जसपा कलह प्रदेश २ सम्म पुग्यो, कांग्रेस र माओवादीसँग मिलेर सरकार बनाउने उपेन्द्र यादवको तयारी

जसपा कलह प्रदेश २ सम्म पुग्यो, कांग्रेस र माओवादीसँग मिलेर सरकार बनाउने उपेन्द्र यादवको तयारी

A+ A A-

जनता समाजवादी पार्टी (जसपा) को आन्तरिक किचलोका कारण प्रदेश २ को सत्ता समीकरणसमेत हेरफेर हुने सम्भावना बढेको छ ।

पछिल्लो समय पार्टीको विवाद उत्कर्षमा पुगेको बेला अध्यक्ष उपेन्द्र यादवले प्रदेशको सत्ता समीकरण हेरफेरका लागि तीव्र कसरतमा लागेका छन् । जसपाको एकल सरकार रहेको प्रदेश २ मा पूर्वराजपालाई हटाएर तत्कालीन संघीय समाजवादी फोरम, एमाले माधव नेपाल समूह, कांग्रेस र माओवादीसँग सत्ता सहकार्यका लागि उनले प्रयास गरिरहेको बुझिएको छ ।

लुम्बिनी प्रदेशमा अध्यक्ष यादवको इच्छाविपरीत चार जना सांसदहरूले अविश्वास प्रस्तावको विपक्षमा लागेपछि पार्टी विभाजनउन्मुख हुनु र संघीय सरकारमा महन्थ ठाकुर तथा राजेन्द्र महतोले प्रधानमन्त्री केपी ओलीलाई साथसहयोग गर्ने देखेपछि अध्यक्ष यादव पूर्वराजपाबाट चिढिएका छन् ।

लुम्बिनी प्रदेशमा विवादसँगै संघीय सरकारलाई सहयोग गर्ने विषयमा समेत जसपा विभाजित छ । संघीय परिषद् अध्यक्ष डा. बाबुराम भटराई र केन्द्रीय अध्यक्ष उपेन्द्र यादव कुनै पनि हालतमा ओली नेतृत्वको सरकारलाई साथ नदिने मुडमा छन् भने महन्थ ठाकुर र राजेन्द्र महतोले प्रधानमन्त्री ओलीले मधेसका माग पूरा गर्ने प्रयास अघि बढाएकाले उनी नेतृत्वको सरकारलाई जोगाउन भूमिका खेल्ने पक्षमा छन् । जबकि जसपाका नेता यादव भटराईसँगै माओवादी र माधव नेपाल समूहको एमाले प्रधानमन्त्री ओलीविरुद्धको अविश्वासको प्रस्ताव ल्याउने पक्षमा देखिन्छ ।

प्रतिनिधिसभा पुनःस्थापनापछि नै ओली नेतृत्वको सरकारलाई टिकाउने वा हटाउने विषयमा विभाजित जसपाको विवाद लुम्बिनी प्रदेशको सत्ता समीकरणले उत्कर्षमा पुर्‍याएको छ  । लुम्बिनी प्रदेशसभाका चार सदस्यलाई कारबाही गरी पदमुक्त गराउने अध्यक्ष यादव पक्षको निर्णयपछि अर्का अध्यक्ष ठाकुर पक्ष प्रतिवादमा उत्रिएपछि पार्टी विभाजनको डिलमा पुगेको छ ।

लुम्बिनी प्रदेशमा आफ्नै सांसद एमालेको पक्षमा उभिएपछि चिढिएका जनता समाजवादी पार्टीका अध्यक्ष यादवले ती सांसदहरूलाई कारबाही गरेका थिए । सोही कारण प्रदेशमा समेत सत्ता समीकरण बदल्न यादव लागिपरेको बताइन्छ ।

जसपा अध्यक्ष ठाकुर र नेता महतो ओली नेतृत्वको सरकारमा सहभागी भए पार्टी विभाजनको सम्भावना रहेको र त्यसले प्रदेश सरकारलाई समेत असर पर्ने जसपा प्रदेश २ संसदीय दलका उपनेता रामआशिष यादव बताउँछन् । तर, जसपा एक रहुञ्जेल प्रदेशसभामा समीकरण हेरफेरको सम्भावना नदेखेको उनले बताए ।

