारलाई किन अस्पतालमा भर्ना नगरिएको हो भन्नेबारे आफूले बुझिरहेको उनले बताए । ‘बिरामी आयो र बेड खाली छ भने हामीले भर्ना लिन्छौँ । तर परियारलाई किन आईसीयू खाली छैन भनेर फर्काइयो वा त्यो बेला आईसीयू खाली थियो कि थिएन म बुझ्दै छु,' मेसु यादवले भने ।

प्रकाशित मिति: मंगलबार, वैशाख २१, २०७८ १५:२७