उसो त, नयाँ वर्षको उपलक्ष्यमा भौतिक पूर्वाधार तथा विकास मन्त्रालयले आयोजना गरेको शुभकामना आदानप्रदान तथा चियापान समारोहलाई समेत जसपा विभाजनको रिहर्सलको रूपमा हेरिएको थियो । समारोहमा महन्थ ठाकुर, राजेन्द्र महतो, अनिल झा, शरतसिंह भण्डारीलगायतका पूर्वराजपाका अध्यक्ष मण्डल सहभागी भए पनि पूर्वफोरमका केन्द्रीय तथा प्रदेशस्तरका साथै जिल्लास्तरका समेत एउटै नेताहरू सहभागी भएनन् ।

त्यतिबेला शिलापत्रसँग कुरा गर्दै प्रदेश २ का भूमि व्यवस्था कृषि तथा सहकारी राज्यमन्त्री योगेन्द्र राय यादवले समारोहलाई गुटको भेलाको संज्ञा दिँदै यो पार्टीको दिर्घकालीन भविष्यका लागि खतरा रहेको बताएका थिए । पूर्वराजपाप्रति आक्रोश व्यक्त गर्दै मन्त्री यादवले पार्टी विभाजन गर्न खोजेको आरोप लगाएका थिए । हुन त, त्यसको करिब दुई साताअघि मात्र यादवले समेत पूर्वसंघीय समाजवादी पार्टीको प्रदेशस्तरीय भेला तथा प्रशिक्षण कार्यक्रम आयोजना गरेका थिए । त्यसले पूर्वराजपा चिढिएकाे थियाे ।

प्रदेश २ मा सरकार गठनका लागि यादवले तत्कालीन राजपाका समेत सांसदहरूलाई आफ्नो पक्षमा तान्न मुख्यमन्त्री लालबाबु राउत, अर्थमन्त्री विजय यादवलगायतका नेतालाई खटाएका छन् । प्रदेशसभामा कुल १ सय सात जना सांसद छन्, जसमध्ये एमाले प्रवेश गरेका चार सांसदकाे पद माओवादी केन्द्रले रिक्त बनाएकाे छ । बाँकी १ सय तीन जनामा तत्कालीन राजपाबाट सभामुखसहित २५ जना र फोरमबाट ३० जना सांसद प्रदेशसभामा छन् ।

त्यसैगरी, एमालेका २१ जना सांसदमध्ये १३ जना सांसद माधव नेपाल समूहका छन् । कांग्रेसका १९ सांसद र माओवादी केन्द्रका सात जना सांसद छन् । यही अंक गणितीय हिसाबले सबैलाई मिलाएर अर्को सरकार निर्माण गर्ने खेलमा यादव लागेका हुन् । सरकार गठनका लागि ५२ जना सांसदको समर्थन आवश्यकता छ । यद्यपि जसपा नफुटुञ्जेल नयाँ सरकार गठनबारे छलफल अघि बढे पनि निष्कर्ष भने केही नस्किने एमाले, कांग्रेस र माओवादीका सांसदहरू बताउँछन् ।

‘शेरबहादुरजीले उपेन्द्र यादवजीसँगको भेटमा स्पष्ट भन्नुभएको छ कि पहिले तपाईँहरू फुट्नुस् अथवा तपाईंलाई समर्थन दिने ३२ जना सांसदको हस्ताक्षर लिएर आउनुस् अनि हामीले सहयोग गरौँला,’ कांग्रेस उच्च स्रोतले भन्यो ।

माओवादी केन्द्रका अध्यक्ष पुष्पकमल दाहाल 'प्रचण्ड' र उपेन्द्रबीच समेत प्रदेशमा सत्ता सहकार्यबारे छलफल भएको माओवादीका एक प्रभावशाली नेताले जानकारी दिए । जसपा विभाजित भए माओवादीले सत्ता सहकार्यमा साथ दिने सम्भावना रहेको प्रमुख सचेतक दिलीप साहले बताए । सत्ता सहकार्यबारे माधव नेपाल र उपेन्द्र यादवलगायतका नेताहरूसित छलफल भए पनि जसपा विभाजित नहुञ्जेल केही भन्न नसकिने जवाफ फर्काएको एमालेका एक सांसदले बताए ।

यद्यपि, प्रदेश २ मा सत्ता समीकरण हेरफेरको सम्भावना रोक्न कांग्रेससहितका दलहरूसँग आफूहरूसमेत निरन्तर संवादमा रहेको महन्थ ठाकुरनिकट एक नेताले बताए ।

प्रकाशित मिति: आइतबार, वैशाख १९, २०७८ १६:०८